
Jăt broă rơndăp lơh bơh Kwang àng càr Dăk Lăk dê bè lơh 4 rơbô 285 nơm hìu pà hìu rơƀah, hìu gơtìp kal ke in jăt Broă lơh tơn jơh hìu sèt, hìu ồm ñhăt dà mìu, tus tŭ do, Kwang àng càr Dăk Lăk neh sơn đờm lơh geh 3 rơbô 14 nơm hìu, geh di pơgăp 71% mpồl broă lơh. Tàm hơ̆ geh rơlao 3 rơbô nơm neh mŭt lơh, mờ gam lơh gơs 676 nơm hìu nàng pơn jăt tai jào tơn tàm poh do.

Bŭ lah pa do phan lơh hìu gơtìp kal ke, mơya, mờ broă lơh ngan pràn bal mờ drờm bal, broă tơn jơh hìu sèt jăt jơnau sồr bơh Ƀộ Kwang àng tàm càr Dăk Lăk kung gam lơh di jăt tơngai geh ai, kờp dŭ lơh gơs broă lơh do tàm ngai 31 nhai 10 nam 2025. Kờp tus ngai 18 nhai 6, neh mŭt lơh di pơgăp 5 rơbô 150 nơm hìu jăt Broă lơh tơn jơh hìu sèt, hìu ồm ñhăt dà mìu bơh Cíñ phủ sồr. Tàm hơ̆ geh 4 rơbô 174 nơm hìu lơh pa mờ 970 nơm hìu lơh niam wơl, neh lơh gơs 3 rơbô 25 nơm hìu (tàm hơ̆ geh 2 rơbô 182 nơm hìu lơh pa mờ 843 nơm hìu lơh niam wơl). Nàng lơh gơs jơnau kờñ tơn jơh hìu sèt, hìu ồm ñhăt dà mìu tàm càr, càr Dăk Lăk kờp dŭ rơ̆p lơh pa mờ lơh niam wơl tai 2 rơbô 150 nơm hìu bơh tŭ do tus jơh nhai 10 nam 2025.
Viết bình luận