Cau lơh ƀăo ồng Lê Quốc Minh, Kwang geh jơng tàm mpồl Đảng Dà lơgar, Củ tịc Mpồl Cau lơh ƀăo Việt Nam, Phó kwang atbồ ƀan Tuyên giáo Dà lơgar, Kwang atbồ Ƀăo Ñân zân pà git: Bơh tơl dơ̆ bơyai lơh pơrlòng sră ƀăo dà lơgar, bơta chờ ngan hơ̆ là bơta ờ ndrờm bal đah sră ƀăo Dà lơgar mờ ală tiah neh rơhời gơmù. Geh ală khà A gơwèt sră ƀăo ală tiah ha là anih lơh broă sră ƀăo dềt. Bơta niam ală jơnau cih tus bal pơrlòng mờr ndrờm bal rơlao. Bơta niam tai là anih lơh broă sră ƀăo tàm alăt tiah tŭ do neh ai uă tàm ƀăo điện tử niam bơnĕ rơlao. Ală anih pờ tơlik jơnau đơs, sơnio rùp ală càr, ƀòn dờng kung gơtùi lơh geh ală jơnau yal tơngit geh bơta niam uă ngan. Bè broă bơyai lơh Dơ̆ jào Khà jờng Sră ƀăo Dà lơgar dơ̆ 18, Cau lơh ƀăo ồng Lê Quốc Minh pà git: “Nam do Dơ̆ jào khà jờng Sră ƀăo dà lơgar geh bơyai lơh kwơ màng ngan, jăt broă lơh krơi is ngan. Bol añ ai cau geh khà jờng lơh tờm. Cau guh dờp khà jờng gơlơh pơnyờ să ngan bè khà jờng mờ ală cau hơ̆ neh lơh geh. Geh bal cau nggui sền kung gơlơh pơnyờ să ngan sơl bè ală cồng nha mờ cau lơh broă bal bơh să tờm he dê neh lơh geh. Broă bơyai lơh pa bè hơ̆ geh ai nùs nhơm gơhòi ală cau ờ hềt geh khà jờng mờ tơnguh ală cau neh geh khà jờng nàng he gŏ bơta niam Khà Jờng Sră ƀăo dà lơgar dê di pal là khà jờng sră ƀăo kwơ màng ngan dà lơgar Việt Nam dê”.

Jăt cau lơh ƀăo ồng Lê Quốc Minh, Củ tịc Mpồl cau lơh ƀăo Việt Nam đơs, sră ƀăo pa pal geh ală bơta tam gơl pa mờ bơceh lơh sùm. Kơ̆p kờñ ală anih lơh broă sră ƀăo rơ̆p lơh jăt broă tam gơl sồ geh cồng nha, tam gơl pa bơceh lơh sùm, geh broă lơh ƀăo jăk mờ tàm hơ̆ kwơ màng là pal ngai sơlơ sền kwơ tàm bơta niam nàng gàr jơng cau sền, hòi jà ală cau sền pa, geh sùm gơnoar lam lài tàm broă ai jơnau yal tơngit ai jơnau ngăc ngar mpồl bơtiàn in. Tơngai do, bŭ lah tìp uă kal ke, bơta lòng, mơya Mpồl cau lơh ƀăo sùm lơh gơs ală tơngu me broă lơh geh ai mờ geh uă bơta niam. Bơh tŭ hơ̆ pơgồp bal tàm broă lơh gơs niam kơnòl broă cíñ trị bơh Mpồl cau lơh ƀăo lơgar Việt Nam dê tàm tơngai do. Ồng Lê Quốc Minh pà git tai: “Bơh bồ tơngai lơh broă tus tŭ do, Đảng đoàn, Mpồl duh broă sùm, Mpồl đơng lam mờ Duh broă sùm Mpồl lơh ƀăo tam klăc bal, ring bal tàm broă đơng lam, lam lơh ală kấp Mpồl in, lơh broă bơh ală kấp Mpồl tàm gùt lơgar geh uă bơta niam, tam gơl pràn; di tŭ git ală jơnau đơs, jơnau kơ̆p kờñ bơh cau lơh ƀăo tàm mpồl dê, tơrgùm bơsong dong kờl niam nùs nhơm, tam klă ring bal”.

Mpồl cau lơh ƀăo Việt Nam tŭ do geh rơlao 25 rơbô nă cau gam lơh broă tàm 307 mpồl lơh broă kấp Mpồl. Bơh sơnrờp tơngai lơh broă tus tŭ do, Hìu bơto bơtơl broă lơh sră ƀăo bơh Mpồl dê neh bơyai lơh rơlao 256 ơdŭ bơto bơtơl ai mờr 9 rơbô nă cau lơh ƀăo tàm gùt lơgar in. Mờ pà git, ală kấp Mpồl bơh Dà lơgar tus tàm ală càr, ƀòn dờng neh lơh geh rơlao 250 Mpồl duh broă bơsong tìs nùs nhơm lơh broă cau lơh ƀăo Việt Nam mờ mŭt lơh broă ngai sơlơ niam, neh bơsong di tŭ mờ nền nòn ờ uă dơ̆ tìs mờ adăt boh lam mờ nùs nhơm lơh broă.

Pa do, tàm dơ̆ lơh broă mờ Mpồl Cau lơh ƀăo Việt Nam, Kwang atbồ Ƀan Tuyên giáo Dà lơgar ồng Nguyễn Trọng Nghĩa đơs loh: tơngai tus, Đảng đoàn Mpồl Cau lơh ƀăo Việt Nam pal pơn jăt tai sền kwơ tàm broă bơto cíñ trị, nùs nhơm nàng cau lơh ƀăo in git mờ wă nền nòn broă lơh ƀăo là lơh kăc màng, cau lơh ƀăo là cau ling lam lài tàm đah nùs nhơm-niam chài Đảng dê; pơn jăt tai ngui niam gơnoar broă, broă lơh, lơh geh cồng nha kơnòl broă cíñ trị geh Đảng, Dà lơgar bal mờ Làng bol pin dờn, jào lơh. Ồng Nguyễn Trọng Nghĩa pà git: “Mpồl Cau lơh ƀăo Việt Nam pal là anih pin dờn, là anih kơl dìng bè broă lơh nàng ală anih lơh broă să ƀăo pơn jăt tai lơh ngan, jòi geh tam gơl pa să tờm, mùl màl gơs anih yal tơngit di pal, di tŭ, lơh jăt tàm bơta mùl màl dà lơgar dê, nhơm tă bơh rài kis, bơh tŭ hơ̆ lơh geh gơnoar ai gùng dà broă lơh nùs nhơm kơlôi sơnơng, ai geh bơta ring bal tàm mpồl bơtiàn, gàr kơl jăp gơnoar là anih yal tơngit tờm, pin dờn gơwèt làng bol dê. Tơl jơnau cih sră ƀăo pal là dùl jơnau cih geh nùs nhơm niam chài, bơto bơtê. Tơl nă cau lơh ƀăo pal mùl màl là dùl nă cau ling tàm tiah tam dră nùs nhơm mờ “măt sàng, nùs niam, gai cih sồt”, nhar tàm broă lơh, khin tam dră wơl mờ ală bơta tìs, gàr kơl jăp să tờm tềng đăp mờ ală bơta gơhòi geh sùm…”.

Di tơnkah 99 nam Ngai Sră ƀăo Kăc màng Việt Nam, Kwang atbồ Ƀan Tuyên giáo Dà lơgar ồng Nguyễn Trọng Nghĩa chờ gờm Mpồl Cau lơh ƀăo Việt Nam ngai sơlơ di pal ngan là mpồl lơh broă cíñ trị - mpồl bơtiàn – broă lơh kwơ màng bơh gùt lơgar dê, là “hìu ơm bal” tơrgùm, tam klăc bal uă bơh ală cau lơh ƀăo gùt lơgar dê.