Ală ngai do, broă lơh “Nam pa mpồl ling sền gàr tiah nhàr lơgar – Ram mhŭ nùs nhơm làng bol ƀòn lơgar” geh mpồl ling sền gàr tiah nhàr lơgar càr Gia Lai lam lơh dơ̆ dùl dơ̆ tàm ală xã tiah nhàr lơgar kơnhoàl Ia Grai, Đức Cơ, Chư Prông, càr Gia Lai dê. Tàm tơl broă lơh, ală kwang bàng, cau ling mpồl ling sền gàr tiah nhàr lơgar bal mờ làng bol ală tiah klơm ƀañ mbar lơm pòng, dròng cing jañ mồng, tìp mat lơh kuèng đơs crih tam ya nàng sơlơ tàm klăc bal nùs nhơm ling klàng làng bol. Bal mờ hơ̆, ală cau geh nùs nhơm niam dong kờl bơyai lơh ală ơdŭ ràng tăc phan 0 đồng, jàu ai làng bol in gĭt nđờ rơhiang bơnah phan pà là ồi tơ̆, kơmung, phe mờ sră cih, sră giáo khoa, phan ngui bơsram sră ai kơnòm bơsram in. Đại tá Nguyễn Văn Nghị - Phó Cíñ uỷ Gah đơng lam Mpồl ling sền gàr tiah nhàr lơgar càr Gia Lai, đơs: “Làng bol chờ hờp ngan, pin dờn tàm mpồl ling klàng đơs bal, mờ mpồl ling sền gàr tiah nhàr lơgar đơs is, mơkung sơlơ tam klăc bal nùs nhơm ling klàng làng bol, tàm pà dong kờl bal bơta chờ hờp, muat jrùm, kal ke; do kung là bơta gơn kơnờm nàng làng bol in bal mờ gơ̆p tam klăc bal đah ală ƀòn, lơh jat niam rlau tai gùng dà broă lơh bơh Đảng mờ Dà lơgar dê tàm broă bơt bơtàu rài kis niam chài tàm tiah làng bol ơm kis”.

Tàm ală ngai bồ nam pa 2024, ală broă lơh geh gơtha kwơ màng, duh hồl bơh ală Pôs đồng ling sền gàr tiah nhàr lơgar dê lam lơh, neh dong làng bol sơlơ chờ hờp, hô hơng. Mò Nguyễn Thị Lành- Phó Ƀí thư thường trực Huyện uỷ kơnhoàl Ia Grai, càr Gia Lai, pà gĭt:“Pal đơs ngan là tiah lơi geh dà tơlir bơh mpồl ling sền gàr tiah nhàr lơgar, den tàm hơ̆ geh dà tơlir bơh rài kis hờm ram, chờ hờp bơh làng bol dê. Mpồl ling sền gàr tiah nhàr lơgar neh pơlam làng bol in bơtàu tơnguh lơh sa, tam uă phan tam phan ròng, bơt bơtàu rài kis niam chài tàm tiah làng bol ơm kis, ngan là bơto pơlam làng bol tàm broă ngui sa tềm pềr, lơh tam gơl bồ tơngoh kơlôi sơnơng broă lơh nàng brồ guh lik klàs rƀah kơ̆ kơl jăp”.

 Tàm xã tiah nhàr lơgar Krông Na, kơnhoàl Buôn Đôn, càr Dăk Lăk, Mpồl ling sền gàr tiah nhàr lơgar càr Dăk Lăk pơgồp bal mờ ală kấp, ngàñ ală tiah bơyai lơh broă lơh “Nam pa mpồl ling sền gàr tiah nhàr lơgar ram mhŭ nùs nhơm làng ƀol- Sa tềp Giáp Thìn nam 2024. Bơh tàm drim gờñ, gĭt nđờ rơhiang nă làng bol tàm xã Krông Na mờ tiah rềp bal neh tơrgùm tàm Hìu sơnơm xã Krông Na, Hìu lơh broă Ủy ƀan Ñân zân xã tus bal mờ ngai chờ. Làng bol geh tus bal ală broă lơh geh kwơ, geh ngan bè kham sơm kòp, pà sơnơm ờ sa priă; dờp jơnau nting bơr gờm chờ, gờm chờ sa tềp, klơm ƀañ mƀar lơm pòng, pà phan sa tềp, jàu priă bơsram ai kơnòm bơsram in bơh mpồl ling sền gàr tiah nhàr lơgar mờ ală cau geh nùs nhơm niam dê... Bal mờ hơ̆, làng bol geh mblàng yal, bơto pơlam pơgồp bal mờ mpồl ling sền gàr tiah nhàr lơgar tus bal sền gàr jrong nhàr lơgar, gùng nhàr lơgar mờ lơngap lơngai tiah nhàr lơgar bơh Dà lơgar dê. Bi Y Quyết Êban, kòn cau Mnông, làng bol ơm tàm ƀòn Trí A, xã Krông Na, kơnhoàl Buôn Đôn pà gĭt, ală bơnah phan pà mờ ală broă lơh bơh kwang bàng, cau ling sền gàr tiah nhàr lơgar càr Dăk Lăk dê neh bơnah lơi lơh ram mhŭ nùs nhơm làng bol in tàm tơngai sa tềp wă rò nam pa:“Tus mờ ngai chờ “Nam pa mpồl ling sền gàr tiah nhàr lơgar ram mhŭ nùs nhơm làng bol ƀòn lơgar” làng bol chờ hờp ngan. Đah mpồl bơyai lơh neh bơyai lơh ală broă lơh nhơl bơh yau, kham kòp mờ pà sơnơm ờ sa priă, dờp pà ƀañ mbar lơm pòng, phan sa tềp... Bơh ngai chờ, làng bol geh tìp mat lơh kuèng, lùp bơsram, tam klăc đềt mềr ling klàng làng bol, geh uă bơta chờ hờp pah dơ̆ sa tềp wă rò nam pa”.

Broă lơh “Nam pa mpồl ling sền gàr tiah nhàr lơgar- ram mhŭ nùs nhơm làng bol ƀòn lơgar” là broă lơh pah nam bơh Gah đơng lam Mpồl ling sền gàr tiah nhàr lơgar càr dê, nàng kờñ dong làng bol ală xã tiah nhàr lơgar geh bơta ram mhŭ sa tềp, tơl làm, chờ hờp; mơkung sơlơ tam klăc rlau tai nùs nhơm ling klàng làng bol tiah nhàr lơgar; pơndờm pơđiang làng bol ală jơi bơtiàn, kwang bàng, cau ling tiah nhàr lơgar pơn jat tai tam klăc, sơm bat tê bal dùl nùs bal lơh jat niam kơnòl broă sền gàr gơnoar tờm tiah nhàr lơgar bơh ƀòn lơgar dê. Broă lơh “Nam pa mpồl ling sền gàr tiah nhàr lơgar ram mhŭ nùs nhơm làng bol ƀòn lơgar” di dơ̆ sa tềp Giáp Thìn nam 2024 geh Mpồl ling sền gàr tiah nhàr lơgar càr Dăk Lăk lam lơh bơh ngai 13 nhai 01 tus ngai 04 nhai 02, tàm 4 xã tàm hơ̆ geh: Krông Na, gơwèt kơnhoàl Buôn Đôn, ală xã Ea Bung, Ia R’vê mờ Ia Lốp bơh kơnhoàl Ea Súp. Tàm dơ̆ do, rơ̆p geh gĭt nđờ rơbô bơnah phan pà kờp priă 752 tơlak đong jàu pà ai ală hìu bơnhă tàm tiah nhàr lơgar bơh càr Dăk Lăk dê. Đại tá Đỗ Quang Thấm – Cíñ ủy Gah đơng lam Mpồl ling sền gàr tiah nhàr lơgar càr Dăk Lăk, pà gĭt: “Nam 2024 den bol añ rơ̆p bơyai lơh broă lơh “Nam pa mpồl ling sền gàr tiah nhàr lơgar ram mhŭ nùs nhơm làng bol ƀòn lơgar” tàm jơh ală xã tiah nhàr lơgar bơh càr Dăk Lăk dê. Gùng dà broă lơh bơh bol añ dê là nam do rơ̆p bơyai lam lơh gờñ, mờ jơnau kờñ ờ geh cau lơi ơm tàm tiah nhàr lơgar gơtìp lời wơl bơh ngkời, ờ geh sa tềp. Bơh hơ̆, tam pà bal mờ làng bol tàm tiah nhàr lơgar tơrmù ƀà kal ke, kơ̆ kơl jăp rài kis đềt mềr tàm tiah nhàr lơgar, bal mờ mpồl ling sền gàr tiah nhàr lơgar kơ̆ kơl jăp gơnoar tờm lơngăp lơngai tiah nhàr lơgar bơh Dà lơgar dê”.