Sră wac rùp ù tiah lòt nhơl đơs crih tamya Dà Làc yal tơnggit mờr 60 anih tus tàm ƀòn dờng Dà Làc mờ bàr, pe tiah rềp bal geh lơh mờ 2 dà đơs là dà Mỹ mờ dà Yoan. Sră wac rùp ù tiah geh tam pà gơs 8 mpồl, bè: ù tiah kah yau mờ phan lời wơl niam chài, ù tiah niam tiang pơn rơ geh is, ù tiah ràng tơlik mờ anih niam chài, anih đơs crih… dong nac lòt nhơl in ƀuơn git mờ lòt sền ală ù tiah lòt nhơl, niam chài, đơs crih tamya bơh ƀòn dờng bơnơm do dê.

Ồng Đặng Quang Tú, Củ tịc Anih duh broă làng bol ƀòn dờng Dà Làc pà git, lồi nam 2023, Dà Làc pơn yờ să ngan tŭ ngan ngồn geh gơ gơs là ƀòn dờng geh jơng bơh ală ƀòn dờng bơceh lơh UNESCO dê tàm gah đơs crih. Broă lơh wac rùp ù tiah lòt nhơl đơs crih tamya Dà Làc là 1 tàm 3 jơnau bơceh lơh kâp hơ đơm nàng kờñ lơh jat ngan ngồn ală tơngume neh hơ pơrgon tŭ mut tàm mpồl do, kung bè chồl tơnguh gơnoar broă bơh niam chài mờ bơceh lơh dê tàm bơtàu tơnguh kơ̆ kơljap: “Sră wac rùp ù tiah do ờ mìng là phan nàng lam gùng, mờ gam là rơbàng tơrbŏ đah ală cau chài, ală anih niam chài mờ mpồl bơtiàn; dong pờ tơlik ală jơnau yal niam ngan bè kah yau, niam chài mờ bơceh lơh, mờ kung chồl tơnguh bơta bơtàu tơnguh kơ̆ kơljap bơh gah lòt nhơl, niam chài dê gơ jat bal mờ ƀòn dờng đơs crih. Tàm tơngai tus, bol hi rơp pơn jat tai lơh sir, bơtàu tơnguh mờ sơlơ pờ ơnàng sră wac rùp ù tiah do nàng yal tơnggit bồ bă wil tơl mờ di ală jơnau yal bè ală anih tus niam chài pa, ală broă niam chài krơi is bơh ƀòn dờng dê”.

Đơs tàm dơ̆ yal tơnggit, ồng Johnathan Wallace Baker, Kwang atbồ ala mat Mpồl Bơto bơsram, Jak chài mờ niam chài bơh Liên hợp quôk dê (UNESCO) tàm lơgar Việt Nam đơs nền, bơh tŭ mut tàm mpồl ală ƀòn dờng bơceh lơh UNESCO dê tàm gah đơs crih, Dà Làc ờ mìng jơh nùs tus bal ală broă kâp dunia mờ kơnhoàl ù tiah ală lơgar rềp bal bơh mpồl do dê mờ gam lơh broă rơndap lơh lam lơh broă nàng lơh jat ală jơnau hơ pơrgon mờ mpồl do. UNESCO chờ hờp ngan tŭ geh lòt bal mờ dong kờl Dà Làc lơh sră wac rùp ù tiah lòt nhơl – dùl sră wac rùp ù tiah gơtùi đal git mờ sac rơ wah ală ù tiah bơceh lơh mpồl bơtiàn bơh ƀòn dờng dê kung bè ală anih tus lòt nhơl tàm do dê: “Jat añ den jơnau bơceh lơh do rơp pơgồp bơnah đal git ală broă lơh niam chài mờ bơceh lơh bơh ƀòn dờng Dà Làc dê, mờ rơp là dùl phan geh kuơ ngan nàng nac lòt sền in gơtùi ntrờn lòt rê ƀuơn ƀuài tàm ƀòn dờng. Mờ kung gơtùi dong kờl ală anih lơh broă dà lơgar atbồ mờ ngui niam phan lời wơl niam chài, ală ù tiah bơceh lơh bơh ƀòn dờng do dê geh niam rlau”.

Kung jat ồng Johnathan Wallace Baker pà git, Dà Làc geh bơta pràn dờng ngan tàm broă ngui ală bơta gơn kơnờm niam chài he dê ai ală broă rơndap lơh bơtàu tơnguh kơ̆ kơljap in, tài tiah do geh bơhiàn niam chài bơh yau bơh mpồl bơtiàn 20 jơi bơtiàn dồ êt nă cau lơh gơs. Bè hơ̆ den tàng, broă ring bal đah bơtàu tơnguh lơh sa – mpồl bơtiàn mờ prap gàr mờ ngui niam phan lời wơl niam chài, tơnguh ală bơta kuơ lơh sa bơh bơta bơceh lơh bơh niam chài, đơs crih tamya dê mờ sền gròi tus bơta li la tàm bơta bơceh lơh bơh tơl nă cau dồ nă să, mpồl bal halà mpồl bơtiàn dê rơp ờ mìng chồl tơnguh lơh sa ƀòn dờng dê mờ gam nàng prap gàr phan lời wơl tai.