Đơs wơl jơnau kờñ Pơrjum dờng dơ̆ XIII bơh Đảng dê là tus nam 2025 jơh gùt lơgar geh 3 rơbô kơi sồ gùng rơndeh lòt mhar mờ tus nam 2030 jơh gùt lơgar geh 5 rơbô kơi sồ gùng rơndeh lòt mhar; đơs sùm, mpồl broă lơh lam lơh nam 2024 dê là dờng ngan, tŭ tơngai gam wơl mìng gam 7 nhai lơm, Thủ tướng Cíñ phủ sồr ală ƀộ, ngàñ, ală tiah pal jơh nùs lơh ngan, kràñ cê jơh nùs rlau tai, tơrgùm tă bơsong ală bơta kal ke, kòl yan, lam lơh ală kơnòl broă nàng ală rơndăp broă lơh geh lam lơh di mờ tŭ tơngai, niam, ñhăp, bơta niam, lơngap lơngai, gàr niam tiah ơm kis, dră wơl mờ sa kuề sa kuà, bơta ờ niam.

Bè broă lam lơh, Thủ tướng sồr ală càr, ƀòn dờng sồr ngan ală cau tờm lơh tơrgùm hòi jà tơl cau lơh broă, phan bơna, nàng mut lơh mơkung gròi sền niam tŭ tơngai mut lơh, bơta niam mờ di tŭ tă bơsong ală bơta kal ke, kòl yan nàng lơh geh broă rơndăp lơh geh ai, mờ ală rơndăp broă lơh lơyài tŭ tơngai mut lơh pal sồr ală cau tờm lơh bơtơl tai cau lơh broă nàng lam mut lơh gàr niam tŭ tơngai ală rơndăp broă lơh dê.