Phó Củ tịc Quôk hội Nguyễn Đức Hải neh jàu 12 bơnah phan pà ai ală hìu bơnhă rƀah, hìu bơnhă geh sră dong kờl bơh dà lơgar tus bal broă lơh “Sa tềp kờñ gơboh bal kòn bơnus” in. Phó Củ tịc Quôk hội Nguyễn Đức Hải đơs nền, do là broă lơh geh kuơ ngan ngồn mờ cèng bơta niam chài dờng ngan, ngan ngồn lơh gơlik bơta tam klac bal mpồl bơtiàn, at tê bal lơh gơ rề bơta kờñ gơboh mờ nùs nhơm kờñ gơboh bal kòn bơnus, cèng tus làng bol in nùs nhơm sa tềp ram mhŭ, chờ hờp, cèng bơta niam chài bơh yau jơi bơtiàn dê. Phó Củ tịc Quôk hội sồr kâp ủy, gơnoar atbồ càr Lạng Sơn bơdìh mờ broă tơrgùm đơng lam bồ, sồr lơh bơtàu tơnguh lơh sa- mpồl bơtiàn pal pơn jat tai sền gròi tus broă lơh gàr lơngăp lơngai rài kis mpồl bơtiàn; sền gròi đơng lam, pơgồp bal nàng broă lơh “Sa tềp kờñ gơboh bal kòn bơnus” pơn jat tai geh gàr sùm, lam lơh geh cồng nha mờ ngai sơlơ cèng wơl uă cau in geh wă rò sa tềp chờ hờp, ram mhŭ rlau.

Kung tàm ngai 26/01, Phó Củ tịc Quôk hội Nguyễn Đức Hải neh lòt còp, pà 200 bơnah phan ai cau lơh phan, cau lơh broă geh rài kis kal ke tàm Broă lơh “Sa tềp bơ tòm tơrgùm mat – Nam pa tam pà bal” nam 2024 bơh càr Lạng Sơn dê.