Tơnơ̆ mờ 3 nam lơh jăt broă kŭp jàm neh rê tàm ƀòn Tôr 1, xã Glar, kơnhoàl Đăk Đoa, nhai 10 nam 2023 lài do, bi Trôl neh geh mpồl ai càn priă bơh xã, bal mờ gơnoar atbồ xã ring bal yal mờ dong kờl ai càn 50 tơlăk đong. Geh priă bi neh tă 10 tơlăk đong blơi 2 nơm kơnrồ nàng ròng geh phơng mờ deh kòn. 40 tơlăk đong priă gam tai, bi bơcri tàm broă tam wơl 2 lồ suơn kơphe. Bi pà git, bi gơlơh ngoh rơngăc ngan tài geh gơnoar atbồ sền gròi, dong kờl. Bi Trôl đơs: “Añ là cau tìs mờ adăt boh lam, mơya kung gam geh sền gròi mờ dong kờl añ. Añ geh ngui priă do nàng sơnka sền gàr suơn kơphe. Añ kơ̆p kờñ geh bơta niam nàng tơm wơl priă gờñ ngan ai dà lơgar in”.

Ờ ru mờ broă ìs kơphe tàm ƀlàng, lŏ Lê Thị Tuyết Nhung kis tàm mpồl 2, thôn 3, xã Nam Yang, kơnhoàl Đăk Đoa pà git, 2 tấn kơphe do lŏ pa blơi bơh làng bol tàm xã dê, kơnờm mờ priă càn bơh Ngân hàng Cíñ sác. Pơgăp mờ do 2 nhai, tơnơ̆ mờ tŭ neh lơh jăt broă lòt jàm rê tàm hìu, lŏ ờ git bè lơi mờ sơn đờm lơh bơh bơta lơi, tài nùs nhơm ngòt ƀàs sìl, mờ tài ờ geh priă nàng lơh broă sa, den geh gơnoar atbồ xã bal mờ mpồl kwang àng dong kờl lơh ală sră nggal, yal lŏ in geh càn 100 tơlăk đong priă sa priă cồng ờ uă. Mờ sơbăc tàm lơh broă, lŏ neh ngui priă do nàng tam mờ blơi tăc kơphe tơn tàm kàl pa. Lŏ Nhung pà git tai: “Añ kơlôi ngui priă nàng tam kơphe, dơ̆ bàr tai là lời priă nàng blơi, tăc phan pah ngai. Añ pin dờn mờ khà priă do, añ geh lơh broă niam. Mờ kơ̆p kờñ priă do tus do geh ngui ai ală cau ndrờm bè añ dê sơl nàng geh priă lơh broă sa”.

Thiếu tá Trần Thị Luận, Phó kwang atbồ Mpồl Lơh jăt broă lơh glài kŭp màng mờ dong kờl adăt boh lam, drơng broă tơrgùm wơl mờ mpồl bơtiàn, Kwang àng kơnhoàl Đăk Đoa pà git: Tơnơ̆ mờ tŭ Kơrnoăt sồ 22 nam 2023 bơh Thủ tướng Cíñ phủ geh lơh tàm càr, bơh nhai 10 tus nhai 12 nam 2023, Kwang àng kơnhoàl Đăk Đoa neh lơh ngan pơgồp bal mờ Ngân hàng Cíñ sác sền wơl, ai git nàng dong kờl cau lơh jăt broă kŭp jàm neh rê tàm hìu nhă mờ ƀòn lơgar tàm 5 nam tus hờ tŭ do. Bơh tŭ hơ̆, neh geh 45 nă cau geh dong kờl priă tơn tàm nam 2023, mờ khà priă geh bơh 70 tus 100 tơlăk đong tàm 1 nă. Kờp dŭ tàm nam pa 2024, broă do geh pơn jăt tai lơh, lơh geh bơta kơl dìng, dong kờl cau neh gơtìp tìs gùng pin dờn rê tơrgùm bal mờ mpồl bơtiàn, mờ brồ guh lơh tờm tàm rài kis. Thiếu tá Trần Thị Luận đơs: “Añ sền niam ngan gơwèt mờ ngân hàng cíñ sác tàm broă dong kờl, tàm hơ̆ uă ngan là kwang bàng lơh broă ai càn priă jơh nùs ngan, sùm jăt sền mpồl càn priă, dong kờl lơh gơs sră nggal. Geh cau lơh gơs sră nggal mìng tàm bơh 1 tus 2 ngai, ală kwang bàng dong kờl lơh gơs nàng di tŭ bơcri priă ai ală cau in nàng bơtàu tơnguh lơh sa”.

Ală nhai lồi nam 2023 pa do tàm gùt càr Gia Lai gam geh git nđờ jơ̆t nă cau lơh jăt broă kŭp jàm neh rê tàm ƀòn kung geh dong kờl priă bơh broă lơh do sơl. Ồng Nguyễn Triều Quang, Phó kwang atbồ Ngân hàng Cíñ sác Xã hội càr Gia Lai pà git: lơh di gùng dà broă lơh ờ lời geh cau lơi gơtìp sơbì is hờ tơnơ̆ bơh broă lơh do dê, bơh nggùl nhai 10 nam 2023, ngân hàng sơn đờm lơh jăt broă ai càn priă.

Tàm rơlao 1 nhai, neh bơcri rơlao 4 tơmàn đong, ai mờr 100 nă cau geh tơl bơta in nàng càn priă. Mùl màl pà gŏ, priă do ndrờm geh ngui nàng bơcri tàm broă lơh sa suơn sre, kă bro dềt mờ bơsram broă lơh. Tàm tơngai tus bal mờ broă pơn jăt tai ai càn priă, ngân hàng pơn jăt tai pơgồp bal mờ gah, mpồl lơh broă, gơnoar atbồ xã sền gròi, lam sồr, dong kờl nàng cau càn priă ngui priă geh cồng nha, ai geh uă bơta niam nàng ală cau càn priă geh brồ guh tàm rài kis. Ồng Nguyễn Triều Quang đơs: “Tàm tơngai do, Ngân hàng Cíñ sác Xã hội neh pơgồp bal nền nòn mờ ală mpồl lơh broă cíñ trị mpồl bơtiàn dờp ai cau càn priă bal mờ gơnoar atbồ xã, kwang àng, git ală bơta, sền wơl jơnau kờñ bơh cau pa rê jàm dê. Tơngai tus, ngân hàng pơn jăt tai git ală bơta, lơh jăt broă rơndăp lơh bơh UɃÑZ càr nàng lơh jăt broă lơh do niam ngan”.

Broă ai càn priă gơwèt mờ cau neh lơh jăt tơngai lơh glài kŭp jàm jăt mờ Kơrnoăt sồ 22 ngai 17 nhai 8 nam 2023 bơh Thủ tướng Cíñ phủ dê là broă lơh nùs nhơm niam kòn bơnus dê. Broă gờñ lơh jăt mờ lơh geh cồng nha tàm càr Gia Lai neh pơgồp bal ngui nùs nhơm niam hơ̆, dong kờl ală cau neh gơtìp tìs geh anih kơl dìng kơ̆ kơl jăp rài kis mờ geh bơta niam nàng brồ guh wơl.