Do là ală jơnau hơ pơrgon bềng lìu bơta jơh nùs bơh M’Mên Teh, kòn cau M’nông là cau pa geh tơmut Đảng tàm ngai 22 nhai 12 nam 2023 pa do tàm ci ƀộ thôn Diêo, xã Bông Krang, kơnhoàl Lăk. H’Mên Teh pà git, geh mut Đảng là bơta pơn iờ să ngan mờ chờ hờp ngan tài ală broă lơh ngan, ală bơta pơn đơl pràn să tờm dê tàm tơngai lài neh geh cih dờp: “Oh geh mut tàm mpồl cau geh Đảng oh gŏ gơ lơh pơn iờ să ngan tài bơta do. Tàm 1 nam là đảng viên rơcang gàr lài do oh rơp pơn đơl pràn rlau tai nàng sơlơ tơnguh tai să tờm he in ală bơta niam bơh cau Đảng viên dê mờ pal lơh ngan rlau tai nàng 12 nhai tơnơ̆ oh gơ gơs là đảng viên ngan ngồn”.

Geh mut tàm mpồl cau geh Đảng bơh nam 2018, bi Lữ Thị Thái, kòn cau Thái, tŭ do là Đảng viên lơh sa jak bơh ci ƀộ ƀòn Thái, xã Bông Krang, kơnhoàl Lăk dê. Lam lài tàm srơh tam gơl rơndap tap sèng chi tam, phan ròng tàm ƀòn lơgar, tŭ do mờ broă lơh ròng kơnrồ lơmă, ròng tu ruồi brài, tam chi sa plai neh cèng wơl hìu bơnhă in khà priă lơh geh rlau 400 tơlak đông. Bơdìh hơ̆ tai, bi Thái sùm lơh krơh lài tàm ală srơh mờ ală dơ̆ hòi jà tàm thôn ƀòn bè ai is ù lơh gùng lòt ƀòn lơgar, lơh đèng sòl àng thôn ƀòn, lơh gùng bơkàu: “Là dùl nă đảng viên, añ sùm lơh krơh lài, lài ngan là hòi jà làng bol lơh jat niam gùng dà, broă lơh bơh Đảng, bơta dong kờl adat boh lam bơh dà lơgar dê, ai gơ wèt mờ să tờm añ den sùm lơh krơh lài bè tơl bơta. Lơh jat Nghị quyết sồ 05 bơh huyện ủy kơnhoàl dê den bol hi kung lam lơh jat ngan ngồn tàm rài kis, să tờm añ kung lơh lài nàng làng bol in đòm jat den tŭ do bơta tam gơl rơndap tap sèng chi tam, phan ròng tàm ƀòn là 70%, lài do tam kơphe den ờ gơ dờp mờ ù bràs tiah do, tam gơl den neh gơtùi, ai tŭ do den làng bol bơtàu tơnguh pràn ngan”.

Ờ mìng sền gròi tus tơmut Đảng ai cau jơi bơtiàn dồ êt nă cau in tàm tơl ci ƀộ, broă lơh tơmut Đảng là cau jơi bơtiàn dồ êt nă cau gơ jat bal mờ rơndap ngui kwang bàng là cau jơi bơtiàn dồ êt nă cau tàm ală anih lơh broă cíñ trị, anih lơh broă dà lơgar sùm geh Huyện ủy kơnhoàl Lăk sền gròi. Tus tŭ do, kờp jơh khà kwang bàng, công chức, viên chức là đảng viên cau jơi bơtiàn dồ êt nă cau tàm gùt kơnhoàl là 1 rbô 547 nă. Tàm hơ̆, kâp xã geh 227 nă. Bi Y Wu Sruk – Phó Củ tịc Ủy ƀan Ñân zân xã Yang Tao, kơnhoàl Lăk pà git, broă tơmut Đảng là cau jơi bơtiàn dồ êt nă cau gơ jat bal mờ ngui kwang bàng là cau jơi bơtiàn dồ êt nă cau ơm kis bơh jŏ tàm ƀòn lơgar neh gơtùi ngui niam bơta pràn bơh ală mpồl lơh broă Đảng tàm kâp hơ đơm. Bơh hơ̆, pơgồp bơnah uă ngan tàm jơnau kờñ bơtàu tơnguh lơh sa- mpồl bơtiàn tàm ƀòn lơgar; bal mờ hơ̆, broă lơh mblàng yal, hòi jà làng bol tàm ală thôn ƀòn lơh jat ală gùng dà, broă lơh, bơta dong kờl, Nghị quyết bơh Đảng, Dà lơgar dê geh ƀuơn ƀuài, geh cồng nha rlau: “Xã Yang Tao geh 95% làng bol jơi bơtiàn dồ êt nă cau, he neh git ală bơhiàn ờs mờng tàm tiah do, ngan là dà đơs nàng tam pà bal mờ làng bol, he kung là cau tàm do, he git mờng kwèng rài kis làng bol dê, bơta kal ke làng bol dê, bơh bơta git wă hơ̆ pơgồp bal mờ broă lơh jat gùng dà, broă lơh bơh Đảng dê rơp ƀuơn mblàng yal, hòi jà làng bol nàng làng bol in git mờ ƀuơn mblàng yal tàm rài kis”.

Kơnhoàl Lăk geh rlau 75 rbô nă làng bol, tàm hơ̆ khà làng bol jơi bơtiàn dồ êt nă cau geh rlau 63%. Mò Đào Thị Thanh An, Phó Ƀí thư duh broă sùm Huyện ủy kơnhoàl Lăk, càr Dăk Lăk pà git, nàng tơmut Đảng tàm ală ci ƀộ thôn, ƀòn tiah sar lơgar ngài, tiah làng bol jơi bơtiàn dồ êt nă cau, Ƀan kơnòl broă sùm Huyện ủy kơnhoàl jàu Mpồl rơndap broă kơnhoàl pơgồp bal mờ ală mpồl bơt bơtàu Đảng sùm pơlam broă lơh mờng chài nàng tă bơsong kòl yan, mờ kung sồr lơh, tơngkah, sền sơ wì, jat sền broă lam lơh broă lơh tơmut Đảng tàm thôn, ƀòn. Kơnờm bơh hơ̆, broă lơh tơmut Đảng geh lơh jat di jơnau sồr, gàr jat tơl khà mờ bơta niam đảng viên pa. Tŭ do, gùt kơnhoàl gam 737 nă làng bol jak chài  gam là cau gam geh sền sơ wì nàng tơmut Đảng ai nam 2024 in. Mò Đào Thị Thanh An đơs nền: “Pah nam bol hi ndrờm lơh ală broă rơndap lơh, ală sră nggal pơyua nàng sồr lơh ai ală anih lơh broă Đảng gơ wèt in bơh bồ nam pal sền sơ wì, yal tơnggit làng bol jak chài tus bal bơsram ală ơdŭ bơto pơlam tơmut Đảng. Nàng tơnguh bơta niam cau rơcang tơmut Đảng, pah nam bol hi ndrờm rơcang broă rơndap lơh sồr lơh, jàu kơnòl ală kwang geh jơng tàm Ƀan kơnòl broă sùm, kwang eh jơng tàm Ƀan Cấp hàñ tus bal pơrjum đảng bal mờ ală ci ƀộ thôn ƀòn nàng ai tơlik lài gùng dà, bơdìh mờ bơtàu tơnguh lơh sa mpồl bơtiàn, gàr niam lơngăp lơngai tàm thôn ƀòn kung pal geh jơnau pơlam ai đảng viên tàm ală ci ƀộ thôn ƀòn in sền gròi lơh niam broă lơh bơt bơtàu Đảng, sền gròi bơto bơtê, rơcang lài cau nàng tơmut Đảng”.

Mpồl kwang bàng, đảng viên là cau jơi bơtiàn dồ êt nă cau tàm Lăk neh ngui niam gơnoar broă lơh tờm tàm anih lơh broă cíñ trị tàm kâp hơ đơm, sùm lơh krơh lài, lam lài tàm bơt bơtàu mpồl tam klac dờng gùt làng bol, sền gàr mờ bơtàu tơnguh ƀòn lơgar.