Tàm tiah hìu Jàm gơlăng Diên Khánh, tơnơ̆ tŭ măi chŏ ù tap bơh chờm, mpồl lơh broă geh gơnoar ngui wơu, kơ bià, phan ngui nàng tri mờ phan còr, nền nòn ai bơh tơl tap ù nàng sac rơ wah. Uă bơnah ntìng neh lề, gơ bơrlŭ bal tàm ù, den tàng khat dùl gơl ntìng, 1 nơm sề halà phan lời wơl lơi geh git gŏ kung gam pal sền nền nòn ngan.

Nàng git nền ală bă tiah digơlan geh ƀồc ntìng, mpồl lòt jòi jat tàm jơnau yal bơh ală cau neh geh tŭ kis mờ lơh broă tàm Gơlăng yau Diên Khánh dê. Dùl tàm ală khà hơ̆ là cau ling yau ồng Đinh Thanh Nhật, 63 sơnam, geh rlau 50 nam kis tàm tiah do. Ồng neh geh tŭ sền gŏ ală dơ̆ tam lơh gùt dar gơlăng mờ ală cau ling phi să:

“Trồ mang añ bic kung gam gơ tơngòr tŭ sền gŏ bơta hơ̆, ală cau Ling tơngklàs rê, ală cau ling roh mpha blờt gời, să jan bong jù jơh. Sơnđàc ngan. Tŭ phi să gam ƀồc bè ờs den bol ling rài atbồ yau yờ sang hờ rbàng, gam gơtìp mền blah să jan gơs uă bơnah den khi tờ trồm nàng tơp. Ờ git nền là bơtô ƀồc ơm tềng lơi, gŏ tềng lơi là khi tơp tềng hơ̆. Kah wơl bơta lơi den añ rơp yal tai ală anih lơh broă geh gơnoar in”.

Ồng Huỳnh Bửu Đông, 62 sơnam, geh rlau 40 nam đềt mềr mờ Hìu jàm Gơlăng Diên Khánh. Rlau 20 nam lài, tŭ gam lơh broă tàm gah kwang àng, ồng neh geh tŭ sền gŏ broă git gŏ 2 ƀồc ntìng tàm tŭ bơt bơtàu mờ bal mờ cau ling bal rồ tơrgùm wơl cèng rê tơp hờ ƀlàng tơp ƀồc. Tŭ do lam lơh Broă lơh dờng 500 ngai mang lòt jòi, rồ tơrgùm ƀồc ntìng cau chơt màng, ồng rê wơl tiah sền gŏ ƀồc ntìng nàng yal tai ală jơnau tơnggit. Nggui kềng gah tiah rồ tơrgùm, ồng Đông sền nền tơl tap ù geh tờ mờ sơñio yal ală bă tiah mờ ồng gam kah:

“Lài do, tiah do rềp pơng gàr gơlăng dê, mpồl ờ lơh bơta lơi, mìng tam biap lơm. Tơnơ̆ do tŭ mpồl lơh hìu, tŭ tờ bơnàng hìu den añ gŏ 1 ƀồc ntìng. Tờ den gŏ đah đơm gam geh 1 ƀồc ntìng tai, kờp jơh là 2 ƀồc ntìng”.

Ồng Lê Văn Thành, 70 sơnam, kis rềp Hìu jàm Gơlăng Diên Khánh bơh tŭ gam dềt. Ală bơta lơi ồng git bè hìu jàm là ală jơnau yal tơnggit geh kuơ ngan, gam geh yal mpồl lòt jòi, rồ tờ tàm do in:

“Hìu jàm do geh bơh rài Tây, tơnơ̆ tus rài Nguỵ, geh tŭ lơh glài gơ sơt să khi gam cuh tơn tềng hơ̆. Tiah do krơ̆ jàm ală cau lơh broă kac màng halà pin hìu bơnhă geh cau cộng sản, khi lam rê pù pờng lùp khàu, rơ wah tìs nàng lơh glài”.

Bơh lồi nhai 8, dơ̆ rồ tơrgùm sơn đờm, tàm 5 tiah git gŏ ƀồc ntìng mờ phan lời wơl. Tơnơ̆ hơ̆, bă tiah rồ tơrgùm geh rề ơnàng mờr 300 thơk vuông, pah ngai rlau 70 nă cau lơh broă. Măi chŏ ù mìng plồ tap ù đah hơđang; mù jrô rlau, mpồl lòt jòi pal tờ mờ tê, rơ wah tơl tap ù. Bơta jrô ờs mờng là bơh 2 tus 2 thơk mờ nggùl. Tơnơ̆ uă nam, ntìng neh ồm lề, den tàng broă tờ pal lơh lơyài, sền swì tơl tềl lời wơl. Tàm nggùl tap ù jù, dùl tềl tơnggŏ geh sền gŏ. Cau đơng lam kun bồ sền, hơ̆ sồng đơs:“Añ sền gŏ tềng do geh sề, trồ tiah lơi kuơmàng ngan. Cèng bồng bi tus ndo ơ oh mi”.

Dùl nha bồng bi geh tồt tềng bă tiah git gŏ. Wơu, kơ bià geh ala mờ phan ngui nàng tri mờ phan còr. Ù gùt dar tềl lời wơl geh tờ dơ̆ dùl êt nàng gàr wil tơl bơnah ntìng gam wơl.

Mò Ngô Thị Xuân, geh bèp là cau chơt màng Ngô Quang Trung chơt phi să tàm gơlăng Diên Khánh kung tus dong kờl dơ̆ lòt jòi sơl. Rlau 50 nam do, hìu bơnhă kung gam gơ chul nùs ngan tài ờ hềt jòi bàn ƀồc ntìng ồng dê. Mò yal tai jơnau tơnggit bè ală cau jàm kac màng neh geh tŭ tơp cau ling bal tàm do:

“Lài do añ kung jòi git, ală oh mi tàm hìu jàm geh jàu kơnòl là dilah geh cau lơi sang rài den cèng hờ tiah do, tờ ù nàng bồr wơl. Pleh broă bol sò tơm cèng ƀồc cau chơt sang hờ gah dà dờng Cái, rơngòt dà cò pơrdô. Cau ling bal tàm hìu jàm rơngòt roh ƀồc den tàng cèng bồr tơp tơn. Broă tờ tơp ờ jrô, bơh tŭ tơngai tài tuh tai ù den tàng jrô rlau. 15 nă cau roh thit tàm do”.

36 bă tiah neh git gŏ ƀồc ntìng, mơya jơnau yal tơnggit bè 15 nă cau roh thit tàm Hìu jàm Gơlăng Diên Khánh kung gam geh đal git. Rlau 50 nam neh lòt gan, ù digơlan gơ glòm jơh tềl lời wơl, mơya jơnau kah kir bè ală cau neh phi să kung gam sùm tàm hơ̆. Bơh ală jơnau yal wơl cau gam kis dê, mpồl lòt jòi pơn jat tai jòi tơl tềl lời wơl tàm dơlam Gơlăng yau Diên Khánh, mờ bơta kơp kờñ ƀuơn soh mơya dờng màng ngan, hơ̆ là lam ală cau neh phi să rê wơl mờ sơnam, mat sơnđan, ƀòn tờm mờ cau ling bal.