Khà kơnòm dềt chơt să tài ală kòp gơtùi rơcang lài kơryan mờ ală sơnơm vaccine neh gơmù uă ngan bơh tŭ Việt Nam sơn đờm lam lơh Broă lơh cit sơnơm vaccine rề ơnàng dà lơgar tàm nam 1981, mờ jơnau kờñ gàr jơh ală kơnòm dềt tàm làm gùt ală tiah dà lơgar ndrờm geh cit sơnơm vaccine kơryan kòp. Cit sơnơm vaccine neh sền gàr git nđờ tơlak nă kơnòm dềt tàm lơgar Việt Nam bơh uă bơta kòp jê tàm sùm rlau 40 nam do. Do là jơnau tơnggit bơh Mpồl lơh sơnơm dunia mờ Kes priă Kơnòm dềt Liên hợp quôk pà git di tơngkah Poh cit sơnơm vaccine dunia (bơh ngai 24 tus ngai 30/4).

Pah nam, Việt Nam geh mờr 1 tơlak 700 rbô nă kơnòm dềt geh deh mờ rlau 95% kơnòm dềt tàm khà do geh cit sơnơm vaccine ờ sa priă kơryan 10 bơta kòp bơtờp sơbơng roh. Poh cit sơnơm vaccine nam do geh lơh bơh ngai 24 tus ngai 30/4/2024, di mờ tŭ tơngai tơngkah 50 nam Ngai lơh Broă lơh cit sơnơm vaccine rề ơnàng gùt plai ù, do là tŭ nàng jờng rơ cồng nha bơh Cit sơnơm rề ơnàng dê, đơs loh bơta gơ rềng bơh Broă lơh cit sơnơm rề ơnàng dê tàm broă dong kis, sền gàr pràn kơldang să jan kòn bơnus, sồr lơh jơnau bơceh lơh tam gơl pa nàng kờñ sơlơ tơnguh tai broă cit sơnơm vaccine kuơmàng do.