Mìu dờng bồ kàl tàm mho mang ngai 3/05, tàm ù tiah càr Kon Tum dê kung lơh rài jơh bơta kơn jơ̆ ai ală mpồl lơh broă sền gàr brê tŭ mờ gĭt nđờ rơhiang rbô lồ brê tàm ală kơnhoàl: Sa Thầy, Ia H’Drai, Đăk Tô, Ngọc Hồi, Kon Rẫy, Đăk Glei, ƀòn dờng Kon Tum gam ơm tàm khà tơngkah lài ồs sa brê sơbơng roh ngan geh bơta digơlan gơlik geh ồs sa dờng, mhar ngan gơ rề.

Ồng Nguyễn Văn Huy, Kwang atbồ Anih lơh broă Yal tơngĭt lài trồ tiah dà ia càr Kon Tum pà gĭt: do là dơ̆ mìu dờng sơn rờp bồ kàl. Khà mìu tàm ală kơnhoàl: Đăk Hà, Sa Thầy, Đăk Tô, Kon Plông mờ Đăk Glei geh bơh 50 tus 70mm. Ală kơnhoàl gam wơl tàm càr khà mìu kung geh bơh 20 tus 40mm. Mờ khà mìu bè hơ̆, phan tam tàm càr geh tơl dà nàng dờng gơs niam tàm tơngai bơh 5 tus 7 ngai.

Mho mờ mang ngai 03/5, tàm ƀòn dờng Pleiku, càr Gia Lai mờ ală kơnhoàl rềp bal neh geh mìu tàm uă tiah, mìu jŏ jòng sùm tàm 1 jơ. Do geh pơn yơu bè mìu “biàng” tài neh dong geh dà ai chi tam in tàm uă tiah tàm càr. Dơ̆ mìu bồ kàl tàm Pleiku mờ 2, 3 xã tàm ală kơnhoàl rềp bal bè Chư Păh, Ia Grai, Đăk Đoa, Chư Prông, càr Gia Lai tàm rlau 1 jơ. Mìu sơr đau neh dong tơrmù bơta duh rơ ồl jŏ jòng tàm uă ngai do. Mờ kung bơ tơl dà ƀồm tàm tŭ git nđờ rhiang lồ kơphe mờ chi tam ndai gam ờ geh dà, ro nha jơh.

Jat Anih yal lài trồ tiah dà ia tiah Tây Nguyên pà git, tàm ală ngai tus, tàm Gia Lai rơp pơn jat tai geh mìu càl tàm uă tiah. Bơta do rơp dong tơrmù ƀà bơta duh rơ ồl. Bulah bè hơ̆, tài trồ tơngai duh, ro kơnrañ jŏ jòng, den tàng digơlan rơp geh bơta trồ tiah ờ niam bè mìu piar, càl pồt pràn lơh gơ rềng ờ niam tus chi tam. Bè hơ̆ den tàng, làng bol pal rơcang lài geh broă rơcang sơndră.