Nàng rơcang ai dơ̆ pơrlòng in, bơh lài hơ̆ bàr, pe poh, ală mpồl cau chài tàm ală ƀòn neh lơh ngan pơlam tàp, dròng wơl ală jơnau cing mờng kwèng halà tàp jơnau cing kal ke, lơh pa jơnau bơyai lơh he dê. Bi H’Nhuen Mlô ơm tàm ƀòn Kŏ Siêr, sơnah ƀòn Tân Lập, ƀòn dờng Buôn Ma Thuột, càr Dăk Lăk pà git, bi mờ ală cau tàm mpồl cing ùr sơnah ƀòn Tân Lập neh tàp 1 nhai do nàng gơtùi dròng chài 2 jơnau cing lơngô, cing gle pơgồp bal mờ tamya xoang: “Lài mờ tŭ pơgru bơto den bol hi tàp is, rơndap is mpồl dròng mờ gơp. Tŭ pơgru tus den mìng tơrgùm pơlam ală bơta ờ hềt di, ờ hềt niam. Bè hơ̆ den bol hi tàp sùm tus tŭ chài hơ̆ sồng rlô. Ală oh mi cau ùr lòt dròng cing den tàng kung chờ hờp ngan, cau lơi kung lơh ngan, pơn đơl jơh pràn nàng gơtùi lơh niam ngan rlau jơh”.

Nam do là nam dơ̆ 3 pơrlòng cing mồng geh càr Dăk Lăk bơyai lơh. Bal mờ dròng cing mờ nhơl đờng goòng kòn cau, tàm pơrlòng gam geh ală broă lơh đơs pơnđik, tamya kòn cau, yal tơnggit dùl gơl bè dơ̆ lơh chờ, bơhiàn bơyai lơh niam chài bơh yau gơ jat bal mờ niam chài cing mồng Tây Nguyên. Do là tŭ nàng ală mpồl in ờ mìng bơsram, cribơyai mờng chài mờ gam ai tơnggŏ bơta chài, bơta bơceh lơh, lơh ală bơta gùng đơs crih mờ đờng goòng. Cau chài ồng Y Phúc Êban ơm tàm ƀòn Ju, xã Ea Tu, ƀòn dờng Buôn Ma Thuột, càr Dăk Lăk yal: “Rơhời bơsram dơ̆ dùl êt nàng ngai sơlơ niam rlau. Pơrlòng ờ mìng là tŭ nàng tàm pơrlòng, lơh gơlik bơta chờ hờp tàm pơrlòng den bơta jơh nùs bơh tơl mpồl dê rơp gơguh uă rlau”.

Pơrlòng nam do geh rlau 500 nă cau chài bơh 13 kơnhoàl, thị xã, hìu bơsram Đại họk Tây Nguyên mờ bàr, pe Hìu bơsram kâp 3 kòn cau tàm càr tus bal. Tơl mpồl ndrờm cèng tus ală jơnau bơyai lơh niam ngan geh bơta tus bal bơh cau chài tàm uă bơta sơnam dê, lơh wơl wil tơl dùl gơl broă lơh yàng, lơh chờ bơh yau bơh dùl jơi bơtiàn, dùl ù tiah dê. Bi H’Lâm Hmok, ơm tàm thị trấn Buôn Trấp, kơnhoàl Krông Ana pà git: “Bol hi chờ hờp ngan tŭ tus ndo gơtùi tìp mat, lơh kwèng, bơsram ală mpồl bơyô bè bơta chài dròng cing mờ gơtùi bơsram uă rlau tai mờng chài bơh ală mpồl bơyô tàm ală ƀòn ndai tus bal pơrlòng”.

Bơh 3 dơ̆ bơyai lơh, pơrlòng niam chài cing mồng neh geh uă tam gơl pa. Tàm hơ̆, broă rơcang lài broă rơndap lơh mờ ală tŭ tơngai mùl màl geh lơh bơh gờñ den tàng ală mpồl geh uă tŭ tơngai pơlam tàp, rơ wah ală jơnau bơyai lơh pơn rơ niam. Bè tàm ƀòn dờng Buôn Ma Thuột, Anih tờm Mblàng yal jơnau, Niam chài mờ Tàp pràn să jan ƀòn dờng neh bơyai lơh Pơrlòng niam chài đơs crih tamya làng bol nàng sac rơ wah ală mpồl cau chài mờ jơnau pơrlòng niam ngan rlau jơh nàng tus bal pơrlòng kâp càr. Mò Phạm Thị Hải Bình, Phó Kwang atbồ Anih tờm pà git: “Ală jơnau pơrlòng geh khà jờng tàm dơ̆ pơrlòng niam chài đơs crih tamya làng bol rơp tus bal Pơrlòng niam chài cing mồng bơh càr Dăk Lăk bơyai lơh. Mờ bol hi kờp dŭ rơp bơyai lơh mang tìp mat đơs crih tamya nàng gờm chờ tơngkah 120 nam ngai crơng gơs càr Dăk Lăk, 120 nam Buôn Ma Thuột crơng gơs mờ bơtàu tơnguh, tơngkah 80 nam ngai crơng gơs Ling klàng làng bol Việt Nam, tàm ròt ală broă lơh gờm chờ tơngkah 120 nam ngai crơng gơs càr”.

Jat ồng Lại Đức Đại, Phó Kwang atbồ Sở Niam chài, Tàp pràn să jan mờ Lòt nhơl càr Dăk Lăk đơs, bơta pa bơh pơrlòng nam do dê là broă rề ơnàng anih bơyai lơh. Ala mờ bơyai lơh tơrgùm bal tàm Anih tờm niam chài càr den ală mpồl tam pà bơyai lơh tàm 2 ƀòn bơtàu tơnguh pràn bè lòt nhơl. Bơh hơ̆, ờ mìng lơh gơlik phan lòt nhơl drơng nac lòt nhơl in tàm dơ̆ ơm rlô chờ Ngai sơntờm dà lơgar mờ kung dong broă lơh bơyai lơh bơh ală mpồl dê geh sơlơ gơ rề uă rlau: “Nam do bơyai lơh tàm 2 anih lòt nhơl mờ tàm dơ̆ ơm rlô ngai 02/9 geh gal ngan nac lòt nhơl, hơ̆ là ƀòn lòt nhơl mpồl bơtiàn Akŏ Dhông mờ tiah lòt nhơl mpồl bơtiàn ƀòn Kŏ Tam. Pơrlòng geh lơh ờ mìng là tŭ nàng cribơyai mờng chài, ai tơnggŏ pràn jak, bơta jơh nùs mblàng wơl ală bơta kuơ bơh yau bơh niam chài cing mồng dê mờ gam là tŭ nàng càr Dăk Lăk yal tơnggit niam chài cing mồng tus mờ làng bol mờ nac lòt nhơl tàm lơgar mờ lơgar ndai”.

Mờr 30 broă bơyai lơh bơh ală mpồl dê rơcang mờ bơyai lơh, mờ uă tơngume ai tơnggŏ niam chài, bơhiàn bơh yau mờ gùng đơs pơnđik bơh yau niam ngan, pơrlòng neh pơgồp bơnah jờng rơ ală bơta kuơ niam chài niam bơnĕ bơh ală jơi bơtiàn dồ êt nă cau gam ơm kis tàm càr Dăk Lăk dê. Mờ kung pơgồp bơnah yal tơnggit niam chài, lòt nhơl bơh càr dê tus mờ làng bol mờ nac lòt nhơl, lơh gơlik tai ù tiah sền git tàm ală ngai ơm rlô chờ Sơntờm dà lơgar tàm càr tàm nam do.