Jat Sở Niam chài, Tàp pràn să jan mờ Lòt nhơl càr Dăk Lăk yal, tàm dơ̆ ơm rlô chờ Ngai sơntờm dà lơgar nam do, ală anih lòt sền, lòt nhơl tàm càr neh wă rò mờr 130 rbô dơ̆ nac, tàm hơ̆ geh mờr 2 rbô 500 dơ̆ nac ală lơgar. Kờp jơh khà nac ơm wơl bic mang kờp dŭ geh 75 rbô dơ̆, khà ơpah cơldŭ kờp bal geh mờr 70%. Kờp jơh priă lơh geh bơh lòt nhơl tàm dơ̆ ơm rlô chờ mờr 85 tơmàn đông. Jơh bal khà nac, khà cau ơm wơl bic mang mờ nac lòt nhơl ală lơgar tus tàm càr nam do ndrờm gơguh uă bơh 2 tus 3 dơ̆ pơndrờm dùl tŭ bal mờ nam 2023.

Mò Nguyễn Thụy Phương Hiếu, Phó Kwang atbồ Sở Niam chài, Tàp pràn să jan mờ Lòt nhơl càr Dăk Lăk pà git, tàm dơ̆ ơm rlô chờ Ngai sơn tờm dà lơgar nam do, tàm càr geh lơh uă broă lơh lòt nhơl, niam chài. Bơh ală broă do, Dăk Lăk neh gơtùi lơh gơs rùp hin lòt nhơl đềt mềr, gơ hòi gơ jà nac lòt nhơl.