Tŭ do, jơh gùt càr neh geh rlau 2 rơbô nơm hìu lơh sir. Bàr pe ƀòn lơgar bè ƀòn drà dờng An Khê mờ ƀòn dờng Pleiku sền bal là neh lơh sir broă lơh. Mờ khà dong kờl 60 tơlak đong dùl hìu bơnhă lơh pa mờ 30 tơlak đong 1 hìu bơnhă lơh niam wơl, ală tiah neh ngăc ngar hòi jà priă jền tàm dùl bă tiah, lơh jat niam gơnoar rcang lài bơh làng bol dê.

Gah đơng lam ling klàng càr Gia Lai mờ ală mpồl ling klàng tă pơgồp mờr 4 rơbô ngai lơh broă, dong kờl jun pơndiang phan bơna bơt bơtàu, lơh hìu mờ jat sền broă lơh. Mơya, càr Gia Lai kung gam gơtìp kal ke tài giă phan bơna bơt bơtàu gơguh, ờ tơl cau lơh broă mờ bơta pràn ai priă gam gơtìp kal ke bơh đah hìu bơnhă làng bol dê. Anih duh broă Làng bol càr sồr ală tiah sơlơ tơnguh tai lòt sền, sồr lơh mờ ngăc ngar ngui ală priă jền nàng lơh sir broă lơh di mờ tŭ tơngai.