Lòt tus Anih tờm lơh broă sră pơ àr gơnoar atbồ dà lơgar sàh Ea Rôk, càr Dăk Lăk nàng lơh sră deh mờ yal mat kòn in, bi Đinh Thanh Hùng ơm tàm thôn 3 gơ lơh ờ mờng ngan, mờ gơ lơh kwi kuơ mờ broă lơh tàm điện tử gam geh lơh. Tơnơ̆ tŭ ală đoàn viên ơruh pơnu ơm lơh broă tàm do jơh nùs bơto pơlam, bi neh ƀuơn ngan lơh ală bơnah broă. Mìng tàm nđờ jơt phuk lơm, tơl bơta sră pơ àr neh lơh gơs dồ bă ƀuơn ngan. Bi Đinh Thanh Hùng yal: “Tơnơ̆ tŭ geh ală bơyô đoàn viên, ơruh pơnu pơlam den añ cih sră yal mờ lơh tàm mpồng broă drơng ala dà lơgar tàm điện thoại. Ală bơyô đoàn viên, ơruh pơnu dong kờl añ jơh nùs mờ mùl màl, ƀuơn wă den tàng añ kung git ngui mờ kah bơta chài lơh nàng ngui ai ală dơ̆ tơnơ̆ in”.

Tàm Anih tờm lơh broă sră pơ àr gơnoar atbồ dà lơgar sàh Ea Rôk, pah ngai sùm geh bơh 8 nă đoàn viên ơm lơh broă, dong kờl làng bol lơh ală sră pơ àr gơnoar atbồ tàm măi mok sồ. Mìng tàm rlau 1 nhai lam lơh, mpồl mờr 40 nă đoàn viên neh dong kờl git nđờ rhiang dơ̆ làng bol lơh rlau 150 sră nggal broă drơng ala dà lơgar, 200 sră ngai deh mờ yal mat sơnđan kòn in, sră kup bau, sră yal cau chơt, bal mờ git nđờ rhiang jơnau yal tơnggit dờp geh ngan geh tơmut tàm anih.

Bi Ngô Bảo Ngọc, đoàn viên tus bal dong kờl tàm do yal, pah ngai geh uă làng bol tus lơh ală sră pơ àr gơnoar atbồ. Uă cau là cau jơi bơtiàn dồ êt nă cau ờ hềt chài đơs dà yoan, ờ hềt geh tài khoản yal mat khà 2, geh tŭ geh cau ờ geh điện thoại ngac ngar halà ờ hềt git loh rơndap tap sèng sră pơ àr pal lơh: “Bol oh neh crăp rơcang dong kờl làng bol lòt tus kwang àng sàh Ea Rôk nàng lơh sồ yal mat mờ dong làng bol cih tàm ală sră yal tŭ lơh ală sră pơ àr dong làng bol lơh sră pơ àr tơn tàm măi tíñ halà tàm điện thoại bơh Anih duh broă Làng bol sàh dê”.

Ờ mìng dong kờl tàm ală anih tờm sră pơ àr gơnoar atbồ, ală mpồl ơruh pơnu lơh broă dong kờl is gam tus tàm ală ƀòn làng bol ơm kis, tus tơl hìu bơnhă, ngan là ală hìu bơnhă kis nă să is, cau dờng sơnam, cau jơi bơtiàn dồ êt nă cau nàng mblàng yal, tơmut phan bơna sồ, pơlam ngui ală bơta măi mok pờ tơlik tàm internet drơng rài kis mờ sră pơ àr gơnoar atbồ dà lơgar. Bi Ninh Tiến Đạt, Phó Ƀí thư Đoàn sàh Quảng Phú, càr Dăk Lăk yal: “Đoàn viên ơruh pơnu tus tàm hìu mblàng yal dong kờl làng bol tàm broă tơmut phan tơm priă tàm điện tử, lơh sră yal dia, ngui broă drơng ala dà lơgar pờ tơlik tơn tàm internet, bơh hơ̆ dong làng bol tơnguh jơnau git wă bè broă lơh gơnoar atbồ ƀòn lơgar 2 kâp kung bè ngui broă drơng ala dà lơgar pờ tơlik tàm internet ƀuơn rlau”.

Bơh bồ nhai 7 tus tŭ do, tŭ broă lơh gơnoar atbồ 2 kâp geh lam lơh ndrờm bal, Tỉñ đoàn càr Dăk Lăk neh hòi jà mờ gàr sùm 131 mpồl ơruh pơnu dong kờl tam gơl sồ, “Jơh gùt làng bol bơsram sră sồ”, tàm pơ dờn wơl bơh ală mpồl tam gơl sồ mpồl bơtiàn lài hơ̆. Ală đoàn viên, ơruh pơnu jơh nùs jòi git mờ ngui măi mok sồ tàm ală broă lơh dong kờl is. Bơh hơ̆ neh dong kờl gơtùi git nđờ jơt rbô dơ̆ làng bol tàm ală tiah ƀòn lơgar, tiah kơh bơnơm, tiah sar lơgar ngài, pơgồp bơnah tơrmù lơyah bơta yah ngài sồ mờ tơnguh pràn jak ngui broă drơng ala dà lơgar bơh làng bol dê.

Jat bi Lương Minh Tùng, Ƀí thư Tỉñ đoàn càr Dăk Lăk yal, tơngai tus, mpồl đoàn viên rơp pơn jat tai geh bơto pơlam jrô rlau nàng tơnguh mờng chài lơh broă, lơh niam rlau tai kơnòl broă dong kờl gơnoar atbồ mờ làng bol tàm tŭ tơngai tam gơl sồ: “Đal git anih lam lơh broă lơh dong kờl is là ală anih tờm sră pơ àr gơnoar atbồ dà lơgar tàm ală sàh, sơnah ƀòn, bè hơ̆ den tàng ală jơnau jrô ơnàng rơp uă rlau. Tỉñ đoàn càr kung neh lam lơh bơto pơlam ală tơngume bè tam gơl sồ. Kờp dŭ mờr tus den Mpồl lơh kơnòl broă sùm Tỉñ đoàn kung rơp jà ală cau geh jơnau git wă jrô mờ kwang đơng lam bồ ală sờh, gah broă lơh, pơlam jrô tàm ală broă tàm anih tờm broă drơng ala sră pơ àr gơnoar atbồ dà lơgar nàng ală bơyô mpồl tờm ngan in git mờ lam lơh ring bal, geh cồng nha”.

Mờ nùs nhơm geh kơnòl mờ bơta chài gơ dờp mhar mờ măi mok, mpồl đoàn viên ơruh pơnu Dăk Lăk gam rơ hời gơ gơs là rbàng tơrbŏ geh cồng nha ngan đah làng bol mờ gơnoar atbồ tàm tŭ tơngai bơt bơtàu gơnoar atbồ sồ, mpồl bơtiàn sồ, wèt tus jơnau kờñ tài dùl rài kis ƀuơn mờ pa rlau làng bol in.