Gŏ uă tềl lời wơl gơ tơnggŏ jơnau digơlan geh broă lơh lơh gơlik phan ngui bơka să mờ lŭ tàm tiah tềl lời wơl jòi sền phan kwơ yau Ñrùh dà Hai. Do là tơnggume geh yal tàm pơrjum yal cồng nha rồ jòi sền phan kwơ yau Ñrùh dà Hai dơ̆ 3 bơh Anih prăp gàr phan kwơ yau càr Dăk Lăk bơyai lơh tàm mho ngai 13/09. Tiah tềl lời wơl jòi sền phan kwơ yau Ñrùh dà Hai tàm thôn 6, xã Ia Jlơi, kơnhoàl Ea Súp, càr Dăk Lăk geh gŏ bồ nam 2020. Anih prăp gàr phan kwơ yau càr Dăk Lăk neh pơgồp bal mờ Anih prăp gàr phan kwơ yau Kah yau Dà lơgar jòi rồ 02 dơ̆ tàm ală nam 2021 mờ 2022. Bơh hơ̆ jòi bàn geh uă phan lời wơl, phan bơna kwơ, is rơmis ngan, dơ̆ sơnrờp jòi bàn tàm Tây Nguyên; tàm hơ̆ geh “Jòi tơrgùm ală sề khuàng lŭ Ñrùh dà Hai” neh geh dờp là Phan sền gàr dà lơgar dê bơh nam 2023.

Mblàng sền jơh ală bơta pà gŏ tiah tềl lời wơl Ñrùh dà Hai geh lơh pơgăp mờ do di 4000 nam tus 2000 nam lài, gơ gam sùm jŏ jòng rlau 1 rbô nam, bơh rài tơnơ̆ rài ngui Lŭ pa tus rài ngui phan mờ lòs. Tàm dơ̆ jòi rồ dơ̆ 03, lơh bơh lồi nhai 6 tus jơh nhai 07 nam do, mìng tàm dồ bơtô jòi rồ pơgăp 20 thơk vuông neh jòi bàn geh mờr 1 rbô 400 nơm phan geh kƀàng tồl, kƀàng tơrdih, sùng, ƀôn, pơnhàt, uă nsàng bơcah phan ngui, pềs lŭ, sề khuàng…Is ồn, dơ̆ sơnrờp jòi bàn ală phan ruồi brài, uă nsàng phan ngui bơka să khuàng ờ hềt sir, khuàng sir, ală nsàng pă bơcah, gơ pà gŏ jơnau digơlan bè broă lơh lơh gơlik phan ngui bơka să mờ lŭ tàm do.