Drim ngai 12/03, Mpồl dong kờl hìu bơnhă cau ling chơ̆t màng Việt Nam bơyai lơh tìp măt sră ƀăo Bồ sơnam pa Giáp Thìn 2024. Trung tướng ồng Hoàng Khánh Hưng, Củ tịc Mpồl dong kờl hìu bơnhă cau ling chơ̆t màng Việt Nam, pà gĭt: Mpồl neh dờp geh bơta tơrgùm bal pràn tàm broă lơh kah rơngal cau ling chơ̆t màng bơh Tổng Kông ty gùng rơndeh ồs Việt Nam dê bè broă lơh jăt broă ờ sa priă jun pơndiang ƀồc ntìng cau ling chơ̆t màng mờ ờ càng geh vĕ ai cau pròc mhàm cau ling chơ̆t màng lòt bal bơh tiah đah Jum tus đah Tô dà lơgar in. Do là broă lơh geh gơtha bơto tơngkah kòn bơnus uă ngan, tơngŏ nùs nhơm “Hùc dà kah tô dà” bơh jơi bơtiàn Việt Nam dê.

Tàm nam 2024, Mpồl dong kờl hìu bơnhă cau ling chơ̆t màng Việt Nam pơn jăt tai lơh jăt niam broă lơh kah rơngal ală cau khin cha jak chài chơ̆t màng, bè: gĭt nền măt sơnđan ƀồc ntìng cau ling chơ̆t màng gam ờ hềt tơl jơnau yal, lòt jòi, rò tơrgùm ƀồc ntìng cau ling chơ̆t màng; pà hìu bơta nđàc, sră tềm pềr priă, jàu priă dong kờl bơsram ai cau pròc mhàm hìu bơnhă cau ling chơ̆t màng…Kwơmàng, tàm nam do, Mpồl pơgồp bal mờ Tổng Kông ty Gùng rơndeh ồs Việt Nam lam jun pơndiang ƀồc ntìng cau ling chơ̆t màng mờ ờ càng pal geh vĕ ai cau pròc mhàm cau ling chơ̆t màng lòt bal bơh tiah đah Jum tus tiah đah Tô dà lơgar in mờ ai tơl ală bơta ƀươn ngan rlau jơh ai cau pròc mhàm cau ling chơ̆t màng in tàm broă lam lơh broă lơh pơrjum jun ƀồc ntìng cau ling chơ̆t màng rê hờ ƀòn tờm bơh gùng rơndeh ồs.