Ồng Nguyễn Thành Công, Lam bồ Mpồl bơyai lơh broă lơh “Lơh broă tài mpồl bơtiàn”, tam pà bal bơh broă tus sền, mpồl lơh broă sền gŏ Kon Chiêng là sàh gơtìp kal ke ngan càr Gia Lai dê mờ rơlao 90% khà kờp làng bol là jơi bơtiàn ờ gal cau.

Mpồl lơh broă nùs nhơm dong kờl kơ̆p kờñ gơs che tơrbŏ bal, lơh geh uă nùs nhơm tam pà bal mờ làng bol kis tàm do. “Bol añ gŏ geh rài kis bơh làng bol tàm do kờñ ngan uă broă dong kờl mờ bol añ neh lơh ngan rơwah tiah do là anih tus. Bơta mờ bol añ gơlơh niam ngan hơ̆ là ală hìu lơh hờ đang, ală gùng ù mờ làng bol pal lòt gan pah ngai. Bol añ sền gŏ ală rơndeh Honda pal lòt mờ kong geh kơ̆t mờ che srĭ hơ̆ sồng gơtùi lòt gan tàm ală gơl gùng kơh mờ ù mbè, hơ̆ là bơta mờ bol añ pal lơh ngan nàng tus tàm tiah do”.

Broă lơh neh geh lơh ală broă lơh mùl màl, tơrgùm tàm ală gah broă lơh sơnơm, bơto bơtê mờ dong kờl rài kis bè: kham kòp, pơlam sền gàr bơta pràn kơl dang să jan mờ pà sơnơm ờ sa priă ai 500 nă làng bol in. Ai ngui “Hìu sền sră dong kờl lòt bơsram”, pà sră măi, sră cih, phan bơsram, ào, mpha pa ndrờm bal; mŭt lơh 2 tơrlung dà, lơh 1 nơm hìu nùs nhơm… Kờp jơh priă tă 850 tơlăk đong. Oh Hà Hoàng Phú, kis tàm ƀòn Thương, bơsram ơdŭ 6D ngoh rơngăc đơs: “Kòn geh kham kòp, pà sơnơm mờ dờp phan pà, kòn ưn ngài ală wa, mlŏ tàm mpồl lơh broă nùs nhơm dong kờl uă ngan”. 

Broă lơh “Lơh broă tài mpồl bơtiàn” dơ̆ 31 neh hòi jà geh 130 nă cau tus bal. Lŏ Bùi Thị Minh Phương, cau bơsram dờng tàm Hìu bơsram Đại họk Y Dược ƀòn dờng Hồ Chí Minh đơs là, dơ̆ lòt do rơ̆p là dùl dơ̆ lơh broă pal kah sùm bơh lŏ dê, git nùs nhơm niam, dùl nùs nhơm lơh ngan pràn kơl dang ai broă lơh bơh lŏ dê tàm broă sơm kòp cau kòp in. “Ngoh rơngăc ngan tŭ lòt 12 jơ hơ̆ sồng tus, bơh ală gùng kơh gùng koèl, brê bơnơm hơ̆ sồng tus tàm anih kham kòp. Nùs nhơm añ dê ngoh rơngăc ngar, kờñ ngan cèng geh uă sơnơm mờ nùs nhơm niam tus mờ làng bol tàm do”.