Mho ngai 30/07, tàm sơnah ƀòn Pleiku (càr Gia Lai), Ƀộ Kwang àng bơyai lơh broă lơh tơn jơh srơh “Tơn jơh hìu lơh ing, hìu ồm sèt ñhăt dà mìu” tàm ù tiah ală càr tiah Tây Nguyên nam 2025. Bơh bồ nam 2025 tus tŭ do, mpồl Kwang àng neh lam lơh pa, lơh niam wơl mờ lơh kơnhăp 6 rơbô 370 nơm hìu pà ai hìu bơnhă rƀah, hìu bơnhă pa lik klàs rƀah tàm ală càr Gia Lai, Lâm Đồng mờ Quảng Ngãi.

Mờ kờp jơh priă tă lơh gơguh tus rlau 355 tơmàn đong, broă lơh neh cèng wơl ai gĭt nđờ rơbô hìu bơnhă in geh tŭ tơngai niam ơm kis lơngăp lơngai, pơgồp bơnah kwơ màng tàm bơta kơ̆ kơl jăp mờ bơtàu tơnguh lơh sa- mpồl bơtiàn tàm tiah Tây Nguyên. Tàm càr Gia Lai, srơh dờp geh bơta lơh jat jrô ơnàng làm uă bơh kwang bàng, cau ling Kwang àng càr, mờ rlau 5 tơmàn 400 tơlak đong bơh pơgồp bal priă nhai, hòi jà tă pơgồp tai 2 tơmàn 780 tơlak đong bal mờ gĭt nđờ rơbô tấn phan bơna bơt bơtàu bơh mpồl bơtiàn dê lơh bal. Mìng tàm bàr pe nhai, mờr 6 rơbô 400 nơm hìu rơng điàs niam neh geh mpồl Kwang àng ală kấp lơh tàm ală ƀòn lơgar Tây Nguyên, cèng tus bơta chờ hờp, bơta tam gơl loh làng tàm tơl hìu bơnhă dê.