Chờ gờm pràn kơl dang să jan ală cau ling sồt să, cau ling kòp tê jê să, Củ tịc Anih duh broă Mặt trận Dà lơgar Việt Nam ồng Đỗ Văn Chiến đơs, ală nam do, Đảng mờ Dà lơgar sùm ai broă sền gròi dờng màng ngan gơwèt mờ ală cau ling sồt să, cau ling kòp tê jê să, hìu nhă geh sră dong kờl, cau geh màng mờ dà lơgar.

Ồng Đỗ Văn Chiến tơlik nùs nhơm kơ̆p kờñ ală cau ling sồt să, cau ling kòp tê jê să sùm gàr niam nùs nhơm pin dờn, kis chờ, kis pràn kơl dang; pơn jăt tai tơnguh gơnoar, di pal cau Ling Wa Hồ dê, lam lài, pơlam oh kòn lơh ngan bơ̆t bơtàu hìu nhă gơboh gơbài, tus bal tài broă bơtàu tơnguh ƀòn dờng Hải Phòng bal mờ dà lơgar dê.