Bal mờ bơtau tơnguh lơh sa suơn sre jat gùng dà kông nghệ kao, kòn cau K’Ho ơm tàm thị trấn Lạc Dương neh tơnguh uă priă jền mờ broă lam lơh ală tiah tìp mat lơh kwèng niam chài cing mồng, bĕ tơrnờm, trŭ gơm phan sa drơng jơnau kờñ bơh năc lòt nhơl dê. Cau chài Kră Jañ K’Mơ, ơm tàm sơnah ƀòn Đăng Ja Rít, thị trấn Lạc Dương, pà gĭt: bơdìh mờ priă lơh geh bơh ală suơn biăp, kơphê.... tiah tìp mat lơh kwèng niam chài cing mồng tàm hìu bơnhă ồng dê neh drơng gĭt nđờ rbô dơ̆ năc lòt nhơl, cèng wơl priă lơh geh gơguh rlau 100 tơlak đong. Cau chài Kră Jañ K’Mơ, đơs: “Bơh sơn rờp he ờ gĭt lơh lòt nhơl, ờ hềt kơlôi tus broă prap gàr mờ ngui niam bơta niam chài jơi bơtiàn he dê, mơya bơh tŭ dà lơgar ngai sơlơ bơtàu tơnguh den bol añ neh kơlôi tus broă ngui niam mờ prap gàr cing, goòng, hìu rơng... mờ ală đờng goòng kòn cau nàng wă rò ală mpồl năc tus bơh uă tiah krơi is tus còp ƀòn lơgar tềng hơ đơm jơng bơnơm Lang Biang do, nàng drơng năc lòt nhơl in bol añ rơ̆p chu gơn ru ồs sàl mờ dròng cing, teh goòng, tam ya, đơs jơnau pơnđick nàng drơng broă năc lòt nhơl in, lơh geh nùs nhơm chờ hờp chờ hờn, ram mhŭ mờ rềp mềr. Priă lơh geh bơh broă lơh do añ tam pà bal mờ ală mpồl cing, mpồl tam ya, khà priă gam wơl añ pơn jat tai bơcri priă lơh tàm broă lòt nhơl hìu bơnhă... Ai ală hìu bơnhă ndai geh priă jền bơh lơh broă lòt nhơl cing mồng uă rlau mờ hìu bơnhă añ”.

Ờ mìng hìu bơnhă cau chài Kră Jañ K’Mơ dê lơm, uă hìu bơnhă kòn cau K’Ho tàm do neh gĭt ngui niam bơhiàn bơh yau niam chài bơh jơi bơtiàn kòn cau he dê nàng gơ hòi gơ jà năc lòt nhơl. Bơdìh mờ broă lam lơh tìp mat lơh kwèng cing mồng, làng bol gam tàñ ồi yau, bĕ tơrnờm, trŭ gơm ală phan sa bơh yau nàng kờñ lơh geh li la uă phan bơna drơng niam ngan jơnau kờñ bơh năc lòt nhơl dê. Bi Dàgout Groel, ơm thị trấn Lạc Dương, pà gĭt, ngai lơi geh mpồl năc tus nhơl den hìu bơnhă bi geh priă rlau 2 tơlak đong bơh broă tăc drăp tơrnờm. Bi Dàgout Groel, chờ hờp đơs: “Tŭ geh tŭ tơngai ru bol añ bĕ tơrnờm mờ prùng piang mbar nàng drơng năc lòt nhơl in, tài bơh do là broă lơh bơh yau den ờ gơtùi lời ờ... mờ he pal lơh jat sùm mờ ngui niam. Ngai lơi geh uă mpồl nă lòt nhơl den hìu bơnhă bol añ lơh geh pơgap bơh 2 tơlak tus 2 tơlak 3 rơhiang rbô đong, dilah ală ngai ờ geh năc den bol añ tăc ai ală năc lòt nhơl gùt dar tiah do in halà ală hìu bơnhă khi geh jơnau kờñ blơi kung geh priă jền bơh 1 tơlak 500 rơhiang rơbô đông tus rlau 2 tơlak đong pah ngai”.

Ală bơta kwơ niam chài bơh yau niam ngan bơh jơi bơtiàn he dê, mpồl bơtiàn kòn cau K’Ho ơm tàm thị trấn Lạc Dương neh bơtàu tơnguh gah lòt nhơl, drơng broă, pơgồp bơnah bơtàu tơnguh rài kis pah ngai. Ồng Lơ Mu Ha Pier, Phó Củ tịc Ủy ƀan Mặt trận Dà lơgar Việt Nam thị trấn Lạc Dương đơs nền: broă ai bơta niam chài cing mồng mut drơng broă lòt nhơl ờ mìng tơnguh uă priă lơh geh mờ gam pơgồp bơnah prap gàr, gàr niam phan lời wơl ù tiah niam chài cing mồng Tây Nguyên dê. Ồng Lơ Mu Ha Pier, đơs:“Là dùl nă cau geh bơngă pin dờn tàm tiah jơi bơtiàn dồ ết nă cau mờ tiah kơh bơnơm, añ chờ hờp ngan tŭ sền gŏ uă làng bol kòn cau Tây Nguyên bol ,he neh gĭt prap gàr mờ ngui niam bơhiàn niam chài bơh yau bơh bè ồng he dê, bè: cing mồng, tàñ ồi yau, bĕ tơrnờm... nàng drơng jơnau kờñ bơh năc lòt nhơl bơh tàm lơgar mờ uă lơgar tàm dunia tŭ tus sền ù tiah bơnơm Langbiang do mờ geh sền ală broă drơng lòt nhơl niam chài bơh yau, bơh hơ̆ rơ̆p yal tơngĭt bơhiàn niam chài jơi bơtiàn tàm tiah do dê tus mờ năc lòt nhơl ală tiah, bơta mờ añ kơ̆p kờñ ngan là làng bol jơi bơtiàn dồ ết nă cau tàm càr Lâm Đồng đơs bal mờ làng bol jơi bơtiàn dồ ết nă cau tềng hơ đơm jơng bơnơm Langbiang do đơs is pơn jat tai ngui niam mờ prap gàr bơhiàn niam bơnĕ hơ̆”.

Tŭ do, thị trấn Lạc Dương, kơnhoàl Lạc Dương, càr Lâm Đồng geh 11 tiah pơrjum niam chài cing mồng bơh ală hìu bơnhă mờ 4 tiah lòt nhơl. Pah nam, gơnoar atbồ gah lơh broă geh gơnoar neh pờ ală ơdŭ bơto bơtê dròng cing mồng nàng kờñ prap gàr mờ ngui niam ală bơta kwơ niam chài bơh yau. Bơh hơ̆, dong làng bol bơtàu tơnguh lơh sa mờ broă lòt nhơl, drơng broă lòt nhơl. Nam lài, jơh gùt kơnhoàl Lạc Dương neh wă rlau 2 tơlak 500 rơbô dơ̆ năc lòt nhơl. Mờ broă lơh do dê, ngan ngồn là tàm tơngai rềp ndo, rài kis kòn cau K’Ho tềng jơng bơnơm Langbiang, thị trấn Lạc Dương, kơnhoàl Lạc Dương dê rơ̆p pơn jat tai bơtàu tơnguh pah ngai.