Mờ tơngume “Dăk Lăk- kơ̆p kờñ àng sơrdah” dơ̆ pơrlòng geh bơyai lơh bơh tŭ do tus jơh ngai hìng, 09/11, mờ mờr 350 nă kwang bàng, cau mblàng yal jơnau tus bơh 13 mpồl lơh broă kơnhoàl, ƀòn drà dờng mờ ƀòn dờng tàm càr Dăk Lăk dê tus bal. Bal mờ pơrlòng rơndeh lòt pơdar tàm gùng mblàng yal jơnau làm bă tiah, tơl mpồl lơh broă rơ̆p lơh dùl broă lơh mblàng yal jơnau tơrgùm bal mờ tơngume jờng rơ Đảng, Wa Hồ, nùs nhơm kờñ gơboh ƀòn lơgar Dà lơgar, bơhiàn kăc màng bơh ling klàng mờ làng bol ală jơi bơtiàn, ală cồng nha tàm broă bơt bơtàu mờ bơtàu tơnguh lơh sa- mpồl bơtiàn, sền gàr Dà lơgar – lơngăp lơngai, sền gàr gơnoar tờm tiah nhàr lơgar, bồt bơlào dà lềng. Tàm hơ̆, đơs ngan ală cồng nha bơh 120 nam càr Dăk Lăk tơnggơs mờ bơtàu tơnguh mờ nùs nhơm tam klăc dờng bơh 49 jơi bơtiàn ơm kis bal tàm kơnhoàl ù tiah càr Dăk Lăk dê.

Do là broă lơh geh bơyai lơh 2 nam dùl dơ̆ nàng kờñ sền wơl cồng nha lơh broă mblàng yal, yal tơngĭt gùng dà broă lơh bơh Đảng, adat boh lam bơh Dà lơgar dê tus mờ ală rơnàng làng bol; lơh geh tŭ tơngai niam tìp mat lơh kwèng, tơnguh uă cồng nha lơh broă mblàng yal jơnau tàm ƀòn lơgar.