Tàm hìu pa geh lơh dờng ơnàng 60 thơ̆k vuông, bi Y Lô Ksor, kòn cau Rơđê kis tàm ƀòn Hiao, sàh Ea H’leo, càr Dăk Lăk chờ hờp ngan. Bi Y Lô yal, hìu gal kòn, mè neh kra rơlao 80 sơnam, lài do jơh ală cau tàm hìu pal tàm bơtềt bal ơm tàm hìu mpàn neh sèt, trồ mìu ñhăt dà, càl khồm mrềt, mè bi sùm gơtìp kòp tê jê să. Jơh ală cau tàm hìu kơ̆p tàm 2, 3 sào ù tam bùm blàng, priă geh ờ uă. Pa do, geh Kwang àng càr dong kờl 80 tơlăk đong, bi càn tai 40 tơlăk đong nàng lơh hìu pa.

Bơh ngai geh hìu ơm dờng niam, mè bi să jan neh pràn rơlao, oh kòn chờ hờp rơlao, gam bi iang nùs lơh broă. Tŭ do bi Y Lô gam tus bal tàm mpồl atbồ ƀòn, tus bal lòt sền gròi ƀòn, pơgồp bal tàm broă sền gàr bơta lơngăp lơngai ƀòn lơgar tàm pah mang: “Hìu nhă gơtìp kal ke, geh tus 8 nă cau ơm bal tàm 1 nơm hìu mpàn, hăt hal; trồ mìu ñhăt dà, trồ tơngai den duh. Ù suơn mìr kung ờ uă, ơm tàm dòr ñhoa den tàng ờ gơtùi tam phan lơi. Geh Đảng, Dà lơgar bal mờ Ƀộ Kwang àng dong kờl lơh hìu dờng niam, ală cau tàm hìu chờ hờp ngan. Tŭ do mìng rơcang tàm broă lơh sa, ròng kòn bơsram sră, dong kờl bal nàng bơtơ̆t bơtàu ƀòn lơgar bơtàu tơnguh”.

Kung ndrờm bè hìu làng bol ndai tàm ƀòn tiah Tây Nguyên dê, lŏ H’ Bui Đing, kòn cau Rơđê kis tàm ƀòn Zia, sàh Hoà Sơn, càr Dăk Lăk ngoh rơngăc ngan tŭ pơs wàs nàng mŭt ơm tàm hìu pa dờng ơnàng 40 thơ̆k vuông, priă lơh gơs 80 tơlăk đong. Lŏ pà git, là hìu rơƀah, mờ ròng tus 4 nă kòn tai bal mờ mè bèp neh kra, hìu nhă lŏ gùt nam kal ke ngan mờ broă lơh sa geh bơh 1 tus 2 sào ù dòr kơh, ờ gơtùi tam kơphe ha là tiêu. Rài kis glar bòl, tus dơ̆ sào gam pal rơcang sùm, den jơnau lơh hìu mìng geh tàm mpao.

Lŏ H’ Bui ngoh rơngăc đơs: “Đơs ngan, hìu nhă kal ke ngan, ờ gơtùi yal jơh bơta glar bòl ờ, kis jăt ngai là kơnờm mờ broă lòt lơh broă ơpah gơdê. Hìu đam trồ tơngai duh, trồ mìu den ñhăt dà, kis ing jăt ngai mơ. Suơn mìr den ù dòr kơh, mìng geh bơh 1 tus 2 sào ù dòr. Ală kwang bàng neh tus dong kờl lơh geh hìu ơm, hìu nhă añ chờ hờp ngan. Ưn ngài Đảng, Dà lơgar bal mờ Ƀộ Kwang àng, ală kấp, gah lơh broă tàm ƀòn lơgar. Geh hìu ơm niam, bol añ rơ̆p rơ̆p tơrgùm lơh broă bal, ròng oh kòn lòt bơsram”.

Bè đah ală càr Tây Nguyên, tŭ do là jơh Đah jum Tàm gùl lơgar dê, broă tàm nggùl nam pal lơh jăt broă bơsong gơkòl sră nggal ù tiah, hòi jà tă priă, cau lơh broă nàng lơh rơlao 20 nơm hìu, là bơta kal ke ờ hềt tŭ lơi geh. Mơya broă lơh jăt geh cồng nha broă lơh do, kung cèng geh ală tiah in ală broă lơh mờng chài kwơ màng nàng geh nùs nhơm pin dờn pơn jăt tai lơh geh cồng nha ală kơnòl broă tàm tơngai tus. Đại tá ồng Nguyễn Văn Dũng, Phó Kwang Lam bồ Kwang àng càr Lâm Đồng pà git bè ală broă lơh ngan bơh mpồl kwang àng dê tàm broă lơh jăt kơnòl broă dơ̆ lĕ bal, gàr niam bơta lơngăp lơngai tàm ƀòn lơgar, mờ hòi jà uă ngan mpồl lơh broă, phan lơh broă nàng tus bal dong kờl làng bol lơh hìu ơm.

Mờ nùs nhơm lơh ngan tàm broă sồr lơh bal mờ broă tus ndrờm bal bơh gùt mpồl lơh broă, khà broă lơh dờng neh geh lơh gơs tàm tơngai ờ jŏ. “Broă lơh jăt do Mpồl Lam bồ lơh pràn ngan. Mùl màl, 5 nă kwang bàng, tàm hơ̆ geh Kwang lam bồ mờ 4 Phó Kwang lam bồ ndrờm là cau atbồ mpồl lơh broă, tus tơn lam lơ, lam mpồl lơh broă tàm ală mpồl nàng dong kờl lơh hìu làng bol in. mờ sồr geh broă tus bal bơh jơh ală mpồl lơh broă; tàm hơ̆, sồr Kwang àng ală sàh, sơnah ƀòn tus bal nàng Anih duh broă Làng bol ală sàh hòi jà jơh gùt mpồl lơh broă cíñ trị, ală thôn, ƀòn bal mờ jơh cau pròc mhàm, ƀòn lơgar rềp bal bơh làng bol dê tus bal, tus bal dong kờl lơh jăt broă tơn jơh hìu sèt”.

Tàm ală ngai rơcang tơrmŭt bal càr, sàh mờ rơcang broă lơh bơh gơnoar atbồ ƀòn lơgar 2 kấp, kung là tơngai mhar ngan bơh broă lơh tơn jơh hìu sèt dê. Tổng Ƀí thư ồng Tô Lâm neh tus còp mờ lơh broă tàm ờ uă càr tiah Tây Nguyên.

Tổng Ƀí thư ai geh gùng dà broă lơh mờ sồr loh: Bơ̆t bơtàu Đảng pal pơgồp bal mờ sền gàr niam dà lơgar lơngăp lơngai mờ bơtàu tơnguh lơh sa mpồl bơtiàn kơl jăp. Mờ broă lơh tơn jơh hìu sèt, hìu ồm ñhăt dà mìu mờ ală càr gam jal mhar lơh, Tổng Ƀí thư đơs nền, do là ală broă lơh rài kis broă lơh broă sa mpồl bơtiàn dê, mờ là broă lơh bơh nùs nhơm pin dờn, den tàng Tây Nguyên sơlơ pal lơh ngan:

“Lơh hìu làng bol in ơm den làng bol chờ hờp ngan. Rài kis bơh làng bol sơlơ gơguh uă den sơlơ tơnguh tai bơta pràn sền gàr dà lơgar lơngăp lơngai. Làng bol ngai sơlơ pin dờn tàm Đảng, Dà lơgar dùl nùs dùl nhơm jăt Đảng den bơta pràn tam klăc jơi bơtiàn, tam klăc làng bol ngai sơlơ gơguh. Jơnau kờñ hơ̆ pal geh lơh niam”.

Nhai poh kis git jơnau git adăt, nhai 8 tơnkah Kăc màng geh cồng nha, nhai 9 chờ hờp tơnkah 80 nam Sơn tờm dà lơgar mờ ală ƀòn tiah Tây Nguyên pa neh geh rơlao 20 rơbô nơm hìu pa ai ală kwang kwơ màng do in. Tàm ală hìu ơm pa kơl jăp bơh să tờm dê, làng bol tàm gùt Tây Nguyên sơlơ geh tai nùs nhơm pin dờn bal mờ gùt lơgar mŭt tàm tơngai rơndăp tăp sèng wơl dà lơgar, mŭt tàm rài brồ să bơtàu tơnguh.

Sền jơnau cih dơ̆ 1 mờ dơ̆ 2 tềng do:

Jơnau cih dơ̆ 1: https://vov4.vov.vn/kho/cing-sac-mo-rai-kis-chinh-sach-va-cuoc-song/ton-joh-hiu-ing-hiu-om-set-nhat-da-miu-bot-botau-bota-pin-don-tam-ala-bon-tay-nguyen-492151.vov4

Jơnau cih dơ̆ 2: https://vov4.vov.vn/kho/cing-sac-mo-rai-kis-chinh-sach-va-cuoc-song/jonau-cih-do-2-bota-pran-hoi-ja-nus-nhom-niam-kop-kon-loh-broa-boh-broa-ton-joh-hiu-set-492318.vov4