Tàm hìu ơm bơh Mè Việt Nam khin cha jak chài Võ Thị Đủ (97 sơnam), ơm tàm sàh Đông Sơn, càr Quảng Ngãi, hô hơng săp tơm bơh bơr, săp ñiŏ. Ngai lơi, ală kwang bàng, cau ling Gah đơng lam Mpồl ling klàng càr Quảng Ngãi, Mpồl đơng lam Ling klàng sàh, mpồl ling griăp ƀòn mờ đoàn viên ơruh pơnu tàm ƀòn lơgar tus lùp còp, tơm bơh bơr, dong kờl mè Võ Thị Đủ pơs wàs hìu đam. Bơklau mờ 2 nă kòn bơh mè dê ndrờm tus bal ală dơ̆ tam lơh sền gàr Dà lơgar mờ chơ̆t phi să tàm tiah tam lơh. Tŭ Dà lơgar ring lơngai, Mè Võ Thị Đủ sùm dờp geh bơta dong kờl, sền gàr sùm bơh kwang bàng, cau ling tiah ƀòn lơgar dê. Mè Võ Thị Đủ đơs:“Tŭ do mè kra ờ pràn, ờ jai lòt tiah lơi tai mờ ờ gơtùi lơh broă lơi ờ. Kơnờm oh mi mpồl ling dong kờl ai Mè in hìu đam rơngđiàs niam, kàl do trồ tơngai duh tơr ồl ngan den tàng klo ngai là pal ndơ̆p mpồng. Mờ tŭ bĭc den kơlôi tàm bồ tơngoh tơl bơta do bơta ne. Ngai do geh oh mi tus còp ai bơta do, bơta ne mờ rcang lơh niam hìu đam mờ kơlôi rcang ai he in bơta do, bơta ne, Mè ưn ngài mờ chờ hờp uă ngan”.

Càr Quảng Ngãi, rlau 6 rơbô 800 nă mè geh jàu pà, sền sơ wì pà sră Mè Việt Nam khin cha jak chài, tŭ do 106 nă Mè gam kis. Tàm hơ̆, Gah đơng lam Mpồl ling klàng càr Quảng Ngãi dờp ròng siam jơh rài kis ai 21 nă Mè. Ală nam pa do, kwang bàng, cau ling mpồl ling phàu crong càr Quảng Ngãi sùm lơh jat niam broă lơh sền gàr, ròng siam mè Việt Nam khin cha jak chài, cau geh màng mờ Dà lơgar, ală hìu bơnhă dờp bơta dong kờl bơh mpồl bơtiàn dê. Ồng Lê Văn Công, Phó Đơng lam bồ, Mpồl đơng lam Mpồl ling klàng sàh Đông Sơn, càr Quảng Ngãi pà gĭt:“Añ gŏ bơh broă lơh do geh kwơ uă ngan, dong ai rơnàng kơnòm să tŭ do in gĭt wă geh ală bơta kwơ, bơta phi să roh rui bơh ală Mè dê kung bè ală bi, ală wa neh chơ̆t phi să nàng ai geh lơngăp lơngai is ai Dà lơgar in. Bơh ală broă lơh do là kờñ pal geh uă ngan ai rơnàng kơnòm să bol añ in, nàng ai rơnàng kơnòm să bol añ in dùl dơ̆ tai geh kah ưn ngài mờ hơ̆ kung là jơnau tơngkah rơnàng kơnòm să bol añ geh broă lơh geh kwơ mờ geh kơnòl broă uă rlau tai”.

Ală mpồl lơh broă tàm mpồl ling phàu crong càr Quảng Ngãi neh mờ gam pơgồp bal mờ ală gah broă geh gơnoar nàng tơrgùm bơsong di tŭ, tơl làm ală broă dong kờl bơh Dà lơgar, bơh càr dê gơwèt mờ ală cau dờp geh bơta dong kờl bơh mpồl bơtiàn dê. Broă lơh lòt jòi, tơrgùm ƀồc ntìng cau ling chơ̆t màng uă nam do kung geh Đảng ủy Gah đơng lam Mpồl ling klàng càr dê is ồn sền gròi. Bơh bồ nam tus tŭ do, Mpồl broă lơh gơwèt Gah đơng lam Mpồl ling klàng càr Quảng Ngãi neh dờp, sền sơwì, sồr bơsong broă dong kờl ai 24 sră nggal cau ling sồt să gam gơ kòl tơnơ̆ dơ̆ tam lơh, bơto pơlam lơh nền sră nggal, sồr dờp cau ling chơ̆t màng.

Bơdìh hơ̆, Gah đơng lam Mpồl ling klàng càr Quảng Ngãi pơgồp bal mờ ală Ƀộ, gah broă mờ ƀòn lơgar geh gơrềng nàng sền gĭt jơnau yal mờ kơ̆p kờñ ai ală phan lời kir sơnrai bơh cau ling chơ̆t màng dê rê mờ hìu bơnhă mờ cau pròc mhàm bal. Mpồl ling neh jàu 20 sră nggal phan lời kir sơnrai tus mờ cau pròc mhàm hìu bơnhă dê.

Mờ nùs nhơm ưn ngài uă ngan bơh ală rơnàng bèp bi lòt lài, ală ngai do, kwang bàng, cau ling mpồl ling phàu crong càr Quảng Ngãi bơyai lơh uă broă lơh geh ngan sền gròi ai ală hìu bơnhă cau ling sồt să, cau ling chơ̆t màng; lam lòt còp, kham kòp, pà sơnơm ờ sa priă ai ală hìu bơnhă dờp bơta dong kờl bơh mpồl bơtiàn dê, cau geh màng mờ Dà lơgar tàm ù tiah càr dê. Đại tá ồng Võ Tấn Tài, Cíñ ủy Gah đơng lam Mpồl ling klàng càr Quảng Ngãi đơs nền:“Broă lơh dong kờl kis gĭt jơnau gĭt adat geh Đảng ủy Mpồl ling klàng càr sền gàr ngan. Tàm tơngai pa do kung neh lơh uă hìu bơta nđàc, hìu dong kờl mờ is ồn sền gròi tus ală cau tŭ do hìu đam gam ơm ing, tàm hơ̆ geh ală hìu gam duh khoai ală cau ling chơ̆t màng, lam ală mpồl lòt còp mờ kah ưn ngài ală cau do”.