Mò Vũ Thị Hương Giang, Kwang atbồ Thảo Cẩm Viên pà gĭt: dơ̆ lơh chờ do geh bơyai lơh dờng ngan, tàm hơ̆ geh rlau 50 cơldŭ ràng tăc phan yal tơngĭt 149 ƀañ bơh yau bơh 3 kơnhoàl ù tiah Dà lơgar dê, bơh hơ̆ pơgồp bơnah yal tơngĭt niam chài phan sa li la uă ngan, pơn rơ ngan bơh tơl kơnhoàl ù tiah dê. Broă lơh sền gĭt phan sa lơgar Việt Nam dê rơ̆p geh lơh gơs 3 tiah Huế - Sài Gòn – Hà Nội mờ ală phan sa bơh yau bơh ù tiah càr lơgar yau Huế dê, halà ù tiah phan sa duh hồl ngan bơh Sài Gòn dê mờ uă  phan sa cèng bềng bơta bơkah tiah đah Jum Dà lơgar mờ sền gĭt niam ngan bơh ală phan sa cèng bơta bơkah pơn rơ ngan bơh càr lơgar Hà Nội, bal mờ uă phan sa bơkah pơn rơ ù tiah Tây Nguyên dê. Broă lơh gam geh bơta tus bal bơh ală cau chài trŭ gơm phan sa, bơyai lơh ràng tơlik broă trŭ gơm bàr pe phan sa bơh yau lơgar Việt Nam dê. Dơ̆ lơh chờ trŭ gơm phan sa sơnđờm bơh ngai 26/04 tus ngai 01/05.

Mò Vũ Thị Hương Giang pà gĭt tai: “Mờ tơngume “Dà ia ù tiah brê bơnơm tơrgùm dùl” bol añ ai bơta tờm bơh dơ̆ lơh chờ dê là phan sa pal tơngŏ bơta krơi is tơl kơnhoàl ù tiah tàm tiah đah Tô- tiah tàm gùl lơgar mờ tiah đah Jum Dà lơgar dê. Broă lơh geh bơta tus bal bơh uă cau chài bơh yau, khi tus bal lơh ƀañ tàm tiah do mờ yal tơngĭt mờ năc lòt nhơl in”.