Mpồl neh lòt còp tiah tềl kah yau dà lơgar tàm sàh Đồng Xuân, tiah crơng gơs Ci ƀộ Đảng Kộng sản sơn rờp bơh càr Phú Yên yau dê mờ Tiah tam lơh kac màng H9 tàm ƀòn Dăk Tuôr, sàh Cư Pui, càr Dăk Lăk. Di dơ̆ do, mpồl neh jàu pà 30 nơm rơndeh coh mờ uă blah àu mpha pa ai kơnòm bơsram geh rài kis kal ke in bal mờ 236 bơnah phan pà tus ală hìu bơnhă geh dờp bơta dong kờl mpồl bơtiàn dê, làng bol jơi bơtiàn dồ êt nă cau, cau geh bơngă pin dờn. Broă lơh do nàng kờñ tam pà bal kal ke, pơgồp bơnah tơnguh niam rài kis làng bol in, mờ kung sơlơ bơrkuăt kơ̆ rlau tai bơta gơ rềng đah cau ala mat Quôk hội mờ cau tĕ khà, ai tơnggŏ bơta sền gròi bơh Đảng mờ dà lơgar dê gơ wèt mờ tiah sar lơgar ngài.