Ala mat ală Đại sứ ală lơgar ASEAN, Đại sứ lơgar Indonesia - là lơgar lơh Củ tịc ASEAN nam 2023 neh pơyua jơnau nting bơr gờm chờ mờ lùp còp bơh kwang đơng lam bồ lơgar Indonesia mờ ală lơgar ASEAN dê tus Củ tịc lơgar ồng Võ Văn Thưởng. Đại sứ đơs nền tàm 28 nam do, Việt Nam neh geh gơnoar broă kuơmàng ngan tàm broă sơlơ tơnguh bơta tam klac bal mờ gơnoar broă lơh tờm bơh ASEAN dê kung bè tàm broă bơt bơtàu bơta wèt sền Mpồl bơtiàn ASEAN tơnơ̆ nam 2025. Khà gơguh GDP nam 2022 bơh Việt Nam dê tàm khà 8,02% rơp lơh gơlik tai bơta gơn kơnờm ai bơtàu tơnguh lơh sa tiah do in.

Đại sứ Indonesia ala mat Đại sứ ală lơgar ASEAN hơ pơrgon, ală Đại sứ rơp jơh nùs tò dong mờ tă pơgồp geh cồng nha nàng kờñ sơlơ tơnguh rlau tai bơta git gơp đah Việt Nam mờ ală lơgar ASEAN; mờ kung pin dờn là tềng đap bơta đơng lam bồ jak chài ngan bơh Củ tịc lơgar dê, bơta git gơp lơh bơyô lơh broă bal đah Việt Nam mờ ală lơgar ASEAN rơp ngai sơlơ tam klac rlau mờ bơtàu tơnguh pràn kơldang, jrô ơnàng, tă pơgồp kuơmàng ai broă gàr sùm ring lơngai, lơngăp lơngai, kơ̆ kơljap tàm tiah do.