Ngai òr (25/4), càr Bình Dương neh bơyai lơh pơrjum yal Nghị quyết bơh Ủy ƀan Thường vụ Quốk hội bè broă crơng gơs sơnah ƀòn An Điền, sơnah ƀòn An Tây gơwèt thị xã Bến Cát mờ crơng gơs ƀòn dờng Bến Cát. Tus bal dơ̆ pơrjum yal geh Phó Củ tịc Quốk hội ồng Trần Quang Phương.

Sơanh ƀòn An Điền, An Tây geh crơng gơs tàm tơngu me lơh bă ù bơh 2 xã geh măt sơnđan bal. Ƀòn dờng Bến Cát tơnơ̆ mờ tŭ crơng gơs geh 7 sơnah ƀòn mờ 1 xã. Tơngai do, Bến Cát lơh pràn broă bơtàu tơnguh lơh sa mờ măi mok, tus tŭ do gùt ƀòn dờng do geh 8 tiah lơh sa mờ măi mok, 1 tiah lơh sa tơrgùm bal, ai broă lơh 180 rơbô nă cau in. ală tiah lơh sa mờ măi mok hòi jà geh 6 rơbô 441 rơndăp broă bơcri priă lơh, tàm hơ̆ rơndăp broă geh priă bơcri lơgar bơdìh là 816 rơndăp broă mờ kờp priă geh mờr 9 tơmàn 800 tơlăk dolar Mỹ. Đơs tàm pơrjum, Phó Củ tịc Quốk hội ồng Trần Quang Phương pà git, broă crơng gơs ƀòn dờng Bến Cát là broă lơh kwơ màng, ai tơngŏ dùl broă bơtàu tơnguh ƀòn dờng do dê. Phó Củ tịc Quốk hội ồng Trần Quang Phương sồr kwang đơng lam ƀòn dờng Bến Cát pơn jăt tai ngui ală bơta pràn is, bơta geh bal mờ bơta pràn bơh càr dê nàng bơtàu tơnguh lơh sa mpồl bơtiàn geh cồng nha.

Bè hơ̆, kờp tus tŭ do, càr Bình Dương geh 5 ƀòn dờng, tàm hơ̆ geh: Bến Cát, Tân Uyên, Thuận An, Dĩ An, Thủ Dầu Một, do là càr geh uă ƀòn dờng ngan gùt lơgar dê.