Tơnơ̆ 45 nam crơng gơs mờ bơtàu tơnguh, kơnhoàl Krông Pa geh uă cồng nha tàm bơtàu tơnguh lơh sa mpồl bơtiàn. Tàm tiah kal ke bơh càr Gia Lai dê, mơya nam 2023, Krông Pa neh lơh geh priă jền lơh geh kờp bal dùl nă cau geh 44 tơlak đông, rài kis làng bol ngai sơlơ bơtàu tơnguh, lơngăp lơngai, rơndap tap sèng geh gàr kơ̆. 

Di dơ̆ do, dờp kơnòl jàu bơh Ƀộ Văn hóa- Thể thao mờ Zu lịc dê, Củ tịc Ủy ƀan Ñân zân càr Gia Lai neh jàu sră cơng tàng sap sèng tiah tềl kah yau dà lơgar gơ wèt mờ Tiah tềl kah yau Tiah pôs đồng kac màng tam lơh Cư Jũ – Dliê Ya ai kơnhoàl Krông Pa in. Geh git, tàm 2 dơ̆ tam lơh dră wơl bol sò tơm Tây mờ Mỹ, Cư Jũ – Dliê Ya là tiah pôs đồng kac màng bơh 2 càr Gia Lai mờ Dăk Lăk dê, lời wơl uă pha lin dờng màng bơh Đảng ƀộ mờ làng bol dê.