Rơlao 01 nhai do, bơh tŭ ngai rê ơm kis tàm hìu nùs nhơm geh gah kwang àng lơh pà, mò H’ Wăn Byă, 56 sơnam, kis tàm thôn 2, xã Ea Siên, thị xã Buôn Hồ kung gam bè ờs nùs nhơm ngoh rơngăc gơboh gơbài. Mò yal, rài kis pơ-ùr chơ̆t bơklao, kòn gơtìp kòn đời neh uă nam ơm kis kơnờm tàm hìu cau, 2 sào ù lơh mìng tơl sa, den tàng broă geh hìu lơh kơl jăp kung gam bè dùl dơ̆ mpao. Mò H’ Wăn Byă pà git: “Đah Kwang àng lơh pà hìu añ in, añ chờ hờp ngan. Bơh tŭ rê ơm să jan añ gơlơh pràn kơl dang ngan, nùs nhơm tŭ lơi kung chờ hờp, ờ pal kơlôi rơcang tai bè hìu ơm. Añ neh kra, ờ gam pràn lòt lơh broă tai, ờ gơtùi lơh geh priă tai nàng lơh hìu pa. Gam ơm kơnòm tàm hìu lŏ klao sùm den tàng kal ke ngan. Ưn ngài mpồl kwang àng mờ ală kấp, gah lơh broă”.

Kung geh bơta gơboh gơbài tŭ geh ơm tàm hìu pa di tàm dơ̆ do sơl, ồng Trần Anh Dũng, 58 sơnam, kis tàm thôn 3, xã tiah nhàr dà lơgar Ea Bung, kơnhoàl Ea Súp yal: “Nam 1980, hìu añ bơh Đà Nẵng guh tus tàm Ea Súp do nàng lơh broă sa. Tài kal ke den tàng pal ơm tàm hìu lơh mờ mpàn, ơnàng ờ hềt tus 20 thơ̆k sơl, trồ mìu ñhăt, trồ tơngai duh mờ gơthul. Geh kwang àng kơnhoàl Ea Súp mờ ală kấp lơh pà hìu dờng niam, tŭ do geh hìu pa ơm, ờ ngòt ñhăt, ờ ngòt gơthul ƀơ̆ tai, hìu nhă añ chờ hờp ngan”.

Ea Súp là kơnhoàl sơnrờp ngan tàm càr Dăk Lăk lơh gơs jơnau geh jào là lơh 80 nơm hìu pà ală hìu gơtìp kal ke in lài mờ kàl mìu dà tih nam do. Đại úy Hoàng Thế Quang, Atbồ mpồl  dong broă, Kwang àng kơnhoàl Ea Súp yal bè broă lơh mờng chài bè do: “Kwang àng kơnhoàl neh sồr ală mpồl lơh broă ai phan lơh hìu kung bè ală cau dờp lơh hìu càn ing phan lơh hìu mờ dong kờl lài priă lơh, nàng di tŭ gờñ lơh gơs ală hìu dong kờl ală hìu nhă in”.

Càr Dăk Lăk là càr geh khà kờp làng bol gal ngan tàm Tây Nguyên dê mờ 1 tơlăk 950 rơbô nă, 49 jơi bơtiàn ơm kis bal. Khà hìu rơƀah tàm càr dê gam mờr 8%. Dong kờl ală hìu gơmù kal ke, bơh tàm nhai 03 nam 2024, Ƀộ Kwang àng lơh Rơndăp broă nàng lơh 1 rơbô 200 nơm hìu nùs nhơm tàm càr Dăk Lăk in. Tơl nơm hìu geh 80 tơlăk đong, tàm hơ̆ Ƀộ Kwang àng dong kờl 50 tơlăk đong, gơnoar atbồ ƀòn lơgar dong kờl lài bơnah priă gam tai; kwang àng ală kơnhoàl, xã dong kờl ngai lơh. Hìu lơh jăt hìu geh ai lài 36B (Ƀộ Kwang àng), ơnàng 36 thơ̆k vuông, mờ kơlik cang mờ găc, rơkàng tìm mờ sơlo, mpồng lơh mờ lòs bal mờ bơnàng dă mờ găc men. Jăt Thiếu tướng Lê Vinh Quy, Kwang atbồ Kwang àng càr Dăk Lăk yal, tus tŭ do, gùt càr neh lơh gơs mờr 500 nơm hìu jào làng bol in ngui. Tŭ do kwang àng ală kơnhoàl, thị xã, ƀòn dờng gam lơh mhar nàng lơh gơs jơh ală hìu lài mờ ngai 30 nhai 10 nam 2024. Thiếu tướng Lê Vinh Quy đơs: “Bol añ pơgồp bal mờ ală sở, gah lơh broă, gơnoar atbồ ală tiah mờ tơnguh mpồl lơh broă wèt tus tàm ală tiah nàng dong kờl làng bol bè ngai lơh broă, bè bơta pràn lơh mờ phan bơna nàng lơh hìu ai làng bol in. bơdìh mờ broă lơh kơl jăp, kwang àng càr kung sồr kwang àng ală tiah pal lơh gơs tàm tơngai gờñ ngan, jào hìu ai ală hìu nhă in, ai tơl bơta niam nàng làng bol iang nùs lơh broă sa”.

Rơndăp broă lơh 1 rơbô 200 nơm hìu nùs nhơm pà ală hìu nhă gơtìp kal ke tơlik nùs nhơm sền gròi uă ngan bơh Ƀộ Kwang àng dê gơwèt mờ làng bol càr Dăk Lăk. Broă lơh do pơgồp bal mùl màl tàm rài kis lơh broă sa mpồl bơtiàn, bơ̆t bơtàu ƀòn lơgar pa, lơh pràn broă lơh “Gùt làng bol sền gàr bơta lơngăp lơngai Dà lơgar”; wèt tus chờ gờm 120 nam Ngai crơng gơs càr Dăk Lăk.

Lài mờ hơ̆, Kwang àng càr Dăk Lăk bal mờ Kwang àng kơnhoàl Cư̆ Kuiñ kung neh pơgồp bal mờ gơnoar atbồ tàm kơnhoàl neh bơyai lơh “Hìu nùs nhơm” ai cau pròc mhàm, hìu nhă Cau ling chơ̆t màng Kwang àng làng bol Trần Quốc Thắng là kwang bàng Kwang àng xã Ea Tiêu lài do neh chơ̆t phi să tàm dơ̆ sò tơm iơh bơsăk ngai 11 nhai 06.

Lơh jăt gùng dà broă lơh bơh Đảng, Dà lơgar bal mờ Ƀộ Kwang àng bè broă drơng gàr cau ling sồt să, hìu nhă cau ling chơ̆t màng, cau geh màng mờ dà lơgar tàm tơngai do, Kes priă Nùs nhơm cau ling bal Ƀộ Kwang àng; Kes priă Nùs nhơm cau ling bal Kwang àng càr Dăk Lăk bal mờ broă tă pơgồp bal, dong kờl bal bơh gùt mpồl cau ling kwang àng tàm gùt lơgar neh sền gròi, dong kờl dùl bơnah priă 500 tơlăk đong nàng lơh “Hìu nùs nhơm” ai cau pròc mhàm Thiếu tá, Cau ling chơ̆t màng Trần Quốc Thắng in.