Bơh ală ngai bồ nhai 7, tàm sơnah ƀòn Xuân Hương - Dà Làc, càr Lâm Đồng, cau kơnòm să sơnah ƀòn do neh jơh nùs lam lơh ală broă lơh “Kis git jơnau git adat”, lùp còp, pơn dờm pơnđiang hìu bơnhă dờp bơta dong kờl mpồl bơtiàn dê; pơs wàs, chu ñàng tàm ƀlàng tơp ƀồc cau chơt màng. Bi Nguyễn Thị Thúy, Ƀí thư Ci đoàn Tổ zân phố 9 pà git, do ờ mìng là broă lơh kah ưn ngài mờ gam là jơnau bơto bơtê niam ngan bè nùs nhơm kờñ gơboh dà lơgar mờ kơnòl bơh cau rơnàng kơnòm să tŭ do dê: “Bol hi neh pơgồp bal mờ Mpồl đơng lam bơh tổ zân phố mờ sơnah ƀòn dê lòt còp ală hìu bơnhă dờp bơta dong kờl mpồl bơtiàn dê tàm sơnah ƀòn nàng dong ală ơruh pơnu in gơtùi ai tơnggŏ nùs nhơm kah ưn ngài tus ală rơnàng bèp bi lòt lài. Bơdìh mờ ală broă lơh hơ̆ den bol hi gam pơs wàs, chu ñàng tàm ƀlàng tơp ƀồc cau chơt màng. Ală dơ̆ bè do pah nam den là tŭ niam ngan nàng bol hi bơto bơtê nùs nhơm kờñ gơboh dà lơgar mờ nùs nhơm geh kơnòl ai ală bơyô đoàn viên ơruh pơnu tàm sơnah ƀòn bol hi dê in”.

Ai tơnggŏ nùs nhơm kah ưn ngài uă ngan tus ală rơnàng bèp bi lòt lài tài broă lơh tam lơh tơngklàs jơi bơtiàn, sền gàr dà lơgar mờ bơt bơtàu dà lơgar tŭ do, tàm ală ngai do, Đoàn sơnah ƀòn Xuân Hương – Dà Làc hòi jà cau kơnòm să tus bal dồ ròt ală broă lơh ngan ngồn, lơh gơ rề nùs nhơm “Hùc dà kah tô dà”. Ƀí thư Đoàn sơnah ƀòn bi Thái Thị Thu Thắm pà git, ală broă lơh neh dờp geh bơta tus bal jơh nùs, geh kơnòl bơh 106 ci đoàn dê bal mờ rlau 5 rbô nă đoàn viên ơruh pơnu: “Di tơngkah 78 nam Ngai Cau ling sồt să – Cau chơt màng, 100% ală ci đoàn pa do kung neh lam lơh ală broă lơh kung bè bơnah broă bè ai cau wàs kloh niam tiah ơm kis, ai cau jì wàs ƀlàng tơp ƀồc cau chơt màng; lam lơh ală broă lơh lùp còp ală hìu bơnhă cau geh màng mờ dà lơgar, hìu bơnhă dờp bơta dong kờl mpồl bơtiàn dê tàm sơnah ƀòn. Bơdìh hơ̆ tai, mpồl đoàn viên, ơruh pơnu gam dong kờl hìu bơnhă cau geh màng mờ dà lơgar git kung bè bơsong ală bơta sră pơ àr gơnoar atbồ mờ hìu bơnhă ờ hềt gơtùi lơh”.

Ală broă lơh ngan ngồn bơh cau kơnòm să Đoàn sơnah ƀòn Xuân Hương – Dà Làc dê đơs is mờ cau kơnòm să càr Lâm Đồng dê đơs bal tàm ală ngai nhai 7 neh cèng wơl bơta chờ hờp, ngoh rơngac tus uă cau ling yau, cau ling sồt să, ală cau neh lời jơh tŭ tơngai kơnòm să he dê ai ring lơngai, lơngăp lơngai is bơh jơi bơtiàn dê in. Ồng Phan Xuân Khanh, 74 sơnam, cau ling sồt să khà 3/4 ngoh rơngac đơs: “Ală wa kung neh dờng sơnam, neh jơh sơnam rê rlô lơh broă mơya tus ngai 27/7 den tàm nùs cau lơi kung ngoh rơngac ngan tài do là ngai gùt lơgar kah mờ ưn ngài ală cau neh tam lơh huĭ să tờm ai dà lơgar in. Mờ gơtùi geh ngai do, là kơnờm bơta phi să, bơta tă pơgồp bơh ală cau khin cha jak chài, ală hìu bơnhă neh tă pơgồp jơh nùs, tam lơh phi să tài lơngăp lơngai is, khat gơboh bơh dà lơgar dê”.

Càr Lâm Đồng geh rlau 21 rbô nă cau chơt màng, rlau 11 rbô nă cau ling sồt să, 2 rbô 460 nă mè Việt Nam jak chài (tŭ do gam 17 nă mè gam kis) bal mờ git nđờ jơt rbô nă cau geh màng mờ dà lơgar. Kah ưn ngài uă ngan tus ală bơta roh rui, phi să bơh rơnàng lòt lài dê, ồng Y Thanh Hà Niê Kđăm, Kwang geh jơng Đảng dà lơgar, Ƀí thư Tỉñ ủy càr, Lam bồ Mpồl cau ala mat Quôk hội khoă XV càr Lâm Đồng đơs nền, rơp pơn jat tai sền gròi tơl làm rlau tai ai ală hìu bơnhă dờp bơta dong kờl mpồl bơtiàn dê in: “Bol hi git là, ală broă lơi gơtùi lơh ờ hềt gơtùi tơm jơh ală roh rui, phi să dờng màng ngan bơh ală cau chơt màng mờ hìu bơnhă cau geh màng mờ dà lơgar dê. Bè hơ̆ den tàng tàm tơngai tus, Đảng ƀộ, gơnoar atbồ mờ làng bol tàm càr rơp pơn jat tai lơh ngan rlau tai nàng tơnguh niam rài kis phan bơna, nùs nhơm ai cau geh màng mờ dà lơgar in, ờ lời cau lơi gơtìp hoàc huơr, gơtìp lời wơl tàm tŭ bơt bơtàu mờ bơtàu tơnguh bơh càr he dê”.

Broă lơh kah ưn ngài ală hìu bơnhă dờp bơta dong kờl mpồl bơtiàn dê, cau pròc mhàm tờm cau chơt màng, cau geh màng mờ dà lơgar tàm ală ngai nhai 7 tàm càr Lâm Đồng ờ mìng là tŭ nàng kah ưn ngài, mờ gam kờñ lơh gơlik tàm nùs tơl nă cau tàm càr, ngan là cau kơnòm să bơta kờñ gơboh dà lơgar, nùs nhơm pơn yờ să jơi bơtiàn, bơh hơ̆ kis niam rlau, geh kuơ rlau. Ală broă dong kờl ngan ngồn wèt tus ală kờñ dờp bơta dong kờl bè dong kờl hìu ơm, sền gàr pràn kơldang să jan, ai geh broă lơh, dong kờl rài kis ală hìu bơnhă dờp bơta dong kờl mpồl bơtiàn dê, cau pròc mhàm tờm cau chơt màng, cau geh màng mờ dà lơgar tàm càr Lâm Đồng gam pơgồp bơnah sền gàr mờ tàm pơn jat tai bơhiàn ờs mờng “Kis git jơnau git adat”, “Hùc dà kah tô dà” bơh jơi bơtiàn dê.