Tàm tơngai pa do, srơh “cau bơsram dờng 5 niam” pơn jat tai là srơh cau bơsram dờng tờm ngan, geh ală kấp Ƀộ, Mpồl cau bơsram dờng lơgar Việt Nam tơrgùm lam lơh sùm mờ uă broă lơh pa, bơceh lơh. Nàng sền gŏ loh làng rlau tai cồng nha lơh geh, rcang lơh ală broă lơh tam gơl pa tàm broă lơh lam lơh srơh “Cau bơsram dờng 5 niam” tàm tơngai tus, bi Võ Đức Phúc, ala mat Mpồl cau bơsram dờng lơgar Việt Nam ƀòn dờng Hồ Chí Minh đơs là: tam gơl pa là broă lơh ờ gơtùi pleh klàs, là bơta tờm srơh dê là bơta gơtùi hòi jà, pal ai cau bơsram dờng là cau tờm ngan bơh srơh dê. Bi Võ Đức Phúc, đơs:“Bol he tam gơl pa nùs nhơm bồ tơngoh, ai nùs nhơm bồ tơngoh lơh bơnàng jă ai bơta gĭt wă di, rơndăp broă lơh pa, lơh broă di pal. Gơwèt mờ cau bơsram dờng, bol he pal tam gơl pa nùs nhơm bồ tơngoh jat gùng dà broă lơh nàng cau bơsram dờng in gĭt, gĭt wă, pin dờn mờ kờñ gơboh srơh, bơh ală cau bơsram dờng ngan là cau chul chồl bơta pràn nàng dờng pràn mờ bơtàu tơnguh. Gơwèt mờ ală kấp ƀộ mpồl, bol he pal lời ai ală cau bơsram dờng in kơlôi sơnơng là ală cau bơsram dờng là cau tờm tề lam srơh, mơkung là cau tờm dờp geh bơta dong kờl bơh srơh dê. Ală cau bơsram dờng là ală cau dờng pràn bơh srơh dê nàng kòn bơnus ngan là cau tờm, cau kwơ màng ngan bơh srơh dê”.

Jơnau sồr lơh broă: Cau bơsram dờng Việt Nam, Kơ̆ kơl jăp bơhiàn niam ngan- geh uă bơta kơ̆p kờñ- Bơceh lơh ai rài tơnơ̆ in- Bơt bơtàu Dà lơgar rơ̆p lơh kah wơl pràn kơl dang tàm cau bơsram dờng Việt Nam dê bơta kơ̆p kờñ bơtàu tơnguh Dà lơgar pas pràn, sơlơ bơtàu tơnguh tai, ngăc ngar, chờ hờp chờ hờñ, đơs nền bơta pin dờn bơh cau bơsram dờng dê gơwèt mờ Đảng, Dà lơgar, rài Xã hội củ nghĩa. Cau bơsram dờng Mai Hải Yến, Củ tịc Mpồl Cau bơsram dờng Họk viện kwang bàng ƀòn dờng Hồ Chí Minh đơs là: “Pơrjum dờng nam do oh kờñ ngan mờ jơnau sồr tài bơh jơnau sồr hơ̆ cèng bơta hòi jà uă ngan mờ oh kờñ ngan mờ jơnau “Kơ̆ kơl jăp bơhiàn niam ngan” den oh kơ̆p kờñ ngan tàm tơngai lơh broă tus, Mpồl cau bơsram dờng lơgar Việt Nam kung bè ală kấp mpồl rơ̆p lơh geh uă tiah nàng ai ală cau bơsram dờng in bơt bơtàu nùs nhơm bồ tơngoh, pơlam tàp nùs nhơm, rài kis mờ broă lơh nàng ală cau bơsram dờng in gơtùi đơs nền geh bơhiàn niam ngan rơnàng he dê kung bè tàm pơrdờn geh tŭ tơngai lơh geh bơhiàn niam ngan cau bơsram dờng lơgar Việt Nam dê”.

Mờ tơngume “Broă lơh lơh pràn ală broă lơh lơh geh tiah pơlam gùng dà, bơt bơtàu nùs nhơm bồ tơngoh kis ai cau bơsram dờng in tàm tơngai pa”, cau bơsram dờng  Vũ Thu Hằng, cau bơsram dờng 5 niam kấp ƀòn dờng Hà Nội đơs tàm Pơrjum dờng Mpồl cau bơsram dờng Việt Nam:“Tàm tơngai tam gơl sồ kung bè lơh ngan ngồn gùt plai ù geh bơyai lơh pràn kơl dang bè tŭ do ai bol he in uă tŭ tơngai niam bơtàu tơnguh mơya kung geh ală bơta kal ke bơta lòng tàm broă bơto bơtê nùs nhơm kơ̆ dơn cíñ trị ai cau bơsram dờng in...

Nàng lơh geh jơnau sồr bơh broă lơh kăc màng tàm tơngai pa, sồr srơh cau bơsram dờng mờ mpồl Cau bơsram dờng sùm pơnđơl pràn lơh ngan brồ guh, tam gơl pa pràn kơldang tơngume mờ broă lơh lơh broă, lơh jat niam gơnoar broă lam lài bơceh lơh bơh cau bơsram dờng dê. Bi Nguyễn Tuấn Thành, Cau bơsram dờng Hìu bơsram Đại họk Dunia (Hìu bơsram Dà lơgar Hà Nội) đơs là, bơdìh mờ bơta lòt bal bơh Mpồl cau bơsram dờng dê, sồr tơl nă cau bơsram dờng pal rcang lài, pơnđơl pràn lơh ngan, bơceh lơh tàm tơl broă lơh bơsram, tìp mat lơh kuèng nàng bơceh lơh tàm rài tơnơ̆ do, nàng lơgar Việt Nam in gơ gơs Dà lơgar drờm bal mờ ală lơgar dờng pràn 5 câu bè Wa Hồ dê kơ̆p kờñ. Bi Nguyễn Tuấn Thành, đơs:“Broă lơh mpồl ai oh in bơta tus bal mờ bơta geh ngan mờ ală rơndăp broă lơh geh ngan, mờ ală kòn bơnus geh ngan, tơnguh uă bơta pràn lơh broă mpồl, pal ngăc ngar să tờm bè lơi tàm tiah ơm kis bè lơi. Mờ oh geh lơh uă bơta tàm tơrbŏ bal bơh oh dê rlau tai mờ ală bơta gĭt gơ̆p tŭ do ndrờm là ală cau tus bơh ală broă lơh mpồl, hơ̆ là oh bơsram tàm hìu bơsram tàm ơdŭ oh dê geh mpồl gơ̆p bơyô bơsram bal. Oh tus bal broă lơh pơrlòng sơnđờm mut lơh broă den he kung pal geh mpồl den hơ̆ là broă oh rề ơnàng tàm tơrbŏ bal tàm broă lơh mpồl bơtiàn bè hơ̆ dong oh in lơh geh ală mpồl bơyô mờ lơh geh jơnau kờñ bal”.

Kơ̆p kờñ bơt bơtàu Mpồl cau bơsram dờng Việt Nam kơ̆ kơl jap pràn kơl dang, pơgồp bơnah bơt bơtàu, sền gàr Đảng mờ ală anih lơh broă cíñ trị, lơh jat dùl ròt bal ală broă lơh bơt bơtàu Mpồl kơ̆ kơl jap, pràn kơl dang, tàm klăc bal tơrgùm bal mờ uă cau bơsram dờng; jơh nùs tus bal bơt bơtàu, sền gàr Đảng mờ ală anih lơh broă cíñ trị. Bi Nguyễn Nguyệt Anh, Phó Củ tịc Mpồl cau bơsram dờng lơgar Việt Nam càr Nghệ An, Củ tịc Mpồl Cau bơsram dờng Việt Nam Hìu bơsram Đại họk Vinh đơs là, bơdìh mờ broă bơsram den cau bơsram dờng kờñ pal rcang lài geh uă jơnau bơceh lơh, kơlôi sơnơng jak chài, tă pơgồp bồ tơngoh ai dà lơgar in, tơnguh uă bơta gĭt wă să tờm he dê:“Kơnòl broă bơh cau bơsram dờng den ờ ming bơsram mờ gơ gam là kơlôi sơnơng jak chài tai, hơ̆ là bơta krơi is gơwèt mờ ală bơyô kơnòm bơsram kấp pe dê. Tàm tơngai tus, kơ̆p kờñ là, gơwèt mờ ală kơlôi sơnơng jak chài den geh ală dơ̆ pơrlòng geh cồng nha niam mờ geh bơta dong kờl bơto bơtê sùm bơh ală cau pơgru, ală cau jak chài bè gah khoa họk dê.