Tàm hìu mpàn pa geh lơh wơl, mò H’ Náp Niê, kòn cau Rơđê kis tàm ƀòn Kplang, xã Tân Tiến, kơnhoàl Krông Păc, càr Dăk Lăk chờ hờp đơs: jơh ală cau tàm jơi nòi rơlao 20 nă, tàm hơ̆ geh 03 rơnàng, 4 hìu nhă dềt ndrờm neh ntrờn tus tàm tiah ơm kis pa. Hìu nhă mò geh mờr 2 sào ù lơh hìu ơm mờ suơn gơwèt broă rơndăp ai ù tiah lơh gùng rơndeh ntoăt mhar dê. Lài ngan, ală cau tàm hìu kung kơlôi rơcang tài khà priă tơm ntrờn, dong kờl ờ uă ngan pơn drờm mờ drà kă bro. Mơya tŭ gŏ kwang bàng bơh kơnhoàl tus tàm xã, tàm ƀòn lơh ngan mblàng yal mờ lam sồr, mò H’ Náp Niê kung wă tus mờ bơta kwơ màng bơh broă lơh gùng rơndeh ntoăt mhar dê gơwèt mờ broă bơtàu tơnguh ƀòn lơgar dê.

Mò H’ Náp Niê pà git: “Hìu añ den di tàm tiah lơh gùng rơndeh ntoăt mhar lòt gan, dà lơgar sồr ntrờn tus tàm tiah ndai, den tàng hìu añ neh sờr hìu lài do hơ̆ sồng lơh wơl hìu tàm bă ù 03 do. Tài dà lơgar lơh gùng rơndeh ntoăt mhar ai ală cau in den tàng bol añ kung ring bal mờ ntrờn rê tus tàm do. Tơnơ̆ do geh gùng rơndeh ntoăt mhar kung kơ̆p kờñ dà lơgar ai tơl bơta niam nàng làng bol in lơh sa bơtàu tơnguh, geh gùng dờng ơnàng broă lòt rê pơn diang phan geh mhar rơlao”.

Ƀòn Kplang là ƀòn ơm kis bơh yau làng bol kòn cau Rơđê dê. Mò H’ Biơi Buôn Yă, Ƀí thư Ci ƀộ ƀòn Kplang xã Tân Tiến kơnhoàl Krông Păc pà git, rơndăp broă lơh gùng rơndeh ntoăt mhar Khánh Hoà – Buôn Ma Thuột lòt gan tàm gùl ƀòn, gơrềng tus mờ rơlao nggùl khà hìu tàm ƀòn. Uă hìu neh lơh kơl jăp, uă suơn tam phan neh geh tơnhào pal cò nàng lơh gùng. Lài ngan, broă mblàng yal, lam sồr nàng làng bol in dờp bal mờ khà priă tơm ntrờn ù tiah geh sền là kal ke ngan. Mơya, bơta kal ke do rơhời geh bơsong tŭ mpồl kwang bàng kơnhoàl tus bal mờ kwang bàng xã, thôn, ƀòn tus bal ơm, sa mờ làng bol nàng mblàng yal, lam sồr git wă, tam pà bal mờ làng bol. Mò H’ Biơi Buôn Yă pà git: “Lài ngan den bơh jơnau yal tus mờ làng bol dê là ƀòn añ geh gùng rơndeh ntoăt mhar lòt gan, lùp sền làng bol he geh ring bal lah ờ. Mơya tàm ƀòn Kplang do den geh uă hìu geh di tàm bă ù lơh gùng rơndeh ntoăt mhar lòt gan, giă priă tơm ntrờn den di pal, làng bol kung ring bal, ai priă tơm ntrờn nàng lơh wơl hìu tàm tiah ndai, blơi tai ù tàm tiah ndai”.

Ồng Trịnh Minh Tâm, Ƀí thư Đảng ủy mờ là Củ tịc UɃÑZ xã Tân Tiến, kơnhoàl Krông Păc, càr Dăk Lăk pà git, gùt xã geh 241 hìu làng bol gơtìp gơrềng bal tŭ lơh jăt rơndăp broă lơh gùng rơndeh ntoăt mhar Khánh Hoà – Buôn Ma Thuột. Do là rơndăp broă lơh dờng ngan, gơrềng tus mờ uă hìu làng bol ngan, mơya dờp geh nùs nhơm ring bal uă ngan mờ broă tơm ntrờn ù tiah kung mhar ngan sơl. Ồng Trịnh Minh Tâm pà git: “Gơwèt mờ xã, jơh ală mpồl lơh broă cíñ trị tus bal mblàng yal ală hìu làng bol in git nàng làng bol lơh jăt gùng dà broă lơh do. Kwang bàng tus tơn pơrjum mờ làng bol nàng mblàng yal, lam sồr làng bol nàng gờñ jào ù. Tus tŭ do 241 hìu làng bol neh jào jơh ù ai mpồl lơh gùng in”.

Tàm “tiah tam uă tờm sầu riêng” càr Dăk Lăk dê, tiah “ù geh kwơ” bè kơnhoàl Krông Păc dê, broă tơm ntrờn ù tiah lơh ală broă lơh là jơh dùl bơta kal ke. Lơh bè lơi nàng lơh geh nùs nhơm ring bal bơh làng bol dê, ồng Trần Hồng Tiến, Ƀí thư Huyện ủy kơnhoàl Krông Păc pà git, hơ̆ là broă lơh ngan, pràn ngan, khin kơlôi, khin lơh mờ khin dờp kơnòl bơh mpồl kwang bàng dê. Ồng Trần Hồng Tiến pà git: “Bơta kal ke ngan tàm do là lơh geh nùs nhơm ring bal tàm làng bol dê, lơh bè lơi nàng geh tơm ntrờn ù tiah. Kơnhoàl Krông Păc gơrềng uă ngan mờ rơlao 300 lồ ù, mìng là ù lơh sa suơn sre geh kwơ uă ngan. Geh ală tờm sầu riêng nam dơ̆ 5 dơ̆ 6 là dùl nam gơtùi tơnhào geh bơh 30 tus 40 tơlăk đong. Mơya jăt giă priă bơh dà lơgar dê den mìng geh tơm ntrờn di pơgăp 07 tơlăk đong mơ. Tŭ do lơh bè lơi nàng làng bol ring bal, bè hơ̆ den bol añ lơh geh mpồl đơng lam kấp kơnhoàl, kấp xã lơh geh ală mpồl kwang bàng mblàng yal, lam sồr làng bol”.

Rềp làng bol, wă làng bol mờ khin kơlôi, khin lơh, khin dờp kơnòl là ală bơta tơngŏ loh làng ngan tàm mpồl kwang bàng, đơng lam, đảng viên tàm kơnhoàl Krông Păc, càr Dăk Lăk dê tàm broă lơh jăt broă tơm ntrờn ù tiah lơh rơndăp broă lơh gùng rơndeh ntoăt mhar Khánh Hoà – Buôn Ma Thuột. Kơnờm mờ hơ̆, rơndăp broă lơh do neh lơh geh nùs nhơm ring bal uă tàm làng bol. Jơnau kờñ Đảng dê di mờ nùs nhơm làng bol, jơh ală làng bol kis tàm ală ƀòn tàm kơnhoàl Krông Păc ndrờm chờ hờp ai ù nàng Dà lơgar lơh gùng rơndeh ntoăt mhar.