Sơñio tềng ồi gam mbơn, bi K’Hều ơm tàm thôn 1, xã Dơng K’Nơh, kơnhoàl Lạc Dương, càr Lâm Đồng chờ hờp yal, do là ồi yau kòn cau bi dê bơh mpàng tê bi dê tàñ is tàm sùm 2 tơngleh tơn. Bi K’Hều yal, uă oh mi cau ùr tàm thôn tàm jà gơ̆p bơsram tàñ ồi, tŭ yal tơnggĭt ală phan bơna tàm internet mpồl bơtiàn den geh bàr pe nă cau sền gròi dan blơi phan. Bi K’Hều, đơs: He pơnđàng tàm facebook pơnyơu bè hơ̆ den geh cau he đơs là dilah he tàñ den khi sồr he tàñ dùl bàr pang ồi lơi hơ̆. He gĭt gơtùi tăc geh den he tàñ is nàng jòi tai priă jền dơ̆ ngui tàm rài kis ai să tờm in. Hơ̆ là jơnau lơh he kờñ rlau, kờñ tàñ tus geh. Mờr tus añ rơ̆p lòt bơsram tai.

Ai bi Bon Niêng K’Huyên ơm dồ thôn bal yal, kơnờm gĭt tàñ ồi mờ bi lơh geh tai priă jền tàm ală tŭ ru broă sươn mìr. Bi Bon Niêng K’Huyên, đơs: Añ bơsram mờ gĭt tàñ 1 nam do rao. Pah tŭ ru broă den tàñ hơ̆ sồng tăc tàm Lạc Dương ne geh bàr pe nă cau blơi, giă pơgăp bơh 550 rbô tus 600 rbô đong dồ pang, nhai lơh kung geh 4 pang sơl. Tŭ do gam gơlơh gơkờñ ngan mờ broă bơsram tàñ, kờñ pờ wơl ơdŭ bơto broă tàñ ồi yau nàng ờ roh tĕ bơhiàn ờs mờng bơh yau.

Tŭ sră dan blơi phan ngai sơlơ uă rlau, ală bi bơtòm tơrgùm să tai gơgơs dồ mpồl tàñ nàng phan bơna he dê geh uă drà tăc rlau. Bi Bon Niêng K’Gut ơm tàm thôn 1, xã Dơng K’Nơh pà gĭt, kơnờm lơh bal mờ Caritas Dà Làc, mpồl tàñ ồi bơh bi dê neh geh tai uă sră dan blơi phan bơh ồi yau nàng lơh phan soh tơm bau, bơka tàm hìu, phan ngui soh pa rài do dê…Bi gam pờ is ơdŭ bơto wơl tàm hìu nàng geh tai cau tus bal tàñ ồi yau kă bro. Bi Bon Niêng K’Gut, đơs: Añ kờñ lơh jăt niam, lơh gơrề tus ală ơruh pơnu ndai, pơgồp bơnah bơ̆t bơtài rài kis niam chài krơi is bơh he dê. Neh pờ ơdŭ bơh nam lài rao, pờ ơdŭ geh 15 nă cau bơsram den 5 nă cau tŭ do khi neh tàñ mờ tăc is. Đah Caritas dong kờl bal den lơh gơs dồ mpồl bal mờ he lơh. Geh cau trum, geh cau dŏ che brài, geh cau lơh bơta do bơta ne nàng lơh uă li la phan bơna, dipal mờ drà kă bro mơya ờ gơtìp hŭi roh tĕ dồ bơta niam chài ờs mờng bơh yau bơh he dê.

Tàm xã tiah sar lơgar ngài bơh kơnhoàl Lạc Dương dê bal mờ rlau 90% khà kờp làng bol là làng bol jơi bơtiàn dồ êt nă cau, tơngai do, xã Dơng K’Nơh dờp geh uă bơta sền gròi bơcri priă bơh Đảng mờ Dà lơgar dê, bơ̆t bơtàu phan bơna, đèng gùng, hìu bơsram, hìu sơnơm. Xã neh geh dờp là xã ƀòn lơgar pa tàm nam 2021. Bơh nhai 07 nam do, kơnhoàl Lạc Dương yal Ală jơnau neh lơh nền lơh Ƀòn niam chài lòt nhơl mpồl bơtiàn xã Dơng K’Nơh neh pờ tơlik uă bơta gơn kơnờm bơtàu tơngguh prăp gàr niam chài ờs mờng bơh yau gơ jăt bal mờ bơtàu tơngguh lòt nhơl bơh xã dê.

Mò Phi Srông K’Ham, Củ tịc Mpồl Cau ùr xã Dơng K’Nơh pà gĭt, bơh pơlam gùng bơh kơnhoàl dê, Mpồl cau ùr neh hòi jà, bơtòm tơrgùm oh mi cau ùr pơn jăt tai bơtàu tơngguh broă lơh tàñ ồi yau, rơhời lơh gơs ƀòn broă lơh lòt nhơl. Mò Phi Srông K’Ham, đơs: Lơh jăt niam bơhiàn chài krơi is jơi bơtiàn dê nàng lời prăp wơl, gàr wơl ai ală rơnàng tơnơ̆ in den tàng ală oh mi cau ùr tàm do kung geh bơsram geh bơto yal wơl broă lơh tàñ ồi, phan bơna lơh geh den bơtàu tơngguh gơ là niam ngan, gơguh tai priă lơh geh ai ală oh mi cau ùr in. Tŭ do geh broă dong kờl, Mpồl Cau ùr gam bơtòm tơrgùm geh 20 nă oh mi gam geh jơnau kờñ càn priă lơh ồi yau, tơl hìu càn uă ngan là 50 tơlak đong.

Bal mờ ală pơlam gùng  loh làng bơh gơnoar ătbồ tiah do dê bè prăp gàr mờ lơh jăt niam broă lơh ờs mờng bơh yau, uă cau ùr kòn cau K’Ho tàm xã tiah sar lơgar ngài Dơng K’Nơh gam rơhời tus wơl mờ bơrnơ̆ tàñ, tàñ gơs ală phan bơna bềng rùp să, lơh gơlik geh ală phan bơna ngui soh pa bơh ồi yau jơi bơtiàn dồ êt nă cau dê. Tàñ ồi yau ờ mìng dong làng bol geh tai priă jền mờ gam pờ tơlik geh bơta gơn kơnờm bơtàu tơngguh gơgơs ƀòn niam chài lòt nhơl mpồl bơtiàn tàm tiah ƀòn lơgar pa.