Tàm 2 ngai lơh broă sùm bal mờ tŭ jiơ lơh broă uă ngan bal mờ rlau 30 broă lơh, dơ̆ lòt lơh broă bơh Thủ tướng Cíñ phủ Phạm Minh Chính dê tus bal Pơrjum WEF Davos dơ̆ 54 neh lơh geh cồng nha niam bơnĕ tàm uă gah broă, lơh geh khà jơnhoa jơh ală jơnau kờñ, jơnau sồr kơnòl broă dê sồr, neh lời wơl jơnau kah niam ngan mờ lơh gơrề pràn kơldang rùp rài bơh dùl dà lơgar Việt Nam bal mờ broă lơh, bơta pràn, gơnoar broă mờ bơngă pin dờn pa. Ală jơnau đơs bơh Thủ tướng Cíñ phủ Phạm Minh Chính dê neh yal wơl ală jơnau pơyua loh làng ngan bè dà lơgar Việt Nam bơtàu tơnguh ñhăp ñhar, tam gơl pa, là anih tus bơcri priă gơkờñ ai ală tập đoàn gùt plai ù in.

Dơ̆ lòt còp ngan ngồn lơgar Hungary mờ Romania tơnơ̆ tŭ tus bal Pơrjum WEF Davos bơh Thủ tướng Cíñ phủ Phạm Minh Chính dê tơn kung neh lơh geh cồng nha niam bơnĕ. Tàm dơ̆ lòt còp, Thủ tướng Phạm Minh Chính neh geh rlau 30 dơ̆ tìp măt, tơm bơh bơr mờ jơh ală kwang bàng đơng lam bồ kâp dờng bơh Dà lơgar, Cíñ phủ, Quôk hội, đảng cíñ trị 2 lơgar, đơs gùng dà broă lơh tàm ală hìu bơsram đại họk, tus bal cribơyai mpồl lơh sa kă bro, tìp măt mpồl lơh bơyô bal 2 lơgar mờ lơgar Việt Nam, tìp làng bol cau Việt Nam mờ còp bàr pe anih lơh sa, jak chài măy mok.