Ală nam do, càr Gia Lai neh sền gròi tus tă priă lơh broă lơh ai pà dà ngui sa ƀòn lơgar nàng tơnguh bơta niam rài kis làng bol dê in, ngan là tàm ală tiah jơi bơtiàn dồ êt nă cau. Tus tŭ do, càr Gia Lai geh mờr 160 broă lơh ai pà dà ngui sa tơrgùm bal tàm ală thôn, ƀòn lơh broă geh cồng nha. 

Ală broă lơh do pơgồp bơnah tơnguh bơta niam rài kis làng bol dê, ngan là làng bol jơi bơtiàn dồ êt nă cau tàm ală tiah ngài. Nàng broă lơh dà sàng goh ƀòn lơgar lơh geh cồng nha dồ bă kơ̆ kơljap, ồng Nguyễn Văn Danh, Kwang bàng drơng broă ală rơndap broă lơh dà sàng gơ wèt Mpồl atbồ ală rơndap broă lơh bơcri priă bơt bơtàu càr Gia Lai pà git: Mpồl tờm bơcri priă rơp pơgồp bal nền nòn mờ gơnoar atbồ tàm ƀòn lơgar mờ ală mpồl atbồ, ai ngui broă lơh; sùm mblàng yal, hòi jà làng bol sền gàr dà, kờp sền, lơh niam wơl phan bơna mờ gùng ding dà nàng pleh bơta hoàc huơr dà, kờñ cèng wơl cồng nha niam rlau.