Nàng geh phan sa bơh ngòñ sràt, pal geh bơta rcang lài niam ngan bơh phan trŭ gơm mờ broă trŭ gơm dê. Lài ngan là rơwah ală rơsòn ngòñ dờng, uă tăp tàm ntê chi dờng jơnhoa tàm brê, jat kềng gah mìr halà jat kềng gah dà dờng, dà croh nàng gàr niam bơta sàng goh tŭ trŭ gơm phan sa. Ală rơsòn ngòñ sràt geh uă tăp geh sền bè là phan sa geh pà bơh brê bơnơm dê mờ bơta bơkah, lơngàm uă ngan. Tơngai niam ngan rlau jơh lòt kŭp ngòñ sràt là bơh bồ kàl mìu mờ tơnơ̆ tơngai tơnhào jơh phan lơh sa suơn sre.

Kòn cau Rơđê Bih ơm rềp jat kềng gah dà dờng geh bơkào rù rì (djam tang) sùm trŭ gơm biăp sràt bal mờ ngòñ sràt gơ kờñ ngan. Ai kòn cau Rơdê Adham sùm tàm bơrlŭ bal ngòñ sràt mờ ka ke, ka pềs halà ƀŏ bal mờ plai bơl hồng lơh phan sa nhơl, ƀŏ boh cĭk ală phan sa bè poăc ro, biăp bùm hồl.... Bi H’Djun Niê (sùm hòi là mè Tân), ơm tàm ƀòn Sah A, xã Ea Tul, kơnhoàl Cư M’gar, càr Dăk Lăk pà gĭt, tơl kơnhoàl ù tiah geh broă trŭ gơm krơi is mơya kung sùm lời bè ờs bơta sràt bơkah ngan bơh ngòñ sràt dê: “Ka ke den rào sàng goh mờ cèng buh tàm bơnhă ồs rơnga nàng bơkah rlau tai. Tơnơ̆ hơ̆ tă jơh lò ka. Ngòñ sràt den ìs dùl tơngai tơnơ̆ hơ̆ chàng, ờ duh ơn tơngi. Den cèng tàm bơrlŭ bal mờ ka ke. Tàm phan sa do geh bơta hòi bơh mrĕ, nha é, nha cañ, nha bô lò lơh geh dùl bơta bơkah ngan. Do là dùl phan sa bơkah ngan bơh kòn cau Rơđê he dê bơh lài òr tus tŭ do”.

Bơdìh mờ bơta sràt krơi is ngan bơh ngòñ sràt dê tàm ală biăp dà, plai bơl hông bơrlŭ bal mờ ngòñ halà ală phan sa ndai den ngòñ sràt gam geh ƀŏ bal mờ ală nha bè nha bô lò, nha é, nha sầu đâu (tiang liang) halà ƀŏ bal mờ ka ro kung lơh geh ală phan sa bơkah ngan sơl. Bi H’Đim Niê (sùm hòi là mè Linh), ơm tàm ƀòn Ayun, xã Ea Kueh, kơnhoàl Cư M’gar, càr Dăk Lăk pà gĭt, boh ngòñ sràt ờ gơtùi ờ geh tŭ geh poăc sur pơr tềng hơđang bơnhă ồs halà poăc kơnrồ ìs dùl tơngai. Boh ngòñ sràt gơtùi sa bal mờ piang duh, biăp hồl, lơh phan sa sràt halà cĭk bal mờ ală bơta plai chi bè pơ ò, sơmoan, pơ ồs...Bi H’Đim Niê đơs:“Boh ngòñ sràt tĕ boh, ƀòk ngòk ƀŏ bal. Ngòñ sràt den ìs ro, tĕ tai dồ ết tiêu ai gơ in bô bơkah tŭ cik bal mờ poăc pơr tềng hơđang bơnhă ồs. Tŭ rơ wah ngòñ sràt ƀŏ boh mrĕ den ờ ai tăp ngòñ sràt ờ nàng lời geh bơta sràt bơh boh ngòñ dê”.

Ală phan sa bơh ngòñ sràt ờ gơtùi ờ geh gơwèt mờ năc lòt nhơl tus mờ Tây Nguyên. Gơwèt mờ ală năc lòt nhơl dơ̆ sơn rờp gŏ ală phan sa bơh ngòñ sràt rơ̆p geh bơnah lơi ờ khin sa. Mơya tŭ neh sa dùl dơ̆ rau rơ̆p lơh gơ kờñ mơ tŭ lơi ờ gŏ gĭt. Ală phan sa bơh ngòñ sràt bulah bal hiă ngan mơya bơkah ngan, cèng bal dồ ết bơta krơi is bơh brê bơnơm dờng ơning ơnàng dê.