Bi Đinh Văn Tây ơm tàm xã Ia Klar tus gah dờp mờ tong wơl cồng nha lơh sră pơ àr gơnoar atbồ kơnhoàl Đức Cơ, càr Gia Lai nàng lơh sră tă dia. Mìng roh mờr 30 phuk bi neh lơh sir jơh sră pơ àr: “Cau lơh broă tàm do jơh nùs ngan, lơh broă sơrbac mhar ngan. Bè ờs den he lòt 1 dơ̆ là lơh gơs, dilah gam bơta lơi kòl yan den khi yal he in nàng lòt tam gơl wơl, ai dilah ờ geh bơta lơi den mhar ngan”.

Jat mò Hồ Thị Hiền, Phó Kwang atbồ phòng Nội vụ kơnhoàl Đức Cơ yal, niam nùs, ờ niam nùs, niam nùs ngan là 3 khà nàng làng bol tàm Đức Cơ in ai điểm tơnơ̆ tŭ lơh broă mờ kwang bàng. Nam 2022, khà niam nùs bè bơta drơng broă sră pơ àr gơnoar atbồ bơh kơnhoàl Đức Cơ dê ơm dơ̆ 5 tàm khà kờp jơh 17 kơnhoàl, thị xã, ƀòn dờng: “Jơnau đơs làng bol dê gơ wèt mờ bơta drơng broă bơh anih lơh broă dà lơgar tŭ làng bol lòt lơh ală sră pơ àr gơnoar atbồ den tơnơ̆ tŭ lơh ală sră pơ àr gơnoar atbồ den rơp geh dùl broă là làng bol geh kwang bàng, công chức pơlam mờ lơh sră pơ àr gơnoar atbồ, tơnơ̆ hơ̆ den kwang bàng rơp pà sră ai làng bol in, dan jơnau đơs làng bol dê bè bơta drơng broă tàm do geh bơta lơi halà ờ. Dilah niam nùs den làng bol yal, ờ niam nùs den làng bol kung yal nàng pơn jat tai tam gơl, lơh niam tàm tơngai tus nàng drơng broă gơ in niam rlau”.

Kung nàng kờñ tơnguh khà niam nùs bơh làng bol, mpồl lơh sa kă bro dê tŭ lòt lơh sră pơ àr gơnoar atbồ, tàm càr Quảng Ninh, Ƀộ sră pơ àr gơnoar atbồ gơ wèt gơnăp gơnoar bơsong bơh  càr dê ndrờm geh lir loh làng tàm hìu lơh broă mờ pang web điện tử. Ồng Bùi Tuấn Anh, Phó Kwang atbồ Sở Nội vụ càr Quảng Ninh pà git: “Quảng Ninh sồr gơnoar atbồ kâp hơ đơm mờ kâp xã mblàng yal mờ uă broă lơh. Bơh lir tàm hìu lơh broă xã, hìu niam chài tus mblàng yal tàm anih sơñio rùp kơnhoàl pah mang nàng ală jơnau cih bè broă lơh bơh dà lơgar, càr dê geh tus mờ làng bol nàng làng bol in git mờ tă pơgồp jơnau đơs. Gơ wèt mờ jơnau đơs ờ niam nùs den bol hi jat tơngai pơrgon pah nhai ndrờm tìp mat, tơm boh bơr mờ bơsong tus gùng tus dà broă gơlik geh”.

Bàr, pe càr, ƀòn dờng bè Quảng Bình, Quảng Trị, ƀòn dờng Hồ Chí Minh neh lơh gơtùi jơnau bơceh “Làng bol ai điểm” gơ wèt mờ 6 khà ai tơlik là: Nùs nhơm wă rò, pơlam lơh sră pơ àr; tŭ jơ lơh sră pơ àr; tŭ jơ dờp wơl sră pơ àr di mờ tơngai pơrgon; priă tă ờ ngan ngồn mờ bơta niam nùs bal. Sơñio khà niam nùs bal bơh bơta mìng geh 7 tàm khà điểm 9 den neh gơguh rơhời tus rlau 8 điểm, geh tiah geh 9 điểm. Tiến sĩ Lê Đặng Trung, Kwang atbồ Kông ty mblàng lơh loh tŭ jơ ngan ngồn, dùl tàm ală mpồl sơn rờp tus bal rơndap broă lơh làng bol ai điểm đơs: “Lơh gơlik ai jơh bal làng bol mờ kwang bàng lơh broă dà lơgar in bơta mờng kwèng là, do là dùl broă hơ wơl tơnơ̆ tŭ lam lơh broă drơng ala, do là dùl broă pal geh. Jat añ den hơ̆ là cồng nha dờng ngan, tài loh làng là uă nam lơh gơbàn nùs nhơm dan – pà, ờ mìng bơh đah anih lơh broă dà lơgar mờ bơh đah làng bol khi kung dờp bơta hơ̆. Mờ gah hơ wơl ndang, hơ wơl di, lơh gơlik dùl anih mờ làng bol gơtùi đơs khat gơboh, ờ rơngòt, mơya kung geh bơta sền sơ wì den bơta bơt bơtàu tàm broă hơ wơl hơ̆ là uă rlau”.

Nam 2022, kờp bal khà niam nùs bè bơta drơng broă sră pơ àr gơnoar atbồ bơh 63 càr, ƀòn dờng dê là 80,08%. Jat kờp dŭ bơh Ƀộ Nội vụ dê, khà do tàm nam 2023 (rơp geh yal tàm quý 2 nam 2024) digơlan geh 87,7%. Ală bơta tam gơl wơl jơh nùs tàm lam lơh Cíñ phủ sồ wèt tus bơt bơtàu dùl mpồl bơtiàn niam bơnĕ, dùl rài lơh sră pơ àr gơnoar atbồ đềt mềr, tài làng bol mờ drơng lơh gam ai gŏ ală cồng nha niam, pơn jờng tơl nă cau, tơl tiah lơh sir broă lơh măi mok sồ tàm broă tam gơl wơl sră pơ àr gơnoar atbồ.