Ală ngai lồi poh, kra ƀòn Điểu Xem, kòn cau Mnông, cau ling yau, cau geh bơngă pin dờn tàm ƀòn Dăk Blao, ƀòn drà dềt Kiến Đức, kơnhoàl Dăk Rlấp, càr Dăk Nông bal mờ mpồl atbồ tus còp tơl hìu rơƀah tàm ƀòn. Kra ƀòn pà git, tơl hìu tơl rài kis krơi is, geh tus sền, đềt mềr mờ tơl hìu hơ̆ sồng ngui geh bơta pràn dong kờl bơh dà lơgar tus mờ làng bol. Ală hìu rơƀah geh pơlam broă lơh, mờ geh dong kờl bè phan bơna bè sơntìl phan tam, geh bơto bơta chài, mờ geh lam sồr bè nùs nhơm nàng brồ guh lơh ngan. Jăt ồng Điểu Xem đơs, nùs nhơm tam klăc geh dong kờl ƀòn lơgar kơ̆ kơl jăp mờ ngai sơlơ bơtàu tơnguh. Ồng Điểu Xem pà git: “Làng bol ƀòn lơgar sùm tam klăc bal, đềt mềr bal, lam sồr bal lơh ngan lơh broă sa, bơtàu tơnguh lơh sa. Ƀòn lơgar kơ̆ kơl jăp mờ geh broă sền gròi bơh, dong kờl bơh Đảng, Dà lơgar bơcri priă lơh phan bơna, sền gròi mờ ai làng bol in geh càn priă lơh sa, den tàng rài kis làng bol geh gơguh”.

Tàm xã tiah nhàr dà lơgar Quảng Trực, kơnhoàl Tuy Đức, càr Dăk Nông, gơnoar bơh ală kra ƀòn, cau geh bơngă pin dờn kung gam geh ngui niam ngan tàm broă gàr kơl jăp tiah nhàr dà lơgar mờ bơtàu tơnguh lơh sa. Ồng kra ƀòn Điểu Đi, kis tàm ƀòn Bu Prăng 2, xã Quảng Trực pà git, dùl nùs jăt Đảng, jăt kăc màng, rài kis làng bol ngai sơlơ hờm ram, tiah nhàr dà lơgar geh tam gơl pah ngai. Ồng Điểu Đi pà git: “Rài tam lơh den rơnàng añ tus bal tam lơh, sền gàr Dà lơgar mờ sền gàr tiah nhàr dà lơgar. Tŭ do ring lơngai, krơi is den ală đảng viên, cau ling yau sơlơ pal lam lài mờ lam sồr làng bol ngui nùs nhơm tam klăc bal, lơh ngan lơh broă sa, bơtàu tơnguh rài kis mờ sền gàr kơl jăp tiah nhàr dà lơgar do”.

Git mpồl kra ƀòn, cau geh bơngă pin dờn geh gơnoar kwơ màng, bơh nam 2013, Tỉñ ủy càr Dăk Nông neh tơlik Rơndăp broă sồ 05 bè bơ̆t bơtàu mpồl lơh broă tờm tàm tiah jơi bơtiàn ờ gal cau. Tus tŭ do, mpồl do geh mờr 500 nă, geh jơnau git wă bè gùng dà broă lơh bơh Đảng, adăt boh lam bơh Dà lơgar dê, git tàm broă hòi jà lam sồr làng bol tàm bơta pa. Bơh tŭ hơ̆, ală cau do rơcang lài, tus bal lơh niam broă git nùs nhơm, jơnau kơ̆p kờñ bơh làng bol dê, yal di tŭ ală broă gơlik geh tàm ƀòn lơgar nàng geh gùng dà bơsong.

Kung bơh broă tus bal lam sồr ală cau geh bơngă pin dờn neh dong kờl làng bol tơnguh nùs nhơm rơcang ngăc lài, tam dră, kơrian geh cồng nha ală jơnau đơs ờ di pal, sơgràm ală bơta bè kòn cau, jăt yàng. Uă broă tam lah, tam phà neh geh bơsong, bơsong tơn bơh tàm ƀòn. Mờ ală cau tờm do neh tus bal bơ̆t bơtàu ală broă lơh pơrlòng kờñ gơboh mờ dà lơgar, ală dơ̆ lam lơh tàm ƀòn lơgar bè gùt làng bol tam klăc bal bơ̆t bơtàu ƀòn lơgar pa, tơmù rơƀah kơl jăp.

Ồng Hồ Văn Mười, Phó Ƀí thư Tỉñ ủy, Củ tịc Anih duh broă Làng bol càr Dăk Nông đơs nền, ngui gơnoar bơh ală cau đảng viên, cau geh bơngă pin dờn tàm tiah làng bol jơi bơtiàn ờ gal cau là kơnòl kwơ màng bơh ală kấp, ală gah lơh broă nàng càr bơtàu tơnguh. Ồng Hồ Văn Mười pà git: “Ală kấp ủy, gơnoar atbồ ƀòn lơgar tus bal rơcang bơyai lơh ală broă lơh nàng ngui gơnoar bơh cau geh bơngă pin dờn, mpồl lơh broă tờm, pơn jăt tai lơh, tơnguh, lơh gơs mpồl cau geh bơngă pin dờn tàm tiah jơi bơtiàn ờ gal cau; pơn jăt tai lơh mờ lơh geh uă ală cau geh pơnrơ, gơguh jăk tàm ală gah broă nàng pơgồp bal tàm broă bơtàu tơnguh lơh sa, bơta chài rơgơi, mpồl bơtiàn, lơngăp lơngai, sền gàr dà lơgar tàm ƀòn lơgar, pơgồp bal tàm broă bơ̆t bơtàu ƀòn lơgar càr Dăk Nông ngai sơlơ pas gơs mờ niam bơnĕ”.

Đơs di gơnoar bơh cau geh bơngă pin dờn tàm mpồl bơtiàn jơi bơtiàn ờ gal cau, geh broă dong kờl di pal nàng gơtùi ngui uă ngan gơnoar “ală cau dờng ƀòn lơgar dê”, neh pơgồp bal tàm broă dong kờl càr Dăk Nông gàr kơl jăp bơta lơngăp lơngai cíñ trị, lơh geh ală cồng nha tàm broă bơtàu tơnguh lơh sa, neh lik klàs mờ càr rơƀah mờ gam lơh ngan gơs càr gơguh đao lơh sa tiah Tây Nguyên dê.