Jăt Mpồl cau ùr càr Dăk Lăk yal, tàm ală nam do, cau ùr dờng sơnam tàm càr sùm tus bal ală broă lơh, dơ̆ lam sồr “Cau dờng sơnam pơrlòng lơh sa jăk”; Bơ̆t bơtàu hìu nhă “05 ờ, 03 kloh” pơgồp bal mờ “Bơ̆t bơtàu hìu nhă niam chài, hờm ram, gơboh gơbài, gơguh jăk, niam bơnĕ”…

Ală kấp mpồl geh uă broă lơh ai is cau ùr dờng sơnam in, nàng drơng gàr mờ ngui gơnoar bơh cau ùr dờng sơnam tàm hìu nhă bal mờ mpồl bơtiàn; hòi jà cau tàm mpồl cau ùr dờng sơnam tus bal. Tàm pơrjum, ală cau ala măt neh tus bal tìp, tam pà bal broă lơh niam, geh cồng nha tàm broă pơgồp bal lơh dơ̆ lam sồr bơ̆t bơtàu hìu nhă 05 ờ 03 kloh pơgồp bal mờ broă lơh “Sơnam dờng bồt tơngoh ngăc ngar” mờ bơ̆t bơtàu ƀòn lơgar pa tàm ală ƀòn ơm kis. Di tàm dơ̆ do, mpồl bơyai lơh neh jờng rơ, jào khà pơn jờng 30 nă cau ùr dờng sơnam geh cồng nha pơnrơ jăk ngan tàm ală broă lơh in.