Mờ gùng dà broă lơh “cau lơi geh bơta lơi tă pơgồp bal bơta hơ̆, cau lơi geh ngai lơh broă den dong kờl mờ ngai lơh broă, cau lơi geh phan bơna, cau lơi geh uă tă pơgồp bal uă, cau lơi geh dồ ết tă pơgồp bal dồ ết”, drim ngai 18/09, tàm ƀòn dờng Kon Tum, càr Kon Tum bơyai lơh dơ̆ lam lơh srơh tàm pơrlòng “Tàm sơm bat tê bal tơn jơh hìu ơm ing, hìu ơm sèt” mờ jơnau kờñ tus jơh nam 2025 rơ̆p ờ gam geh hìu bơnhă rƀah, hìu bơnhă pa jơh rƀah pal kis tàm ală hìu ơm ing, hìu ơm sèt tai”.

Tàm ală nam pa do, bulah neh sền gròi lơh pràn broă lơh do, mơya tài bơh ală bơta lơh sa- mpồl bơtiàn gam uă kal ke, tus tŭ do, càr Kon Tum gam rlau 1 rơbô 500 hìu bơnhă kờñ geh dong kờl tơn jơh hìu ơm ing, hìu ơm sèt; tàm hơ̆ geh rlau 1 rơbô hìu bơnhă kờñ lơh pa mờ mờr 500 hìu bơnhă kờñ lơh niam wơl hìu ơm. Đơs tàm dơ̆ lam lơh, ồng Lê Ngọc Tuấn, Củ tịc Anih duh broă làng bol càr Kon Tum pà gĭt jơnau kờñ tus nam 2025 jơh ală hìu bơnhă tàm càr ndrờm kơ̆ kơl jăp tiah ơm kis. Tàm dơ̆ lam lơh srơh tàm pơrlòng “Tàm sơm bat tê bal tơn jơh hìu ơm ing, hìu ơm sèt” bơh càr Kon Tum dê, ală mpồl cau, cau dồ nă să, cau geh nùs nhơm niam neh tă pơpgồp dong kờl tơn rlau 500 tơlak đong mờ cih mat tă pơgồp dong kờl khà priă rlau 3 tơmàn đong.