Mờr dùl poh lài mờ tŭ lòt ling, ngan ngồn gơ gơs cau ling tàm mpồl ling klàng dê,  Tống Duy Nam, ơm tàm sơnah ƀòn Phúc Thành, ƀòn dờng Ninh Bình neh chờ hờp ngan geh lơh dơ̆ tơmut Đảng, geh ñă ntào sơntơm să tềng đăp bồng bi Đảng, bồng bi Dà lơgar dê. Nam mìng là dùl tàm 177 nă ơruh pơnu jak chài ngan rcang lòt ling geh kấp ủy, gơnoar atbồ càr Ninh Bình dê tề lam mờ tơmut Đảng. Ơm tàm mpồl Đảng là dùl bơta gơn kơnờm dờng màng nàng Nam in kờñ tă pơgồp dà kơl hề kơnòm să he dê ai dà lơgar in. Tống Duy Nam, đơs:“Añ mut Đảng gơ lơh chờ hờp ngan, pơn yờ să ngan tài bơh he là dùl tàm ală cau geh mut Đảng. Mut tàm mpồl ling añ rơ̆p pơnđơl pràn lơh ngan niam ngan nàng pơlam tàp să jan, pơlam tàp kơrnoat nàng gơ gơs cau ling krơh niam dê”.

Kung tàm bơta chờ hờp hơ̆ sơl, 2 nă ling pa bơh càr lơgar dê là klau pơnu La Đức Thắng, ơm tàm sơnah ƀòn Hoàng Văn Thụ, quận Hoàng Mai mờ Phạm Thế Anh, ơm tàm sơnah ƀòn Đông Ngạc, quận Bắc Từ Liêm neh sền gĭt loh rlau tai kơnòl broă bơh să tờm dê tàm tơngai lòt ling mờ broă lơh tă pơgồp dà kơl hề tơnơ̆ do dê. La Đức Thắng, đơs:“Tŭ geh mut Đảng bè do, kơnòl broă lòt jat bal hơ̆ lơh he in kơ̆p kờñ ngan geh tă pơgồp dà kơl hề mờ kung kơ̆p kờñ ngan gơtùi lơh geh dùl nă Đảng viên lơh krơh niam”.

Phạm Thế Anh, ơm tàm sơnah ƀòn Đông Ngạc, quận Bắc Từ Liêm, den đơs nền bè do:“Añ chờ hờp ngan geh tơmut tàm mpồl Đảng viên lài mờ tŭ añ lòt ling, añ gŏ să tờm añ pal pơn đơl pràn lơh ngan, lơh ngan uă, pơnđơl pràn lơh ngan tai mờ tơnơ̆ 12 nhai tơrlòng rơ̆p gơ gơs dùl nă Đảng viên jak chài ai Dà lơgar in. Tŭ mut tàm mpồl ling añ pơlam tàp niam ngan, lơh sir niam ngan ală kơnòl broă geh jàu”.

Ală ơruh pơnu geh tơmut Đảng lài mờ tŭ lòt ling là ală làng bol jak chài ngan, rcang lài lơh kơnòl broă ling klàng, geh bồ tơngoh, jơh nùs ngan mờ broă lơh tàm ală tiah dê, geh bơta kơ̆p kờñ ơm tàm mpồl Đảng neh geh kấp ủy ală tiah sền gròi tề lam mờ tơmut Đảng. Do là bơta jơh nùs lam lơh bơh kwang bàng kấp hơđơm dê, bè jơnau đơs bơh ồng Trần Duy Nhất, Củ tịc Ủy ƀan Ñân zân xã Gia Thịnh, kơnhoàl Gia Viễn, càr Ninh Bình dê:“Bơh tàm tơngai bơh chờm, bol añ neh tìp mat mờ ală ơruh pơnu geh nùs nhơm dong kờl is mờ ơruh pơnu geh bồ tơngoh niam mờ neh ai ală ơruh pơnu lòt bơsram, kung chờ hờp ngan nam do neh tơmut geh 2 nă ơruh pơnu lài mờ tŭ lòt ling. Nàng lơh geh ală jơnau sồr mờ jơnau kờñ hơ̆, hìu bơnhă tàm ƀòn lơgar, Ci ƀộ kung neh sền gròi, dong kờl, lơh geh ală bơta”.

Uă tiah kung sền gĭt tơmut uă Đảng viên tàm ơruh pơnu lòt ling là dùl broă lơh bơtàu tơnguh, mơya khà ơruh pơnu lòt ling geh tơmut Đảng tàm tơl tiah là krơi is. Ƀòn dờng Hà Nội tàm dơ̆ sac rơwah ling nam 2024 neh tơmut Đảng ai 15 nă ơruh pơnu lòt ling in, geh khà dồ ết 0,4% kờp jơh khà ơruh pơnu lòt ling dê, mơya 100% ơruh pơnu lòt ling geh bơsram  nùs nhơm Đảng dê. Đại tá Đào Văn Nhận, Phó Tư lệñ mơkung là Kwang atbồ pơlam broă ling klàng Ƀộ Tư lệñ càr lơgar Hà Nội, pà gĭt:“Nam do ƀòn dờng kung tơrgùm đơng lam, sồr lơh mờ lơh geh broă lơh bơtàu tơnguh, tàm hơ̆ 30 quận, kơnhoàl ndrờm pờ ală ơdŭ bơsram nùs nhơm Đảng ai làng bol in tơnơ̆ tŭ kham sac rơwah, tơl ală bơta lòt ling, rcang lài lòt ling tus bal bơsram ơdŭ nùs nhơm Đảng dê. Tŭ do tàm jơh gùt ƀòn dờng geh pơgap 15 nă làng bol geh tơmut Đảng lài mờ tŭ lòt ling”.

Tề lam, tơmut Đảng ai ơruh pơnu lòt ling in là dùl gùng dà broă lơh dờng tàm uă tiah dê. Jat tơrgùm kờp ờ hềt wil tơl, ală càr, ƀòn dờng tàm gùt lơgar neh tơmut Đảng geh gĭt nđờ rơhiang nă Đảng viên là ơruh pơnu jak chài ngan lòt ling. Do geh sền là broă lơh geh kwơ, rcang lài, tơnguh uă bơta niam cíñ trị ai ơruh pơnu lòt ling in mờ lơh geh bơnàng jă tề lam, lơh geh cau kuang bàng ai ală mpồl ling in kung bè lơh geh cau lơh kwang bàng tờm bơh mpồl ling klàng bol griăp ƀòn sền gàr is dê, rcang lài lòt ling tàm ală tiah tŭ ơruh pơnu lơh sir kơnòl broă ling klàng rê wơl.