Tàm ƀòn Bu Ndrung, sàh Đức An, càr Lâm Đồng, ală cau chài gam tơrgùm lơh gơs hìu pa bi Điểu Phạm Dương (kòn cau Mnông) in. Bơh broă lơh mờng chài uă nam lòt lơh hìu cau in, bi Dương “mblàng yal” bè hìu gơboh gơbài să tờm dê, geh lơh bơh broă dong kờl bơh Ƀộ Kwang àng mờ hìu nhă tă pơgồp bal tai: “Hìu do geh lơh jăt nùs nhơm kờñ añ dê, mờ kờp jơh ơnàng tus 77 thơ̆k vuông. Tàm hìu bềp mờ jơdŭ wă năc geh dra, tơnơ̆ do geh priă blơi ti vi ơn tềng do. Hìu bềp là anih nàng trŭ sa hìu nhă in. Gam mpồng lik đah tơnơ̆ do do, là tiah nàng lơh hìu jă brê tam cah is”.

Sùm geh măt tàm ală broă lơh tơn jơh hìu sèt tàm ƀòn bè dùl “nă cau jăt sền”, Kwang ƀòn Điểu Khuy, ƀòn Bu Ndrung, sàh Đức An pà git, làng bol tàm do kis tam klăc bal uă ngan: “Geh Đảng, Dà lơgar sền gròi dong kờl, den làng bol bol añ iang nùs ngan mờ chờ hờp. Làng bol bol añ tàm ƀòn Bu Ndrung do, tŭ lơi geh broă dờng ndrờm tus còp să bal mờ dong kờl bal uă ngan. Bè lơh hìu do; cau lơi geh tơngai den tus dong kờl, cau lơi geh phan den dong kờl phan nàng lơh hìu”.

Tàm tiah pôs đồng kăc màng sàh Nâm Nung, uă hìu sèt, hìu ồm ñhăt dà mìu kung gam rơhời geh ala mờ ală hìu pa dờng niam. Bi Y Kram, kis tàm ƀòn Jarah đơs “jơh rài kis mìng lơh hìu dùl dơ̆, geh Dà lơgar dong kờl den tàng pal lơh ngan lơh kơl jăp”: “Neh lơh hìu, bŭ lah kal ke mơya lơh ngan kơl jăp, nàng oh kòn in ơm niam; tài lơh nàng ngui jơh rài kis. Añ lơh ngan càn tai priă, tơnơ̆ do tơm wơl oh mi in. Hìu nhă kal ke, geh Dà lơgar dong kờl 60 tơlăk đong; oh mi ƀòn lơgar dong kờl, hơ̆ sồng lơh geh hìu bè do. Nam pa do kơphe kung gơguh priă tăc, tềm pềr priă 2, 3 nam hơ̆ sồng lơh geh hìu bè do”.

Gam lŏ H’ Monh kung gŏ nùs nhơm chờ hờp tŭ geh hìu pa nàng ơm sơl: “Neh geh hìu ơm, pleh mờ mìu, mờ trồ tơngai duh añ chờ hờp ngan mờ iang nùs lơh broă nàng drơng oh kòn in lòt bơsram sră. Añ rơ̆p lơh ngan lơh broă sa nàng tềp pềr priă 2, 3 nam tai tơm oh mi, mè bèp in neh dong kờl añ lơh geh dùl nơm hìu kơl jăp bè do”.

Rềp tơn tềng hơ̆ sơl, hìu nhă cau ling yau Y Choi gam bơyai lơh ñô mŭt hìu pa tàm nùs nhơm chờ hờp. Tàm hìu geh lơh niam, wèt đah tơnao dà Nâm Nung mờ trồ tiah mrềt niam, cau ling yau Y Choi yal mờ nùs nhơm chờ hờp ngan: “Lài mờ tŭ lơh, añ ơm tàm hìu sèt lơh bơh nam 1989, mờr tơrlah. Geh Dà lơgar dong kờl priă lơh hìu dờng niam mờ kơl jăp bè do. Hìu nhă añ chờ hờp ngan mờ añ dan ưn ngài Đảng, Dà lơgar uă ngan”.

Nam 2025, tiah nhàr lơgar càr Lâm Đồng (Càr Dăk Nông lài do) dong kờl tơn jơh hìu sèt, hìu ồm ñhăt dà mìu ai 1 rơbô 755 hìu in. Ƀộ Kwang bàng kung neh dong kờl càr in priă lơh 500 nơm hìu ai làng bol in. Bơh tàm mùl màl lơh hìu ơm tàm ală ƀòn, mò H’ Thương, kis tàm sàh Nâm Nung, càr Lâm Đồng pà git: “Añ gŏ bơh Dà lơgar tus tàm sàh, broă lơh tơn jơh hìu sèt, hìu ồm ñhăt dà mìu geh cồng nha ngan. Tàm do, bol añ sền, jăt sền, lơh pràn di tơngai, di mờ jơnau geh ai. Thủ tướng Cíñ phủ neh sền gŏ làng bol ờ geh hìu ơm, pal lơh mơ. Tŭ do neh tus kàl mìu, kơlôi rơcang làng bol ờ geh hìu kơl jăp nàng ơm, Thủ tướng neh sồr lơh di tơngai, nàng làng bol in mŭt ơm, di tŭ ngan”.

Bơh ală gùng dà broă lơh di pal mờ broă tus bal bơh jơh gùt mpồl lơh broă cíñ trị dê, ală hìu pa geh lơh dờng niam gam ala ală hìu sèt, hìu ồm, cèng bal nùs nhơm chờ, kơ̆p kờñ bè dùl rài kis niam, hờm ram ai git nđờ rơbô hìu làng bol tàm càr Lâm Đồng in. Nùs nhơm tam klăc bal, tam pà bal bơh mpồl bơtiàn dê kung geh gŏ bơh tơl broă lơh hìu ơm, pơgồp bal tàm broă lơh geh uă nùs nhơm tàm dong kờl bal, ai tơngŏ nùs nhơm pơn dờn bơh làng bol dê gơwèt mờ Đảng mờ Dà lơgar. “Nùs nhơm chờ bơh ală cau rê ơm tàm hìu pa” gam lơh geh uă tàm ală ƀòn.