Dơ̆ sơn rờp tàm Tiah ràng tơlik Hìu đơs crih Hồ Gươm, mờr 300 nă nghệ sĩ, cau bơyai lơh, cau pĕ kơñi tus bal bơyai lơh ală jơnau cih đơs crih mờ gùng đơs crih cih bè Điện Biên Phủ bơh ală cau cih lơh geh Khà jờng Hồ Chí Minh; Khà jờng Dà lơgar bè Văn họk nghệ thuật.

Ală jơnau cih geh sac rơ wah bơyai lơh tàm broă lơh ndrờm là ală jơnau cih neh rài kis mờ kis sùm jat nam nhai, lời wơl uă tềl lời wơl kah yau mờ lòt bal mờ jơi bơtiàn. Hơ̆ là ală jơnau cih jak ngan geh jàu khà jờng tàm pơrjum dờng Văn kông gùt lơgar, dơ̆ 1 nam 1954 dê. Bal mờ gơtha mờ bơngă dờng màng kah yau bơh Tam lơh pha lin Điện Biên Phủ dê, broă lơh đơs crih tam ya kwơ màng do mờ kơ̆p kờñ bơh jơnau đơs crih, ràng tơlik wơl nùs nhơm tam lơh pha lin mờ jơh bal mờ ală bơta chơ̆t phi să khin cha jak chài ngan bơh ling klàng mờ làng bol he dê tàm dơ̆ Tam lơh Điện Biên Phủ kah yau.