Rơndap broă lơh bơcri priă lơh gùng rơndeh ntoat mhar tiah đah tô – tiah đah jum dà lơgar hờ tiah đah mat tơngai mut gơl Gia Nghĩa (càr Dăk Nông) – Chơn Thành (càr Bình Phước) là gơl gùng kuơmàng, tàm tơrbŏ bal tiah Tây Nguyên mờ tiah đah jum mat tơngai lik dà lơgar, tiah đah jum mat tơngai mut dà lơgar mờ ƀòn dờng Hồ Chí Minh. Jòng 128 kơi sồ, bơcri priă tam pà tơngai dơ̆ 1 geh 4 bơnàng gùng. Kờp jơh priă bơcri sơn rờp là 25 rbô 540 tơmàn đông. Ală kwang bàng sồr Cíñ phủ lam lơh Rơndap broă lơh gàr tơngai pơrgon, bơta niam, cồng nha bơcri priă jat di jơnau cih bơh adat boh lam dê.

Bơdìh hơ̆ tai, broă bơcri priă Rơndap broă lơh jat broă lơh lơh bal đah dà lơgar mờ cau dồ nă să pal kờp dŭ gơ hòi gơ jà ală cau bơcri priă, ngân hàng tus bal bơcri priă. Kwang ala mat Trình Lam Sinh, mpồl kwang bàng càr An Giang đơs nền: “Tŭ hòi jà cau bơcri priă tus bal rơndap broă lơh do jat broă lơh lơh bal đah dà lơgar mờ cau dồ nă să, bol he pal kờp tus broă bơnĕ bơnài bơta kuơ kung bè tam pà bơta aniai dipal bơh jơh 2 gah dê, tàm hơ̆ Dà lơgar pal lơh gơlik bơta niam ai cau bơcri priă in geh broă rơndap lơh ai wơl priă bơcri geh cồng nha. Bơta do kuơmàng ngan tài rơndap broă ờ geh tơl bơta niam nàng gơ hòi gơ jà cau bơcri priă den geh tŭ bol he pal tam gơl rơndap broă gơs broă lơh bơcri priă dà lơgar den lơh gơbàn lơyài tơngai pơrgon lam lơh rơndap broă, lơh gơ rềng tus kes priă dà lơgar, broă hòi jà bơta tă pơgồp bơh mpồl bơtiàn dê nàng lơh ală broă lơh phan bơna gùng lòt”.

Gơ wèt mờ tơnhàu phan kuơ tàm ù lơh phan bơt bơtàu ờs mờng drơng rơndap broă lơh in, ồng Nguyễn Trường Giang, Mpồl kwang bàng càr Dăk Nông sồr Quôk hội ai gơnoar ngui 2, 3 gùng dà, broă lơh krơi is: “Gơ wèt mờ tiah ờ hềt geh sră ai gơnoar gròi sền phan tàm ù, sră ai gơnoar tơnhàu phan kuơ tàm ù den cau lam lơh rơndap broă geh sac rơ wah nàng tơnhàu phan tàm ù. Cau lam lơh rơndap broă pal tong sră cih broă rơndap lơh tơnhàu phan tàm ù geh tơngume sền gàr tiah ơm kis mờ jàu Ủy ƀan Ñân zân càr Bình Phước mờ Ủy ƀan Ñân zân càr Dăk Nông in geh kơnòl dờp geh ngan broă rơndap lơh tơnhàu phan tàm ù geh tơngume sền gàr tiah ơm kis gơ wèt mờ ală broă lơh tơnhàu phan tàm ù, phan bơt bơtàu ờs mờng”.

Gơwèt mờ priă bơcri bơh kes priă dà lơgar rlau 10 rbô tơmàn đông, ală kwang bàng sồr Cíñ phủ mblàng lơh loh broă ai priă bơcri nàng lam lơh Rơndap broă lơh tàm nam 2026. Gơ wèt mờ priă bơcri bơh kes priă càr dê pơgap rlau 2 rbô tơmàn đông, sồr ală càr hơ pơrgon kong kơnòl tềng đap Cíñ phủ, Cíñ phủ kong kơnòl tềng đap Quôk hội bè broă ai priă bơcri bơh kes priă càr dê ai Rơndap broă lơh lam lơh gàr tŭ tơngai hơ pơrgon. Gơ wèt mờ khà priă bơcri bơh ală cau bơcri priă mờr 12 rbô tơmàn đông, geh 505 kờp jơh khà priă bơcri Rơndap broă lơh, sồr Cíñ phủ ring bal mờ cau bơcri priă, pleh tam gơl jơnau lơh nền bơcri priă Rơndap broă lơh.

Mblàng lơh loh tàm pơrjum, Ƀộ trưởng Ƀộ Giao thông Vận tải ồng Nguyễn Văn Thắng đơs nền, tŭ lam lơh rơndap broă lơh, ală tiah ndrờm đơs nền rơp tàm pơnring kes priă, ai tơl priă bơcri nàng lam lơh rơndap broă lơh di tơngai pơrgon, lơh gơs tàm lồi nam 2026: “Bơta kuơmàng bơh rơndap broă lơh do dê ƀuơn ngan bè phan nàng lơh. Tŭ do, jat jơnau sền sơ wì bơh khà kờp 2 càr dê den 2 càr neh ai tơl ală bă tiah tơnhàu phan tàm ù. Mìng geh bơta là tŭ do bol he geh gùng dà mờ Quôk hội gam kờp dŭ ai tơlik den kung ƀuơn ngan sơl, geh ală gùng dà, broă lơh krơi is gơ rềng tus bơta ai ù lam lơh rơndap broă, rơ wah cau lơh rơndap broă nàng lơh ală ƀòn ơm kis pa. Do là ală broă pal lơh mhar. Ai broă gơ rềng tus ai ală bă tiah tơnhàu phan nàng lơh… den jơh ală bơta do ƀuơn lơm”.

Kwang bàng Quôk hội mờ cau tĕ khà pin dờn là, broă bơcri priă Rơndap broă lơh bơcri priă lơh gùng rơndeh ntoat mhar Gia Nghĩa (càr Dăk Nông) – Chơn Thành (càr Bình Phước) rơp rơhời lơh gơs ală gùng rơndeh ntoat mhar, lơh gơlik ù tiah bơtàu tơnguh pa ai tiah Tây Nguyên in.