Tàm Ƀlàng tơ̆p ƀồc Cau ling chơ̆t màng Bảo Lộc, do là tiah geh tơ̆p 740 ƀồc cau ling chơ̆t màng, tàm hơ̆ geh 102 bơtô ƀồc ờ hềt git đal, gơnoar atbồ tàm do pơgồp bal nền nòn mờ mpồl ling càr Lâm Đồng lơh jăt broă ai mẫu. Mò Nguyễn Thị Huyền Phương, Phó Chủ tịch Anih duh broă Làng bol sơnah ƀòn 3 – Bảo Lộc, pà git: “Bơyai lơh broă ai mẫu tàm ƀlàng tơ̆p ƀồc Cau ling chơ̆t màng Bảo Lộc dê, Anih duh broă Làng bol sơnah ƀòn neh sồr Mpồl Đơng lam Ling klàng sơnah ƀòn 3 – Bảo Lộc gàr tơl phan bơna, tơl bơta niam nàng pơgồp bal mờ Mpồl Đơng lam Ling klàng càr lơh jăt broă ai mẫu ƀồc ntìng cau ling chơ̆t màng, pơgồp bal tàm broă đal git măt ală Cau khin cha jăk chài chơ̆t màng, cèng ală bi rê mờ hìu nhă, ai tơngŏ nùs nhơm ờs mờng niam “Hùc dà kah tô dà” bơh jơi bơtiàn he dê”.

Broă geh lơh dơ̆ lĕ bal tàm 11 ƀlàng tơ̆p ƀồc cau ling chơ̆t màng tàm càr Lâm Đồng. Cồng nha geh, 4 rơbô 776 bơtô ƀồc ờ hềt git đal geh tờ nàng rồ, ai mẫu. tàm hơ̆, geh 3 rơbô 625 bơtô ƀồc geh mẫu sinh phẩm tơl niam nàng đal git ADN. Đại tá ồng Phạm Văn Soái, Phó Kwang lam bồ Chính trị, Gah Đơng lam Ling klàng càr Lâm Đồng, yal: “Càr Lâm Đồng là dùl tàm ală càr lơh gơs gờñ ngan broă ai mẫu sinh phẩm. Cồng nha do geh tài kơnờm broă sền gròi bơh Duh broă sùm Tỉnh ủy, Mpồl duh broă Làng bol, Anih duh broă Làng bol, Anih duh broă Mặt trận dà lơgar Việt Nam càr, tàm hơ̆ kwơ màng ngan là broă lơh ngan tơn bơh kwang bàng, cau ling tàm mpồl ling càr dê. Bŭ lah trồ tiah tơngai mìu, gam uă kal ke, bol añ kung gam lơh ngan lơh gơs broă gờñ”.

Di lah tàm ală ƀlàng tơ̆p ƀồc, bơta kal ke là pal lơh nền nòn bè broă geh ai, den broă jòi rồ ƀồc ntìng cau ling chơ̆t màng tàm bơdìh ù tiah gam kal ke uă rơlao. Tơnơ̆ mờ git nđờ jơ̆t nam, ù tiah uă tiah tam gơl, tiah tơ̆p lài do di gơlan tŭ do neh gơs brê, gơs ù lơh sa, gơs tiah lơh ƀòn ơm kis ha là gơs hìu krơh. Jơnau yal geh uă ngan ai bơh tàm pang sră lài do, jơnau kah wơl bơh ală cau ling yau bal mờ làng bol, tàm tŭ cau sền gŏ ngan ngai sơlơ ờ gal tai. Mìu jŏ neh lơh broă jòi sền, tồ rồ nàng jòi tàm dòr bơnơm, ù tiah phan sơlơ gơtìp kal ke; geh tiah pal đal sền sùm git nđờ dơ̆, rề ơnàng tiah jòi hơ̆ sồng gŏ tềl.

Gơwèt mờ ală kwang bàng, cau ling tus lơh broă jòi, do ờ mìng là kơnòl broă geh jào mờ là kơnòl gơwèt mờ ală cau neh phi să. Thượng tá Phạm Ngọc Khánh, Phó Chính ủy Mpồl Đơng lam mpồl ling rơcang gàr lài tiah 1 Đức Trọng, càr Lâm Đồng, pà git: “Gơwèt mờ tơl nă oh mi tŭ geh jào kơnòl, cau lơi kung gơlơh pơnyờ să mờ git loh làng kơnòl broă tŭ geh pin dờn jào lơh dùl kơnòl broă ngoh rơngăc ngan”.

Sơrlèt mờ ală ngai trồ tiah mìu càl, càr Lâm Đồng neh lơh gơs gờñ di pơgăp 3 nhai broă ai mẫu tàm 11 ƀlàng tơ̆p ƀồc. 3 rơbô 625 mẫu ƀồc ntìng cau ling chơ̆t màng geh jào nàng drơng tàm broă đal ADN, pờ geh tai jơnau kơ̆p gơn đal git ƀồc ntìng cau ling chơ̆t màng tàm ală bơtô ƀồc ờ hềt git đal in, mờ pơn jăt tai pơgồp bal bơta pràn tàm broă jòi rồ, tơrgùm ƀồc ntìng cau ling chơ̆t màng gam tàm bơdìh ù tiah.

Tếng đăp măt kung gam uă broă pal geh lơh, mơya mờ broă lơh ngan mờ geh kơnòl uă, broă cèng ală cau ling chơ̆t màng rê mờ măt sơnđan, mờ hìu nhă mờ ƀòn lơgar kung gam geh pơn jăt tai lơh jăt tơl ngai.