Tơnơ̆ uă nam kong mờ bơta rƀah, hìu bơnhă bi Rơ Lan Siu H’Hằng ơm tàm ƀòn Tu 1, xã Ia Ga, kơnhoàl Chư Prông neh ngan ngồn lik klàs rƀah. Bi H’Hằng pà git, hìu bơnhă bi geh 3 lồ tờm ƀạc đàn mờ bi kung geh uă jơnau kờp dŭ bơtàu tơnguh lơh sa. Mơya tài ờ geh priă bơcri den tàng sùm tàm uă nam pal kơlôi rơcang, bòl glar mơya rài kis ờ gơtùi bơtàu tơnguh. Pơgap mờ do 3 nam, hìu bơnhă bi geh dong kờl càn 50 tơlak đông bơh priă càn cíñ sác ai hìu bơnhă rƀah in, bi neh gơtùi lơh ală bơta mờ he kờñ. Kơnờm chài rơgơi tàm broă kờp dŭ lơh sa, tŭ do, bi neh lơh geh priă jền bơh 40 tus 50 tơlak đông pah nam bơh bơtàu tơnguh lơh sa: “Lài do hìu bơnhă gơtìp uă ngan kal ke, kờñ blơi phan ròng mờ tam ală bơta chi tam mơya ờ geh priă. Tơnơ̆ tŭ geh càn priă bơh ngân hàng cíñ sác dê den càn 50 tơlak đông, blơi 1 nơm kơnrồ, tam tai kơphê mờ sơngka sền gàr tờm ƀạc đàn. Tŭ do, priă lơh geh bơh 40 tus 50 tơlak đông pah nam”.

Ndrờm bè hơ̆ sơl, nam do, hìu bơnhă bi Ksor Tứ ơm tàm ƀòn Choanh, xã Uar, kơnhoàl Krông Pa chờ hờp ngan tài neh lơh geh hìu pa. Bi pà git, pơgap mờ do 3 nam, kơnờm geh dong kờl ai càn 40 tơlak đông bơh priă cíñ sác, bi neh tă priă nàng tam tàu, blơi tai kơnrồ nàng bơtàu tơnguh lơh sa. Tơnơ̆ 3 nam, bi neh tơm jơh priă dồs, lơh geh hìu mờ geh mpồl kơnrồ 5 nơm. Bi chờ hờp đơs: “Lài do, hìu bơnhă añ dê kis tàm hìu sèt ing lơm. Dà lơgar dong kờl ai càn priă cíñ sác nàng lơh sa, añ neh lơh geh hìu. Tŭ do, hìu bơnhă añ dê neh kơ̆ kơljap đau, añ lơh ngan nàng bơtàu tơnguh lơh sa”.

Tŭ do, kờp jơh dồs ai càn bơh Ngân hàng Cíñ sác xã hội sơnĕ càr Gia Lai dê là rlau 7 rbô 700 tơmàn đông mờ 153 rbô 925 nă cau càn. Mìng is nam 2023 pa do, Ngân hàng Cíñ sác xã hội sơnĕ tàm càr Gia Lai geh priă ai càn là 1 rbô 700 tơmàn đông, mờ rlau 41 rbô 500 dơ̆ cau càn. Tàm hơ̆, khà cau càn là hìu bơnhă rƀah, hìu bơnhă làng bol jơi bơtiàn dồ êt nă cau geh dờp ală bơnah priă càn jat Nghị quyết sồ 11 bơh Cíñ phủ dê bè ai càn priă lơh hìu ơm mpồl bơtiàn, càn priă bơtàu tơnguh lơh sa- mpồl bơtiàn ai làng bol jơi bơtiàn dồ êt nă cau in là rlau 13 rbô hìu bơnhă. Ồng Đinh Văn Nghĩa – Phó Kwang atbồ Ngân hàng Cíñ sác xã hội càr Gia Lai pà git: “Ngân hàng Cíñ sác xã hội sùm sền dờng màng broă lam lơh ală broă lơh ai càn priă cíñ sác ai làng bol jơi bơtiàn dồ êt nă cau in tàm ală tiah. Bol hi neh pơgồp bal jơh nùs mờ ală kâp, ală gah broă mờ ală tiah nàng jòi git bè jơnau kờñ mờ bơta geh ngan bơh ală hìu bơnhă rƀah, hìu bơnhă ndrờm bè cau rƀah, làng bol jơi bơtiàn dồ êt nă cau mờ hìu bơnhă geh sră dong kờl ndai nàng ai tơlik ală broă rơndap lơh, broă jàu mờ tơl khà tam pà priă càn ai ală tiah in jat bơta geh ngan kal ke mờ jơnau kờñ bơh làng bol dê dồ bă dipal mờ geh cồng nha”.

Bơnah priă càn bơh Ngân hàng Cíñ sác xã hội dê neh pơgồp bơnah dong kờl ală hìu bơnhă rƀah, hìu bơnhă ndrờm bè cau rƀah mờ hìu bơnhă làng bol jơi bơtiàn dồ êt nă cau tàm càr Gia Lai gơtùi bơsong ală kal ke tàm rài kis, bơtàu tơnguh lơh sa, brồ guh lik klàs rƀah kơ̆ kơljap jŏ jòng sùm.