Mho tiah nhàr lơgar xã Ia Nan, kơnhoàl Đức Cơ, càr Gia Lai duh trơ ồl ngan 38 độ C, nhơm trồ tiah trơ ồl mờ lơngeh lơngañ ngan. Rơndeh pơndiang dà bơh Kông  ty TNHH MTV 72, Ƀiñ đoàn 15 neh tus tơn tàm thôn Đức Hưng nàng pà dà ai làng bol in. Bi Siu H’ Úc pà gĭt, jơh ală tơrlung dà tàm thôn ndrờm neh soăt jơh lơm, làng bol ờ tơl dà nàng trŭ gơm biăp piang sa: “Ờ tơl dà kal ke ngan, uă tŭ geh priă kung ờ gơtùi blơi sơl. Bơtoah ngan mpồl ling klàng Kông ty 72, Ƀiñ đoàn 15 pà dà ai làng bol in. Làng bol chờ hờp ngan”.

Jơh nùs ngan dŭi ding dà lam dà bơh rơndeh pơndiang dà tuh tàm sơntèk dơng dà hìu bơnhă dê, bi Lê Thị Thu Hà đơs, làng bol tàm tơngkah bal pal ngui tềm pềr, bal mờ gơ̆p tam pà bal dà geh pà do: “Bol añ tềm pềr nàng tơl ngui sa tàm bàr pe ngai. Dà do bol añ lời trŭ gơm biăp piang sa lơm. Dà ràu biăp den bol añ lời tuh tờm chi sa plai in, ai iar, ada, sur in. Tềm pềr tơl ntờc dà tơn”.

Trung tá Nguyễn Phi Vân- Củ ñiệm Cíñ trị Công ty TNHH MTV 72, Ƀiñ đoàn 15 pà gĭt: là mpồl lơh broă lơh sa sền gàr Dà lơgar lơh pôs đồng tàm ù tiah do dê, kông ty geh gĭt nđờ rơbô nă cau lơh phan là làng bol tàm xã Ia Nan, kơnhoàl Đức Cơ. Tềng đăp bơta trồ prang dờng ngan do, mpồl đơng lam bồ kông ty sùm hòi jà kwang bàng, cau ling pah ngai ƀồm dà mờ pơndiang sùm 3 rơndeh pơndiang dà mờ kờp jơh geh 24 khối dà, dong làng bol sơr lèt gan tơngai kal ke. Trung tá Nguyễn Phi Vân, đơs: “Trồ prang dờng gơrềng tus jơh ală bơta, jơh bal mờ mpồl ling. Mpồl ling bol añ kung geh tŭ ờ tơl dà ngui sa pah ngai sơl. Mơya kwang bàng, cau ling, cau lơh broă bơh Kông ty rcang tam pà bal dà kwơ màng ngan bơh he dê mờ làng bol tàm ù tiah do in”.

Ồng Trần Xuân Nghiên- Củ tịc Ủy ƀan Ñân zân xã Ia Nan, kơnhoàl Đức Cơ, càr Gia Lai pà gĭt: thôn Đức Hưng tàm tiah jơnhoa ngan bơh xã dê, den gơ lơh bè nam lơi kung ờ tơl dà tàm tơngai kàl prang dờng. Uă nam do, Kông ty TNHH MTV 72, Ƀiñ đoàn 15 ndrờm dong kờl pà dà ai làng bol in tàm jơh bal nhai jŏ jòng. Bơta do neh sơlơ lơh tam klăc rlau tai nùs nhơm ling klàng làng bol, pơgồp bơnah sền gàr lơngăp lơngai tàm tiah nhàr lơgar Đức Cơ. Ồng Trần Xuân Nghiên, đơs: “Gơnoar atbồ tiah do jờng rơ uă ngan broă Kông ty 72 pà dà ngui sa ai làng bol in. Tàm 15 ngai do, sền bal là broă bè dà ngui sa pah ngai ai làng bol tàm thôn Đức Hưng in neh geh gàr niam sùm, làng bol iang nùs ngan. Geh kông ty dong kờl, làng bol chờ hờp, chờ hờñ ngan, cih dờp bơta tă pơgồp bơh Kông ty 72 dê tài gàr tơl niam ngan tơl ală bơta tàm rài kis bơh làng bol dê”.

Drờm bè hơ̆ sơl, tàm kơnhoàl tiah nhàr lơgar Ea Súp, càr Dăk Lăk, trồ tơngai duh jŏ jòng tàm tơngai pa do neh lơh làng bol ờ tơl dà ngui sa pah ngai uă ngan. Mpồl ling klàng, Kwang àng tiah do gam pơndiang tơl nơm rơndeh pơndiang dà nàng dong kờl làng bol in bè ờs wơl rài kis. Tàm klo ngai, trồ tơngai duh rlau 40 độ C, mò Vy Thị Mun, ơm tàm thôn 12, xã Ea R’Vê, kơnhoàl Ea Súp chờ hờp ngan tài bơh sơntèk dơng dà 500 lĭt mờ 1 rơbô lĭt bơh hìu bơnhă mò dê geh ală cau ling Kwang àng tus ƀồm bềng dà. Mò Vy Thị Mun, đơs: “Pah nam là kung tơl dà hùc mờ dà tuh ai phan tơm in sơl mơya nam do dà soăt bơh tàm nam tơn. Dan ưn ngai oh mi uă ngan, pà dà ai làng bol in hùc mờ trŭ gơm phan sa bè do chờ hờp ngan”.

Kung bè ală cau ling Kwang àng pà dà di tŭ, ồng Lò Văn Kiều, ơm tàm thôn 12, xã Ea R’Vê, kơnhoàl Ea Súp, càr Dăk Lăk, chờ hờp chờ hờñ ngan đơs: “Bàr nhai lài den ngui dà kơnờm tơrlung dà kềng gah hìu, mơya tŭ do tơrlung dà do kung neh soăt sơl. Pà dùl dơ̆ dà bè do den ngui geh bơh 4 tus 5 ngai ngui tềm pềr. Gơnoar atbồ tiah do mờ mpồl ling klàng, Kwang àng pà dà den dà ngui sa pah ngai ờ gŏ suơ̆i siơ̆u dà tai”.

Thiếu tá ồng Đoàn Huy Tưởng, Kwang atbồ Kwang àng xã Ea R’Vê, kơnhoàl Ea Súp pà gĭt, pah ngai ală thôn, ƀòn rơ̆p sền gĭt sră cih mat ală hìu bơnhă làng bol ờ tơl dà ngui. Tơnơ̆ hơ̆, Kwang àng xã geh broă rơndăp lơh pơgồp bal Mpồl lơh sa sền gàr Dà lơgar 737 (Quân khu 5), tàm pơ dar bal pơndiang dà sàng goh tus tàm tiah làng bol ơm kis. Tàm hơ̆, Kwang àng xã Ea R’vê geh Kwang àng kơnhoàl Ea Súp pà 2 rơndeh, ai Mpồl lơh sa sền gàr Dà lơgar 737 geh 3 rơndeh ờs ngui jun pơndiang dà pà làng bol in. Thiếu tá ồng Đoàn Huy Tưởng, đơs: “Dùl dơ̆ pà dà dùl hìu bơnhă bơh 1 tus 3 khối. Ngai sơlơ ờ tơl dà ngui sa pah ngai lơh gơ rề uă tiah. Broă pà dà do kung neh geh tàm broă lơh, broă rơndăp lơh dong kờl cau gơtìp rềs àr bơh Kwang àng kơnhoàl dê tàm hơ̆ geh tơngume pà dà ngui sa pah ngai ai làng bol ờ tơl dà ngui in”.