Tàm càr Gia Lai, broă lơh Duh khoai Bơtau Hùng geh bơyai lơh tơrgùm tàm Hìu duh khoai Bơtau Hùng tàm Ƀlàng dờng Đồng Xanh, ƀòn dờng Pleiku, geh gal làng bol bal mờ cau năc tus chu nàng kah kơlôi mờ ưn ngài broă lơh dờng màng bơh ală Bơtau Hùng. Dơ̆ chu nàng kah kơlôi tơlik nùs nhơm ki ngàm, jơnau niam “Hùc dà kah tô dà” bơh ală cau kòn kis tàm ù tiah càr Gia Lai dê gơwèt mờ Bơtau Hùng tàm ngai Duh khoai.

Mờ kòn cau Jarai kis tàm càr Gia Lai, bal mờ broă ưn ngài broă lơh dờng màng bơh ală Bơtau Hùng, làng bol gam pin dờn duh khoai yàng, mờ nùs nhơm “ală bơta ndrờm geh yàng” hơ̆ là ală yàng bè yàng bơnơm, yàng dà, yàng brê… Kra ƀòn Rơ Ô Phung, kis tàm ƀòn Gum Góp, xã Ea Rmok, kơnhoàl Krông Pa pà git tàm nhai 4 pah nam, kòn cau Jarai kung gam bơyai lơh duh kah Bơtau Ồs nàng răc dan geh mìu nhàc niam, phan tam hòn gơs niam, kàl lơh sa geh tơnhaò uă. Ồng Rơ Ô Phung đơs: “Gơwèt mờ làng bol kòn cau Jarai, bơh lài tus tŭ do, làng bol ndrờm lơh jăt bơhiàn git jơnau mờ ală cau bơtau, tàm hơ̆ geh bơtau Ồs. Tài do là cau sùm sền gròi tus mờ rài kis làng bol, sùm kờñ rài kis bơh làng bol ngai sơlơ hờm ram, mìu nhàc niam, tàm hơ̆ uă ngan là tàm kàl prang tàm nam, den do geh là cau ala măt làng bol lơh jăt ală broă lơh yàng duh khoai nàng geh mìu, do kung là dơ̆ nàng làng bol tơlik nùs nhơm tam klăc bal, dong kờl bal, sơrlèt mờ tơngai kal ke. Tŭ do den gơnoar atbồ ƀòn lơgar kung sền gròi nàng bol añ gơtùi lơh geh wơl broă lơh yàng răc dan nàng geh mìu, mờ do kung là dơ̆ nàng làng bol bơh tàm ală tiah in git tus mờ broă lơh yàng răc dan geh mìu mờ kung là nàng geh lơh sùm mờ ngui bơta niam chài ờs mờng làng bol kòn cau Jarai dê”.