Di tơnkah 78 nam Ngai Cau ling sồt să, Cau ling chơ̆t màng, drim òr (24/07), tàm Hà Nội, Ƀộ Dơlam is pơgồp bal mờ Ƀộ Ling klàng, Ƀộ Kwang àng, Anih duh broă Làng bol ƀòn dờng Hà Nội mờ ală mpồl lơh broă gơrềng bal Bơyai lơh dơ̆ tìp măt 250 nă cau ala măt cau geh màng mờ dà lơgar, cau tus tam lơh pơnrơ jăk tàm gùt lơgar.

Ală cau ala măt là kwang bàng lơh broă kăc màng lài do, kwang bàng lài mờ rài tam lơh, cau tus tam lơh nàng yal wơl bơhiàn jăk chài jơi bơtiàn dê, tam pà bal ală tam gơl tàm rài bơtàu tơnguh. Đơs tàm dơ̆ tìp, Tổng Ƀí thư ồng Tô Lâm tơlik nùs nhơm ưn ngài uă ngan mờr 1 tơlăk 200 nă cau ling chơ̆t màng, ală cau kòn jăk chài neh phi să tàm Dà lơgar. Tổng Ƀí thư đơs tờm Đảng, Dà lơgar sùm sền gròi tus mờ broă kis git jơnau git adăt mờ sồr ală ƀộ, gah lơh broă, ală càr, ƀòn dờng pơn jăt tai sền wơl, lơh gơs niam broă dong kờl cau geh màng mờ dà lơgar, pơgồp bal lơh geh uă nùs nhơm “Hùc dà kah tô dà” tàm gùt mpồl bơtiàn.